မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့နယ်သည် စားသုံးမှုမြင့်မားလျက်ရှိသည့် သကြားပြောင်းဖူးစိုက်ခင်းများကိုလည်း နှစ်စဉ်ရာသီအလိုက်စိုက်ပျိုးခြင်းဖြင့် နေ့စဉ်ကုန်စိမ်းသီးနှံဈေးကွက်သို့ သကြားပြောင်းဖူးများ နေ့စဉ်ဝင်ရောက် အရောင်းအဝယ်ဖြစ်လျက်ရှိသည်။ စိုက်ပျိုးမှုများသော ဧရာဝတီမြစ်ရိုးတစ်လျှောက်ရှိ မြစ်ရေဝင်ကျေးရွာများဖြစ်သည့် ကံလှ၊ ကျွန်းဦး၊ ကျွန်းညို၊ ဘောလုံးခုံ၊ သံပုရာပင်ကုန်း၊ နန်းတော်ရပ်ကျေးရွာများနှင့် မြစ်ခြေ၊ ကမ္မမြို့များမှလည်း ဝင်ရောက် အရောင်းအဝယ်ဖြစ်သည့်အပြင် အခြားမြို့နယ်များဖြစ်သည့် မန္တလေးတိုင်းဒေသကြီး ညောင်ဦးမြို့နယ် အတွင်းရှိ အထက်ညဉ့်၊ အောက်ညဉ့် ကျေးရွာများမှ ထွက်ရှိသော ပြောင်းဖူးများလည်း ပခုက္ကူဈေးကွက်သို့ ဝင်ရောက်အရောင်းအဝယ်ဖြစ်လျက်ရှိကြောင်း သိရသည်။
ဈေးနှုန်းဈေးကွက်အနေဖြင့် ၂၀၂၄ခုနှစ်၊ အောက်တိုဘာလ(စတုတ္ထပတ်)တွင် သကြားပြောင်းဖူးဈေးနှုန်းများ ကျဆင်းခြင်းမရှိ ဈေးအမြင့်ဖြင့် အရောင်းအဝယ်ဖြစ်လျက်ရှိကြောင်း၊ သကြားပြောင်းဖူး အရွယ်အစား အကြီးအသေးနှင့် အစေ့အောင်မြင်မှုပေါ်မူတည်၍ တစ်ဖူးလျှင် ကျပ်(၇၀၀-၆၀၀-၅၀၀)၊ ပြောင်းဖူးပြုတ်တစ်ဖူးလျှင် ကျပ်(၁၂၀၀-၁၀၀၀-၈၀၀)ဈေးဖြင့် အရောင်းအဝယ်ဖြစ်လျက် ရှိကြောင်း၊ စားသုံးသူများအနေဖြင့် ရာသီမရွေးဝယ်ယူရရှိပြီး ကျန်းမာရေးအထောက်အကူပြုသီးနှံ ဖြစ်ခြင်းကြောင့် ပြည်တွင်းစားသုံးမှု မြင့်မားလျက်ရှိ၍ စိုက်ပျိုးတောင်သူများနှင့် ရောင်းဝယ်ဖောက်ကား ဈေးသည်များလည်း အဆင်ပြေလျက်ရှိကြောင်း သီးနှံဈေးကွက်မှ သိရှိရပါသည်။
DOCA(မကွေး)