အဓိကဈေးကွက်များတွင် တင်ပို့မှု နှစ်ဆကြီးထွားမှုနှင့်အတူ ၂၀၂၄ ခုနှစ်တွင် ဗီယက်နမ်သည် ပုဇွန်တင်ပို့မှုမှတစ်ဆင့် အမေရိကန်ဒေါ်လာ ၄ ဘီလီယံရရှိရန်ခန့်မှန်းရကြောင်း လုပ်ငန်း၏ အတွင်းလူများအဆိုအရ သိရပါသည်။ ထိုပမာဏသည် ၂၀၂၂ ခုနှစ်တွင် ရရှိခဲ့သည့်စံချိန် အမေရိကန်ဒေါ်လာ ၄.၃ ဘီလီယံထက်လျော့နည်းသော်လည်း ၂၀၂၃ ခုနှစ်တွင်ရရှိခဲ့သည့် အမေရိကန်ဒေါ်လာ ၃.၄ ဘီလီယံနှင့်နှိုင်းယှဉ်ပါက အားကောင်းသည့် နာလံထူနိုင်မှုကို ပြသနေကြောင်း သိရပါသည်။ ဗီယက်နမ်သည် ၂၀၂၄ ခုနှစ်၏ပထမ ၁၁ လတွင် ပုဇွန်တင်ပို့မှုမှ တစ်ဆင့် အမေရိကန်ဒေါ်လာ ၃.၆ ဘီလီယံရရှိခဲ့ပြီး ၂၀၂၃ တူညီသည့်ကာလထက် ၂၂ ရာခိုင်နှုန်း မြင့်တက်ခဲ့ကြောင်း သိရပါသည်။ အမေရိကန်နှင့်ဥရောပ သမဂ္ဂသို့တင်ပို့မှုသည် တည်ငြိမ်စွာ ကြီးထွားခဲ့ပြီး တရုတ်နိုင်ငံ၏ပြည်တွင်းစားသုံးမှုကို လှုံ့ဆော်သည့် လတ်တလောမူဝါဒများကလည်း ဗီယက်နမ်ပုဇွန်ဝယ်လိုအားကို မောင်းနှင်ပေးနိုင်ကြောင်း သိရပါသည်။ ပုဇွန်တင်ပို့သည့် ဈေးနှုန်းများ အတက်ဖက် ရောက်လာခြင်းနှင့်အတူ တန်ဖိုးမြင့်ထုတ်ကုန်များဖြစ်သည့် ပုဇွန် ပြုပြင်ထုတ်လုပ်သည့် ကဏ္ဍသည်လည်း လျှင်မြန်စွာကြီးထွားလျက်ရှိကြောင်း သိရပါသည်။ သို့သော် ဗီယက်နမ်ပုဇွန်လုပ်ငန်းသည် တည်ငြိမ်စွာကြီးထွားမှုသေချာစေရေးအတွက် ဖြေရှင်းရန် လိုအပ်သည့် သိသာထင်ရှားသည့်စိန်ခေါ်မှုများနှင့်ရင်ဆိုင်နေရကြောင်း သိရပါသည်။ ငါးလုပ်ငန်း ဦးစီးဌာန၏ ညွှန်ကြားရေးမှူးဖြစ်သူ Tan Dinh Luan က နိုင်ငံတကာဈေးကွက်များတွင် ယှဉ်ပြိုင်နိုင်ရန် ဗီယက်နမ်သည် ပုဇွန်အရည်အသွေးတိုးမြှင့်ရန်နှင့် ထုတ်လုပ်မှုကုန်ကျစရိတ် လျှော့ချရန်လိုအပ်ကြောင်း သိရပါသည်။ အဓိကအကြောင်းအရာများတွင် ပုဇွန်အသားပြား အရည်အသွေးမြှင့်တင်ချင်း၊ သားဖောက်မှုပုံစံစီမံခန့်ခွဲခြင်း၊ ရောဂါထိမ်းချုပ်ခြင်း၊ ထုတ်လုပ်မှု ကုန်ကျစရိတ်လျှော့ချခြင်းနှင့် တင်သွင်းသည့်ဈေးကွက်များ၏စားသုံးမှုပုံစံကို တိကျစွာ ခန့်မှန်းခြင်းတို့ပါဝင်ကြောင်း သိရပါသည်။ ထိုစိန်ခေါ်မှုများကိုဖြေရှင်းခြင်းသည် ပုဇွန်တန်ဖိုး ကွင်းဆက်တိုးတက်ခြင်းနှင့် မွေးမြူရေးသမားများ၏ဝင်ငွေများကို အရှိန်မြှင့်တင်ပေးရာတွင် အလွန်အရေးပါကြောင်း သိရပါသည်။ သဘာဝပတ်ဝန်းကျင်၊ ရောဂါနှင့် ထုတ်လုပ်မှုတို့တွင် စိန်ခေါ်မှုများရှိနေသော်လည်း ဗီယက်နမ်ပုဇွန်စီးပွားရေးလုပ်ငန်းများသည် အခြေခံအဆောက်အအုံများ တိုးတက်စေခြင်းနှင့် နည်းပညာသစ်များအသုံးပြုခြင်းစသည့် များစွာသောဆန်းသစ် တီထွင်မှုများကို အစပျိုးဆောင်ရွက်လျက်ရှိကြောင်း Luan ကပြောကြားခဲ့ပါသည်။ ထိုကြိုးပမ်း အားထုတ်မှုများသည် ကာဗွန်ထုတ်လွှင့်မှုလျှောချခြင်း၊ တန်ဖိုးကွင်းဆက်တိုးချဲ့ခြင်းနှင့် မွေးမြူရေးသမားများနှင့် စီးပွားရေးလုပ်ငန်းရှင်များအတွက် အကျိုးအမြတ်ရရှိမှုမြှင့် တက်စေခြင်းတို့အတွက် ကူညီပေးလျက်ရှိကြောင်း သိရပါသည်။
Vietnam Plus
DOCA(ရန်ကုန်)