ဘင်္ဂလားဒေ့ရှ်နိုင်ငံတွင် ပြည်တွင်းဆန်ဈေးနှုန်းများ မြင့်တက်မှုကို ထိန်းသိမ်းရန်နှင့် အရန်ထားရှိမှုကို မြှင့်တင်ရန်အတွက် ကြားကာလအစိုးရသည် ပုဂ္ဂလိကကုမ္ပဏီပေါင်း ၂၇၇ ခုသို့ စုစု ပေါင်း ဆန်တန်ချိန် ၁၄.၈၁ သိန်းကို တင်သွင်းရန် ခွဲဝေခွင့်ပြုပေးခဲ့ကြောင်း The Daily Star သတင်းဌာနက ဖော်ပြပါသည်။
ဘင်္ဂလားဒေ့ရှ် စားနပ်ရိက္ခာဝန်ကြီးဌာန၏ အချက်အလက်များအရ အဆိုပါ ဆန်ပမာဏ စုစုပေါင်းအနက် ပေါင်းဆန်တန်ချိန် ၁၀.၆၅ သိန်းပါဝင်ပြီး ကျန်ပမာဏသည် Atap chal ခေါ် စပါးအား ပေါင်းခံခြင်းမပြုပဲ နေလှန်းအခြောက်ခံ၍ ကြိတ်ခွဲထုတ်လုပ်ရရှိသည့်ဆန်များ ဖြစ်ကြောင်း၊ ပုဂ္ဂလိကကဏ္ဍမှ ဆန်တင်သွင်းခွင့်ကို လွန်ခဲ့သောရက်သတ္တနှစ်ပတ်ကျော်ကပင် ခွင့်ပြုပေးခဲ့ခြင်းဖြစ်ကြောင်း သိရှိရသည်။
စားနပ်ရိက္ခာဝန်ကြီးဌာနမှ တွဲဖက်အတွင်းဝန် Lutfor Rohman က ဆန်တင်သွင်းခွင့် လျှောက်ထားရန် ခွင့်ပြုသောကာလသည် နိုဝင်ဘာ ၁၇ ရက်နေ့၌ ကုန်ဆုံးခဲ့ပြီဖြစ်ကြောင်း၊ အစိုးရ သည် အဆင့် ၄ ဆင့်ဖြင့် ဆန်တင်သွင်းရန် အဆိုပါကုမ္ပဏီ ၂၇၇ ခုအား ခွင့်ပြုခြင်းဖြစ်ပြီး ဈေးကွက်အခြေအနေအပေါ်မူတည်၍ လိုအပ်ပါက တင်သွင်းခွင့်ခွဲတမ်းကို ပိုမိုချထားပေးမည်ဖြစ်ကြောင်းဖြင့် The Daily Star သို့ ပြောဆိုခဲ့သည်။
ဘင်္ဂလားဒေ့ရှ်နိုင်ငံ၌ မကြာသေးမီက ကြုံတွေ့ခဲ့ရသော ပြင်းထန်သည့် ရေလွှမ်းမိုးမှုများ ကြောင့် နိုင်ငံ၏အရှေ့မြောက်ပိုင်းဒေသတစ်ဝန်းတွင် မိုးစပါးစိုက်ပျိုးမှုအပေါ် ထိခိုက်မှု ကြီးမားစွာ ဖြစ်ပေါ်ခဲ့ပြီး ဆန်လက်လီအရောင်းဈေးနှုန်းများမှာ မြင့်တက်လာခဲ့သည်။ စိုက်ပျိုးရေးပညာပေးဦးစီးဌာန၏ အချက်အလက်များအရ ဩဂုတ် ၁၆ ရက်မှ အောက်တိုဘာ ၁၅ ရက်အတွင်း ရေကြီးမှု ၂ ကြိမ်ဖြစ်ပေါ်ရာ၌ ထိခိုက်ဆုံးရှုံးခဲ့ရသည့် ဆန်တန်ချိန်မှာ ၈.၃၉ သိန်းခန့်ရှိသည်။ သို့ဖြစ်ရာ ဆန်ဈေးနှုန်းများ ထပ်မံမြင့်တက်မှုမရှိစေရေးနှင့် ပြည်တွင်းဆန်လက်ကျန်ပမာဏကို မြှင့်တင်နိုင်ရေးအတွက် ဆန်တင်သွင်းခြင်းကို ကြားဖြတ်အစိုးရက တွန်းအားပေး လုပ်ဆောင်လျက်ရှိသည်။
