နံနံပင်တွင် အမျှင်ဓာတ်ကြွယ်ဝစွာပါဝင်သည့်အပြင် သံဓာတ်၊ မဂ္ဂတီဆီယမ်၊ မဂ္ဂနီနှင့် ဗီတာမင်အေဘီစီတို့ပါဝင်ပါသည်။ မြန်မာဟင်းများတွင်သာမက မုန့်ဟင်းခါး၊ အသုပ်စုံတို့တွင်လည်း တွဲဖက်စားသောက်ကြသည်။ နံနံပင်အစေ့ကိုမစိုက်ခင် ရေတွင် (၂၄) နာရီကြာအောင်စိမ်ပြီးလျှင် ဆယ်၍စစ်ထားရသည်။ ရေမစိမ်မီ ဂုံနီအိတ်ပေါ်တွင်တင်၍ ပုလင်းဖြင့် နှစ်ခြမ်းကွဲသွားစေရန်အတွက် လှိမ့်ပေးရန်လိုအပ်ပါသည်။ စိုက်ပြီး (၇) ရက်/ (၁၀) ရက်အတွင်း အပင်ပေါက်လာပြီး (၄၅) ရက်အကြာမှစ၍ နုတ်ယူစားသုံးခြင်းနှင့် ရောင်းချခြင်းများပြုလုပ်နိုင်သည်။
နံနံပင်သည် ဆောင်းရာသီတွင် အထူးဖြစ်ထွန်းပြီး ကျန်ရာသီများတွင် ရှားပါးကာ ဈေးကြီးပေသည်။ ယခုလသည် နံနံပင်ဈေးကောင်းလျက်ရှိပြီး တစ်ပိဿာလျှင် (၇၀၀၀) ကျပ်ခန့်ရှိကြောင်းသိရပါသည်။
DOCA(ဧရာဝတီ)