ကမ္ဘောဒီးယားနိုင်ငံ၏ အထည်ချုပ်၊ ဖိနပ်နှင့် ခရီးသွားကုန်ပစ္စည်း (GFT) တင်ပို့မှုသည် ယခုနှစ် ပထမ (၁၁) လအတွင်း ၂၅.၂၃ ရာခိုင်နှုန်းတိုးတက်လာပြီး နိုင်ငံဝင်ငွေ ဒေါ်လာ ၁၂.၅၁ ဘီလီယံရရှိခဲ့ကြောင်း အကောက်ခွန်ဦးစီးဌာန၏ ကုန်သွယ်မှုအချက်အလက်များအရသိရသည်။ ကမ္ဘောဒီးယားနိုင်ငံ၏ ၂၀၂၄ ခုနှစ်၊ ဇန်နဝါရီလမှ နိုဝင်ဘာလအထိ စုစုပေါင်းနိုင်ငံခြားဝင်ငွေ၏ ၅၂.၃ ရာခိုင်နှုန်းသည် GFT ကုန်ပစ္စည်းတင်ပို့မှုမှရရှိခဲ့သည်။ အထည်လိပ်၊ အဝတ်အထည်၊ ဖိနပ်နှင့် ခရီးသွားကုန်ပစ္စည်းအသင်း (TAFTAC) ၏ အထွေထွေအတွင်းရေးမှူး Ken Loo က လက်ရှိ GFT ကုန်ပစ္စည်းတင်ပို့မှုနှင့်ပတ်သက်၍ ၂၀၂၅ ခုနှစ်တွင် ဆက်လက်တိုးတက် လာမည်ဟုယုံကြည်ကြောင်း၊ ကမ္ဘာလုံးဆိုင်ရာဝယ်လိုအားပြန်လည်ဦးမော့လာမှုသည် GFT ပို့ကုန်တင်ပို့မှုအရှိန်အဟုန်ကို အထောက်အကူဖြစ်စေပြီး ကမ္ဘောဒီးယားရှိ မြန်မာ၊ တရုတ် ကဲ့သို့သော နိုင်ငံခြားရင်းနှီးမြှုပ်နှံသူများအတွက်အထောက်အပံ့ဖြစ်ခဲ့ကြောင်း ပြောကြားခဲ့သည်။ နိုင်ငံတော်အတွက် အကြီးမားဆုံးပို့ကုန်ဝင်ငွေဖြစ်သည့် GFT ကဏ္ဍသည် ၂၀၂၂ ခုနှစ်၊ နှစ်လယ်မှ ၂၀၂၃ ခုနှစ်၊ နှစ်ကုန်အထိ ၁၈ လနီးပါးအဆက်မပြတ်ကျဆင်းလာပြီးနောက် ၂၀၂၄ ခုနှစ်တွင် ပြန်လည်ဦးမော့လာခဲ့သည်။ လက်တလောထုတ်ပြန်ထားသည့် ကုန်သွယ်မှုအချက်အလက်များ အရ GFT ကဏ္ဍလက်အောက်ရှိ ကဏ္ဍအားလုံးသည် ယခုနှစ် ဇန်နဝါရီလမှ နိုဝင်ဘာလအတွင်း ကောင်းမွန်စွာဆောင်ရွက်နိုင်ခဲ့ပြီး ယခင်နှစ်အလားတူကာလနှင့်နှိုင်းယှဉ်ပါက ပို့ကုန်များတိုးမြင့် လာခဲ့သည်။ GFT ကဏ္ဍသည် နိုင်ငံအတွင်း အကြီးမားဆုံးအလုပ်အကိုင်ဖန်တီးပေးသည် လုပ်ငန်းတစ်ခုဖြစ်ပြီး အလုပ်အကိုင်ပေါင်းတစ်သန်းနီးပါးဖန်တီးပေးခဲ့ကြောင်း အပြည်ပြည်ဆိုင်ရာ အလုပ်သမားရေးရာအဖွဲ့ချုပ် (ILO) မှ ထုတ်ပြန်ထားသည်။
Source: Khmer Times
DOCA(ရန်ကုန်)