ဘေဂျင်းတွင် အင်ဆူလင်ထုတ်လုပ်မှု အခြေစိုက်စခန်းသစ်တစ်ခုတည်ထောင်ရန်အတွက် ပြင်သစ်ဆေးကုမ္ပဏီကြီး Sanofi မှ ယူရို ၁ ဘီလီယံ (အမေရိကန်ဒေါ်လာ ၁.၀၅ ဘီလီယံ နီးပါး) အား ရင်းနှီးမြှုပ်နှံသွားမည်ဖြစ်ကြောင်း Beijing Economic Technological Development Area (BDA) ၏ အဆိုအရ သိရသည်။ Sanofi ကုမ္ပဏီသည် ၂.၁၂.၂၀၂၄ ရက်နေ့တွင် မြို့တော်တောင်ပိုင်း Yizhuang ဧရိယာတွင် စက်ရုံတည်ဆောက်ရန်အတွက် ဘေဂျင်းမြူနီစီပယ်၊ စီးပွားရေးနှင့် သတင်းအချက်အလက်နည်းပညာဗျူရို၊ BDA အုပ်ချုပ်ရေးကော်မတီတို့နှင့် ပူးပေါင်းဆောင်ရွက်ရေးစာချွန်လွှာအား လက်မှတ်ရေးထိုးခဲ့သည်။ ၎င်းသည် တရုတ်နိုင်ငံအတွင်းရှိ Sanofi ကုမ္ပဏီ၏ စတုတ္ထမြောက် ထုတ်လုပ်မှုနှင့်ထောက်ပံ့ရေးအခြေစိုက်စခန်းဖြစ်ကာ တရုတ်နိုင်ငံအတွင်း ၎င်း၏အကြီးဆုံးတစ်ခုတည်းသော ရင်းနှီးမြှုပ်နှံမှုကိုလည်း ကိုယ်စားပြုသည်။ အလိုအလျောက် ထုတ်လုပ်မှုနည်းပညာများ၊ ခေတ်မီဒစ်ဂျစ်တယ်ပေါင်းစပ်စီမံခန့်ခွဲမှုစနစ်များနှင့် ရေရှည်တည်တံ့ခိုင်မြဲသော ဝန်းကျင်စံနှုန်းများပါဝင်သော ထုတ်လုပ်မှုအခြေခံအသစ်သည် ကုမ္ပဏီထောက်ပံ့ရေးကွင်းဆက်ကို ခံနိုင်ရည်ရှိမှုနှင့် ဆီးချိုဝေဒနာရှင်များ၏ ကြီးထွားလာနေသောလိုအပ်ချက်များကို ထိရောက်စွာဖြေရှင်းနိုင်မည်ဖြစ်ကြောင်း Sanofi မှ အမှုဆောင် အရာရှိချုပ် Paul Hudson မှ မှတ်ချက်ပြုခဲ့သည်။ Sanofi ကုမ္ပဏီသည် ပါရီတွင် ရုံးချုပ်တည်ရှိပြီး ၎င်း၏ရုံးခွဲကို ၁၉၈၂ ခုနှစ်တွင် စတင်တည်ထောင်ပြီးကတည်းက တရုတ်နိုင်သို့ ဝင်ရောက်လာခဲ့ခြင်းဖြစ်သည်။ ၁၉၉၅ ခုနှစ်တွင်တည်ဆောက်ခဲ့သော BDA ရှိ ပထမဆုံး ထုတ်လုပ်မှုအခြေစိုက်စခန်းသည် အာရှ-ပစိဖိတ်ဒေသရှိ Sanofi ၏ အကြီးဆုံး အင်ဆူလင်ထိုးဆေးထုတ်လုပ်သည့်နေရာဖြစ်လာခဲ့ပြီး ဆီးချိုရောဂါ၊ နှလုံးသွေးကြောကျန်းမာရေးနှင့် ကင်ဆာရောဂါကဲ့သို့သော ရောဂါကုသရေးနယ်ပယ်များကို ဝန်ဆောင်မှုပေးလျက်ရှိကြောင်း သိရှိရပါသည်။
Source : Xinhua
DOCA(ရန်ကုန်)