အိန္ဒိယနိုင်ငံတွင် ကုလားပဲ၏နေရာ၌ အဓိက အစားထိုးသုံးစွဲနိုင်သော စားတော်ပဲအား အကောက်ခွန်ကင်းလွတ်ခွင့်ဖြင့် တင်သွင်းခွင့်ပြုသည့် ကာလကို ဒီဇင်ဘာ ၂၄ ရက်နေ့တွင် နောက် ထပ် သက်တမ်း ၂ လ တိုးမြှင့်လျက် ၂၀၂၅ ခုနှစ် ဖေဖော်ဝါရီလကုန်အထိ အစိုးရက ခွင့်ပြုပေးခဲ့ ကြောင်း Financial Express သတင်းဌာနက ဖော်ပြပါသည်။
ပြည်တွင်းစိုက်ပျိုးထုတ်လုပ်မှုကို တွန်းအားပေးရန်အတွက် စားတော်ပဲတင်သွင်းမှုအပေါ် သွင်းကုန်အခွန် ၅၀ ရာခိုင်နှုန်း ကောက်ခံခြင်းကို ၂၀၁၇ ခုနှစ်မှ စတင်စည်းကြပ်ခဲ့ရာမှ ၂၀၂၃ ခုနှစ် ဒီဇင်ဘာလ၌ အခွန်ကင်းလွတ်လျက် တင်သွင်းခြင်းကို အိန္ဒိယအစိုးရက ကာလသတ်မှတ်ချက်ဖြင့် ခွင့်ပြုပေးထားခြင်းဖြစ်သည်။
အိန္ဒိယ ပြည်ပကုန်သွယ်ရေးညွှန်ကြားမှုဦးစီးဌာန၏ အမိန့်ကြော်ငြာစာ၌ စားတော်ပဲအား အနိမ့်ဆုံးသွင်းကုန်ဈေးနှုန်း သတ်မှတ်ချက်နှင့် တင်သွင်းရောက်ရှိရမည့် ဆိပ်ကမ်းနေရာ သတ် မှတ်ချက်များ မရှိပဲ အင်တာနက်ကွန်ယက် သွင်းကုန်စောင့်ကြည့်ကြပ်မတ်မှုစနစ် အောက်တွင် မှတ်ပုံတင်ထားသည့်အတိုင်း ၂၀၂၅ ခုနှစ် ဖေဖော်ဝါရီလ ၂၈ ရက်နေ့အထိ အခွန်ကင်းလွတ်လျက် တင်သွင်းခွင့်ပြုလိုက်ကြောင်း ဖော်ပြခဲ့သည်။
ပြည်တွင်း၌ ရောင်းလိုအားကို ကောင်းမွန်စေရေးအတွက် စားတော်ပဲတန်ချိန် ၂.၃ သန်းခန့် ကို တင်သွင်းထားပြီးဖြစ်ကြောင်း၊ ပြည်တွင်းပဲမျိုးစုံ ထုတ်လုပ်မှု၌ ၅၀ ရာခိုင်နှုန်းခန့် ဝေစုပါဝင် သော လက်ရှိစိုက်ပျိုးထားဆဲ ကုလားပဲစိုက်ခင်းများအား ရိတ်သိမ်းမှုသည် မတ်လကုန် သို့မဟုတ် ဧပြီလဆန်းတွင် စတင်မည်ဖြစ်ကြောင်း၊ ကုလားပဲများ ရိတ်သိမ်းထွက်ပေါ်ချိန်တွင် စားတော်ပဲ အား အခွန်သက်သာခွင့်ဖြင့် တင်သွင်းခွင့်ပြုမည် မဟုတ်ကြောင်း၊ ယခုနှစ် ကုလားပဲစိုက်ပျိုးမှု ဧရိယာသည် ဟက်တာ ၈.၆ သန်းရှိပြီး ယခင်နှစ်ကထက် ၂ ရာခိုင်နှုန်း ပိုမိုလာကြောင်းဖြင့် အစိုးရ ဌာနဆိုင်ရာ အရာရှိများက ပြောကြားခဲ့ကြသည်။
အိန္ဒိယနိုင်ငံ၌ ကုလားပဲ လက်လီဈေးနှုန်းများဖောင်းပွမှုမှာ ၂၀၂၃ ခုနှစ် အောက်တိုဘာလမှ
စတင်၍ ကိန်းဂဏန်း ၂ လုံးအထိ မြင့်တက်လာခဲ့ပြီး ၂၀၂၄ ခုနှစ် နိုဝင်ဘာလတွင် ၁ နှစ်တာကာလ အတွင်း ဈေးနှုန်းမြင့်တက်မှုမှာ ၂၀.၁၂ ရာခိုင်နှုန်းရှိခဲ့သည်။ သို့သော် ပဲမျိုးစုံအုပ်စု၏ လက်လီဈေး နှုန်းဖောင်းပွမှုမှာ ဩဂုတ်လ၌ ၁၁.၃ ရာခိုင်နှုန်းရှိရာမှ နိုဝင်ဘာလတွင် ၅.၄၁ ရာခိုင်နှုန်းသို့ လျော့ ကျလာခဲ့သည်။ အဓိက စားသုံးသော ကုလားပဲ၊ ပဲစင်းငုံနှင့် မတ်ပဲတို့ အထွက်ကျဆင်းမှုကြောင့် ပဲမျိုးစုံ လက်လီဈေးနှုန်းဖောင်းပွမှုမှာ ၂၀၂၃ ခုနှစ် ဇွန်လမှစ၍ ကိန်းဂဏန်း ၂ လုံးအဆင့်တွင် ရောက်ရှိနေခဲ့ခြင်းဖြစ်သည်။
အိန္ဒိယ စားသုံးသူရေးရာဦးစီးဌာနကမူ လက်ကားဈေးနှုန်းများမှာ ကျဆင်းလျက်ရှိသဖြင့် လက်လီရောင်းချသူများအနေဖြင့် ပဲမျိုးစုံ၏ ဈေးနှုန်းများကို လျှော့ချရန် တိုက်တွန်းနှိုးဆော်လျက် ရှိသည်။ လွန်ခဲ့သော ၂ လတာအတွင်း လက်ကားဈေးကွက်များ၌ ပဲစင်းငုံ၊ ပဲနီလေး၊ ကုလားပဲ၊ ပဲတီစိမ်း၊ စားတော်ပဲနှင့် မတ်ပဲတို့၏ ဈေးနှုန်းများသည် ၅ ရာခိုင်နှုန်းမှ ၂၀ ရာခိုင်နှုန်းအတွင်း ကျဆင်းမှုရှိခဲ့သော်လည်း ပဲမျိုးစုံ၏ လက်လီရောင်းဈေးနှုန်းများမှာမူ မြင့်မားနေဆဲရှိသည်ဟု အစိုးရအရာရှိများက ပြောဆိုကြသည်။
လက်ရှိကာလ၌ အစိုးရဝယ်ယူရေးအေဂျင်စီများဖြစ်သော NAFED နှင့် NCCF သမဝါယမ အသင်းများသည် ဈေးနှုန်းထောက်ပံ့မှုအစီအစဉ် (price support scheme) တွင် မှတ်ပုံတင်ထား သည့် တောင်သူဦးရေ ၁.၇ သန်းထံမှ ပဲစင်းငုံများကို အနိမ့်ဆုံး အထောက်အပံ့ပြု အခြေခံရည်ညွှန်း ဈေးနှုန်းဖြင့် ဝယ်ယူရန် စီစဉ်လျက်ရှိကြောင်း သိရှိရသည်။
Source: Financial Express, 25 Dec 2024