ပြည်တွင်း၌ထွက်ရှိသည့် စပါးများကို ဝယ်ယူ၍ ဆန်ကြိတ်ခွဲထုတ်လုပ်ခြင်းအပြင် အိန္ဒိယနိုင်ငံထံမှ ဆန်တင်သွင်းခြင်းကိုပါ လုပ်ကိုင်လျက်ရှိသော Majumder Group of Industries မှ မန်နေဂျင်းဒါရိုက်တာ Chitta Majumder က ၎င်းတို့ကုမ္ပဏီအနေဖြင့် ဆန်တန်ချိန် ၈၀၀၀၀ တင်သွင်းရန် အစိုးရထံမှ ခွင့်ပြုချက်ရရှိထားသည်ဟု ပြောဆိုခဲ့သည်။
စားနပ်ရိက္ခာဝန်ကြီးဌာန၏ ညွှန်ကြားချက်တွင် လက်ရှိအဆင့်၌ ဆန်တင်သွင်းခွင့်ရရှိသော ကုမ္ပဏီများအနေဖြင့် တင်သွင်းလာသည့်ဆန်များကို ဒီဇင်ဘာ၂၂ ရက်နေ့အတွင်း ဈေးကွက်သို့ ဖြန့်ဖြူးရမည်ဖြစ်ကြောင်း၊ ထို့အပြင် လုပ်ငန်းရှင်သည် တင်သွင်းပြီးသည့် ဆန်တန်ချိန်ပမာဏ၊ ဆန်သိုလှောင်ထားရှိမှုနှင့် ဈေးကွက်ဖြန့်ဖြူးမှု အခြေအနေတို့ကို ခရိုင်စားနပ်ရိက္ခာ ကြီးကြပ်ရေး အရာရှိထံ မပျက်မကွက် အစီရင်ခံတင်ပြရမည်ဖြစ်ကြောင်း၊ သွင်းကုန်လုပ်ငန်းရှင်သည် ဆက်စပ်လျက်ရှိသည့် တင်သွင်းခွင့်ပါမစ်ကို အသုံးပြုလျက် ခွဲတမ်းချထားပေးသည်ထက် ပိုမိုတင်သွင်းခြင်းကို လုပ်ဆောင်ခွင့်မရှိကြောင်း၊ တင်သွင်းလာသည့် ဆန်များအား အခြားမည်သည့် လုပ်ငန်းအဖွဲ့ အစည်းတစ်ရပ်ရပ်၏ အမည်အမှတ်တံဆိပ်အောက်တွင်မျှ ပြန်လည်ထုပ်ပိုးခြင်းမပြုပဲ မူလတင်သွင်းခဲ့သည့် ထုပ်ပိုးမှုပုံစံအတိုင်းသာ ဈေးကွက်အတွင်းသို့ ဖြန့်ဖြူးရောင်းချရမည်ဖြစ်ကြောင်း ဖော်ပြထားသည်။
ဘင်္ဂလားဒေ့ရှ်နိုင်ငံအနေဖြင့် နှစ်စဉ် ပြည်တွင်းစားသုံးမှုအတွက် ဆန်တန်ချိန် ၃၇ သန်းမှ ၃၉ သန်းအကြား လိုအပ်မှုရှိပြီး ပမာဏအများစုကို ပြည်တွင်းစိုက်ပျိုးထုတ်လုပ်မှုဖြင့်ပင် ဖြည့် ဆည်းပေးလျက်ရှိကြောင်း၊ ပြီးခဲ့သော ၂၀၂၃-၂၄ ဘဏ္ဍာနှစ်၌ ပြည်ပမှဆန်ကို ဝယ်ယူတင်သွင်းရခြင်း မရှိခဲ့ကြောင်း သိရှိရသည်။
Source: The Daily Star, 21 Nov 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)