မြန်မာပြည်တွင် အထင်ရှားဆုံး ဟင်းခတ်အမွှေးအကြိုင်မှာ နံနံပင်ဖြစ်ပြီး အစေ့ကိုလည်း ဟင်းခတ်မဆာလာတွင် သုံးနိုင်သည်။ မြန်မာဟင်းများတွင်သာမက မုန့်ဟင်းခါး၊ အသုပ်စုံတို့ တွင်လည်း တွဲဖက်အသုံးပြုကြသည်။ ဆောင်းရာသီတွင် အထူးဖြစ်ထွန်းပြီး ကျန်ရာသီများတွင် ရှားပါးကာ စျေးကြီးပေသည်။ နံနံပင်အစေ့ကိုမစိုက်ခင် ရေတွင် (၂၄)နာရီကြာအောင် စိမ်ပြီးလျှင် ဆယ်၍ စစ်ထားရမည်။ ရေမစိမ်မီ ဂုံနီအိတ်ပေါ်တွင် တင်၍ပုလင်းဖြင့် နှစ်ခြမ်းကွဲသွားစေရန်အတွက် အသာအယာ လှိမ့်ပေးရန်လိုအပ်ပါသည်။ စစိုက်ပြီး တစ်ပတ်မှ(၁၀)ရက်အတွင်း အပင်ပေါက်လာပြီး (၄၅)ရက်သားမှစ၍ နှုတ်ယူစားသုံးခြင်း ရောင်းချခြင်းများ ပြုလုပ်နိုင်သည်။
နံနံပင်တွင် အမျှင်ဓာတ်ကြွယ်ဝစွာ ပါဝင်သည့်အပြင် သံဓာတ်၊ မဂ္ဂနီဆီယမ်၊ မဂ္ဂနိနှင့် ဗီတာမင်အေဘီစီ တို့ပါဝင်ပါသည်။ နံနံပင်သည် နို့ထွက်စေနိုင်သော်လည်း ကိုယ်ဝန်ဆောင်နှင့် နို့တိုက်မိခင်များ စားသုံးရန် သင့်တော်သည်ဟု အထောက်အထားမရှိသည့်အတွက် ထိုသူများအနေဖြင့် ဆရာဝန်နှင့်တိုင်ပင်ပြီးမှသာ စားသင့်ပါသည်။ ယခုအခါ ထားဝယ်စျေးကွက်၌ နိုဝင်ဘာလ ဒုတိယပတ်အတွင်း နံနံပင်စျေးကောင်းလျက်ရှိပြီး တစ်ပိဿာလျှင် (၆၀၀၀)ကျပ် ခန့်ရှိကြောင်း သိရပါသည်။
DOCA(တနင်္သာရီ)