မလေးရှားနိုင်ငံ၌ ရေကြီးမှုကြောင့် စပါးအထွက်ထိခိုက်မှုအပေါ် ဆန်တင်သွင်း၍ ဖြေရှင်းမည်

     မလေးရှားနိုင်ငံတွင် ရေကြီးမှုများကြောင့် စပါးစိုက်ပျိုးရေးလုပ်ငန်းများ ထိခိုက်မှုဖြစ်ပေါ် ခဲ့ပြီးနောက် ဆန်ပြတ်လပ်မှုမရှိစေရေးအတွက် ဒီဇင်ဘာ ၁ ရက်နေ့မှ စတင်၍ ပြည်ပမှတင်သွင်း လာသော ဆန်ဖြူဈေးနှုန်းများကို လျှော့ချခြင်းဖြင့် ကိုင်တွယ်ဖြေရှင်းမည်ဖြစ်ကြောင်း သိရသည်။

     Kemubu Agricultural Development Authority (Kada) က အကောင်အထည်ဖော် ဆောင်ရွက်နေသော နိုင်ငံမြောက်ပိုင်း Kelantan ပြည်နယ်၊ Pasir Mas ခရိုင်သို့ ရေလွှမ်းမိုးမှု အခြေအနေအား သွားရောက်ကြည့်ရှုခဲ့ပြီးနောက် ဒီဇင်ဘာ ၁ ရက်နေ့၌ သတင်းထောက်များနှင့် တွေ့ဆုံရာတွင် စိုက်ပျိုးရေးနှင့် စားနပ်ရိက္ခာဖူလုံရေးဝန်ကြီး Datuk Seri Mohamad Sabu က ရေလွှမ်းမိုးမှုဒဏ်ကြောင့် စပါးစိုက်ပျိုးမှုမှာ အဆိုးရွားဆုံး ထိခိုက်ခဲ့ပြီး ဟင်းသီးဟင်းရွက် စိုက်ပျိုး ထုတ်လုပ်မှု၊ တိရစ္ဆာန်မွေးမြူရေးနှင့် ငါးမွေးမြူရေးလုပ်ငန်းများသည်လည်း ရှောင်လွှဲ၍မရသော ကုန်စည်ပြတ်လပ်မှုဖြစ်ပေါ်ခဲ့ကြောင်း၊ သို့ဖြစ်၍ ဆန်ပြတ်လပ်မှုများအတွက် ဈေးနှုန်းများကျဆင်း မှုရှိနေခဲ့သည့် တင်သွင်းလာသော ဆန်များနှင့် ဖြည့်ဆည်းပေးမည်ဖြစ်ကြောင်း၊ လက်ရှိအချိန်တွင် နိုင်ငံတကာဈေးကွက်၌ ဆန်ဈေးနှုန်း ကောင်းမွန်လျက်ရှိကြောင်း၊ ပြည်ပမှ တင်သွင်းသည့် ဆန် ၁ တန်လျှင် လက်ရှိကာလ၌ ရင်းဂစ်ငွေ ၂၈၀၀ ခန့်ရှိရာမှ ရင်းဂစ် ၃၂၀၀ မှ ၃၃၀၀ အတွင်းသို့ မြင့် တက်လာနိုင်ကြောင်း စသည်ဖြင့် ပြောကြားခဲ့သည်။

     ပြည်တွင်းဈေးကွက်၌ ဆန်လိုအပ်ချက်၏ ၆၁ ရာခိုင်နှုန်းကို ပြည်တွင်းထုတ်လုပ်မှုဖြင့် ဖြည့်ဆည်းရန် အစိုးရက ရည်မှန်းထားကြောင်း၊ သို့သော် ပြည်တွင်းဆန်ထုတ်လုပ်နိုင်စွမ်းသည် စျေးကွက်၏ ၅၆ ရာခိုင်နှုန်းဝန်းကျင်သာရှိသောကြောင့် ထိုကဲ့သို့ တင်သွင်းလာသည့်ဆန်များ၏ ဈေးနှုန်းအားလျှော့ချခြင်းသည် တောင်သူများအပေါ် ထိခိုက်လိမ့်မည်မဟုတ်ကြောင်း ဝန်ကြီး Mohamad က ပြောကြားခဲ့သည်။

     ၎င်း၏ပြောဆိုမှုအရ Kelantan ပြည်နယ်၌ ယခင်က စပါးစိုက်ရာသီနှစ်ကြိမ်တွင် ကာလ ရှည်ကြာစွာ မိုးခေါင်မှုနှင့် ကြုံတွေ့ရချိန်၌ မလေးရှားနိုင်ငံတွင် ဆန်ရောင်းလိုအားသည် ၄ ရာခိုင် နှုန်း လျော့ကျခဲ့ပြီး ယခုအကြိမ် ရေကြီးမှုသည် ပိုမိုဆိုးရွားမှုရှိနိုင်ကြောင်း၊ Kelantan ပြည်နယ်၌ စိုက်ပျိုးရေးထုတ်ကုန် ဆုံးရှုံးမှုများသည် ရင်းဂစ် ၁၆ သန်းအထိရှိပြီး ဆန်းစစ်မှု အပြီးသတ်ချိန် နောက်ပိုင်းတွင် ဆုံးရှုံးမှုပမာဏတိုးလာနိုင်ကြောင်း သိရှိရသည်။

Source: The Star, 01 Dec 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)