ယခုနှစ်တွင် ဗီယက်နမ်သည် တူနာငါးတင်ပို့မှုမှတစ်ဆင့် အမေရိကန်ဒေါ်လာ တစ်ဘီလီယံ ရရှိနိုင်ပြီး ၂၀၂၃ ခုနှစ် တူညီသည့်ကာလထက် ၁၈ ရာခိုင်နှုန်းမြင့်တက်ရန် ခန့်မှန်းရကာ တူနာသည် ဗီယက်နမ်၏ အဓိကပင်လယ်စာပို့ကုန်များထဲတွင် အားကောင်းသည့်အခန်းကဏ္ဍတွင် ရှိနေကြောင်း သိရပါသည်။ ဗီယက်နမ်နိုင်ငံပင်လယ်စာတင်ပို့သူများနှင့် ထုတ်လုပ်သူများအသင်း၏ အဆိုအရ ယခုနှစ်၏ပထမဆယ်လတွင်နိုင်ငံသည် တူနာငါးတင်ပို့မှုမှတစ်ဆင့် အမေရိကန်ဒေါ်လာ ၈၂၁ သန်းရရှိခဲ့ပြီး ၂၀၂၃ ခုနှစ်တူညီသည့်ကာလထက် ၁၈ ရာခိုင်နှုန်း မြင့်တက်ခဲ့ကြောင်း သိရပါသည်။ အောက်တိုဘာလတစ်လတည်းတွင် အမေရိကန်ဒေါ်လာ ၉၃ သန်းတန်ဖိုးတင်ပို့ခဲ့ပြီး ၂၀၂၃ ခုနှစ်တူညီသည့်ကာလနှင့် နှိုင်းယှဉ်ပါက ၂၂ ရာခိုင်နှုန်း မြင့်တက်ခဲ့ ကြောင်းသိရပါသည်။ ထိုပမာဏသည် တူနာငါးလုပ်ငန်း၏ကိုဗစ် ၁၉ အလွန်ကာလ နာလံထူလာမှုနှင့် ကမ္ဘာ့ဝယ်လိုအား မြင့်တက်လာမှုကို ရောင်ပြန်ဟပ်ကြောင်း သိရပါသည်။ အမေရိကန် နှင့်ဥရောပသမဂ္ဂကဲ့သို့သော တင်ပို့နေကျဈေးကွက်များသည် ဆက်လက်အရေးပါနေပြီး စျေးကွက်သစ်များသည်လည်း အပေါင်းလက္ခဏာဆောင်သည့်ကြီးထွားမှု ပြသနေကြောင်း သိရပါသည်။ ဗီယက်နမ်၏တူနာ ထုတ်ကုန်များ အထူးသဖြင့်စည်သွပ်ကုန်ပစ္စည်းများသည် ဂျာမနီ၊ နယ်သာလန် နှင့် အီတလီ အစရှိသည့် နိုင်ငံများတွင် ယှဉ်ပြိုင်နိုင်စွမ်းရှိနေကြောင်း သိရပါသည်။ တူနာငါးတင်ပို့မှု အရှိန်မြှင့်တင်ရန် ဗီယက်နမ်သည် များစွာသောမူဝါဒများကို အကောင်အထည်ဖော်လျက်ရှိကြောင်း သိရပါသည်။ တူနာတင်ပို့သည့်လုပ်ငန်းများသည်လည်း ပစ္စည်းကိရိယာများ၊ ပြုပြင်ထုတ်လုပ်ခြင်းနှင့် ထုတ်လုပ်မှု တိုးတက်ရန်နည်းပညာတို့တွင် ရင်းနှီးမြှုပ်နှံနိုင်စွမ်းရှိရန် ဦးစားပေးအနေဖြင့် ချေးငွေရရှိလျက်ရှိကြောင်းသိရပါသည်။ ထို့ပြင်စက်မှုနှင့်ကုန်သွယ်ရေးဝန်ကြီးဌာနသည် နိုင်ငံတော် ကုန်သွယ်မှုမြှင့်တင်ရေးပရိုဂရမ်များဆောင်ရွက်ရန် အခြားအေဂျင်စီများနှင့် ပူးပေါင်းဆောင်ရွက်လျက်ရှိကြောင်း သိရပါသည်။ ထိုကနဦးဆောင်ရွက်မှုများသည် ပြည်တွင်းစီးပွားရေး လုပ်ငန်းများက ဗီယက်နမ်တူနာထုတ်ကုန်များအား နိုင်ငံတကာကုန်စည်ပြပွဲများတွင်ပြသကာ အလားအလာရှိသောဝယ်လက်များနှင့် ချိတ်ဆက်နိုင်ရန် ကူညီပေးနိုင်မည်ဖြစ်ကြောင်း သိရပါသည်။
Vietnam Plus
DOCA(ရန်ကုန်)