ခရမ်းချဉ်သီးကို အပူပိုင်းဒေသနှင့် သမနွေးပိုင်းဒေသတို့တွင် ကောင်းမွန်စွာ စိုက်ပျိုးကြသည်။ မြန်မာနိုင်ငံအနေဖြင့် မန္တလေးတိုင်း၊ မကွေးတိုင်း၊ စစ်ကိုင်းတိုင်းနှင့် ရှမ်းပြည်နယ်တို့တွင် အများဆုံး စိုက်ပျိုးကြပါသည်။ သမနွေးပိုင်းရာသီဥတုရှိသည့် ရှမ်းပြည်နယ်တွင် တစ်နှစ်ပတ်လုံး စိုက်ပျိုးနိုင်ပါသည်။ ခရမ်းချဉ်သီးကို ဘောင်ပေါ်မှ အစေ့ကိုအတန်းလိုက်ဖြစ်စေ၊ ကြဲပက်၍ဖြစ်စေ ပျိုးဘမ်း(သို့)ရေမဝပ်သည့်နေရာတွင် မြေဆွေး၊စက်ဖွဲပြာတို့ထည့်ပြီး ပျိုးထောင်နိုင်ပါသည်။ ပျိုးပြီး တစ်လ၊ တစ်လခွဲကြာလျှင် အစိုဓာတ်လုံလောက်သည့် စိုက်ခင်းတွင် ပြောင်း၍စိုက်ပျိုးနိုင်ပါသည်။
ထားဝယ်ဈေးကွက်တွင် ခရမ်းချဉ်သီးဈေးနှုန်းများမှာ ဈေးကောင်းရရှိကာ အရောင်းသွက်လျက်ရှိပါသည်။ ရှမ်းသီးနှင့် ကိုင်းသီးဟူ၍ (၂)မျိုးရှိရာ ယခုအချိန်တွင် ရှမ်းသီးများသာ ဈေးကွက်အတွင်း၌ အရောင်းအဝယ်ဖြစ်လျက်ရှိပါသည်။ ခရမ်းချဉ်သီး (၁)ပိသာလျှင် (၇၀၀၀)ကျပ်ရှိပြီး ထားဝယ်ခရိုင်အတွင်း မြို့နယ်များသို့ ရန်ကုန်ဈေးကွက်မှ ကားများဖြင့် လာရောက်ရောင်းချ ကြပါသည်။ ခရမ်းချဉ်သီးသည် ခန္ဓာကိုယ်အတွက် များစွာအကျိုးရှိသော သီးနှံတစ်မျိုးဖြစ်ပါသည်။ ခရမ်းချဉ်သီးတွင် ဗီတာမင်အေ၊ ဘီ၊ စီ၊ ကေတို့များစွာပါဝင်သောကြောင့် အဆီပြန်သည့် အသားအရေကို ထိန်းသိမ်းပေးပါသည်။ ခရမ်းချဉ်သီးတွင် လိုင်ကိုစင်းဓာတ် ပါဝင်သောကြောင့် ဆီးကျိတ်ကင်ဆာ၊ အူမကြီးကင်ဆာနှင့် အစာအိမ်ကင်ဆာများကိုလည်း ကာကွယ်ပေးနိုင်ကြောင်း သိရှိရပါသည်။
DOCA(တနင်္သာရီ)