မြန်မာ့ရိုးရာအစားအစာများတွင် ဘိန်းမုန့်သည် မြန်မာလူမျိုးတိုင်းလိုလို ကြိုက်နှစ်သက်ကြသော အစားအစာများထဲတွင် တစ်ခုအပါအဝင်ဖြစ်ပါသည်။ ဘိန်းမုန့်ကို နံနက်ခင်းစျေးများတွင် အများဆုံးတွေ့ရပါသည်။ ဘိန်းမုန့်ပြုလုပ်ရန်အတွက် ဆန်ကိုရေစိမ်ပြီး မုန့်ကြိတ်ဆုံဖြင့်ကြိတ်ရပါသည်။ ထို့နောက် ကြိတ်ထားသောမုန့်နှစ်ရည်ကို သကြား၊ ဆိုဒါတို့နှင့်ရောစပ်ပြီး သမအောင်မွှေပေးရပါသည်။ ဒယ်အိုးထဲတွင်ထည့်ပြီး မီးဖိုပေါ်တင်၍ နှမ်းနှင့်ခြစ်ထားသောအုန်းသီးများကိုဖြူးပြီး အဖုံးအုပ်ထားရပါသည်။ ဒယ်အိုးဖုံးပေါ်တွင်လည်း မီးဖြင့်အပူပေးရပါသည်။ အထက်မီး/အောက်မီးဖြင့်ဖုတ်ရပါသည်။
ပဲခူးမြို့တွင် ဘိန်းမုန့်ကို စျေးများတွင် ဆိုင်ဖွင့်၍ရောင်းချခြင်းများရှိသကဲ့သို့ ရပ်ကွက်များသို့ လှည့်လည်ရောင်းချခြင်းများလည်းရှိပါသည်။ ဘိန်းမုန့်တစ်ချပ်လျှင် ၇၀၀ကျပ်ဖြင့် ရောင်းချပါသည်။ ဘိန်းမုန့်ကို နံနက်ခင်း အဆာပြေအဖြစ်စားသုံးကြသကဲ့သို့ နေ့လယ်နေ့ခင်း ရေနွေးကြမ်းဖြင့်လည်းစားသုံးကြပါသည်။ ဘိန်းမုန့်သည် လူကြီးလူငယ်မရွေး ကြိုက်နှစ်သက်ကြသည့် အစားအစာတစ်ခုဖြစ်ကြောင်း ဘိန်းမုန့်ရောင်းချသူတစ်ဦးထံမှသိရှိရပါသည်။
DOCA(ပဲခူး)