တန်ဆောင်မုန်း လဆန်းအချိန်တွင် မုန့်ဆန်းလှိုင်လှိုင်ပေါ်နေပြီး ဖြစ်သည်အတွက် ဘားအံမြို့ပေါ်ရှိ ရေပေါ်ဈေးတွင် ကရင်ပြည်နယ်ဒေသထွက် မုန့်ဆန်းများ စတင်ရောင်းချနေကြောင်း သိရသည်။
မုန့်ဆန်းပြုလုပ်ပုံမှာ မောင်းညိုမဖြစ်တဖြစ်အချိန်တွင် ရိတ်ထားသောကောက်ညှင်းကို တုတ်ဖြင့် ရိုက်ချွေပြီး ရလာသည့် ကောင်ညှင်းကို ဒယ်အိုးဖြင့်ဆယ်မိနစ်ခန့် လှော်ပေးရသည်။ လှော်ထားသော ကောက်ညှင်းဆန်ပူပူကို ဆုံတွင်ထည့်ထောင်းပြီး ရရှိလာသော မုန့်ဆန်းပြားကို ဆန်ကွဲနှင့်အမှိုက်များစင်အောင် စကောဖြင့် ပြာပေးရပါသည်။ မုန့်ဆန်းကို အုန်းသီး၊သကြား၊ဆားအနည်းငယ်ဖြင့် ရောနယ်ပြီး ဆွမ်းတော်ကပ်ခြင်း၊ဦးရှင်ကြီးတင်ခြင်းတို့ ပြုလုပ်စားသုံးကြပါသည်။
ဘားအံမြို့ပေါ်ရှိ ရေပေါ်ဈေးတွင် ကရင်ပြည်နယ်ဒေသထွက် မုန့်ဆန်းဈေးနှုန်းများမှာ မုန့်ဆန်းတစ်ဘူးလျှင် (၈၀၀၊၁၀၀၀)ကျပ်၊ မုန့်ဆန်း တစ်ပြည်လျှင် (၇၀၀၀) ကျပ်နှုန်းတို့ဖြင့် ရောင်းချလျက်ရှိကြောင်း သိရသည်။
DOCA(ကရင်)