၂၀၂၂ခုနှစ် မတ်လ ၁၃ ရက်နေ့၊ နံနက် (၉:၃၀)နာရီအချိန်တွင် စားသုံးသူရေးရာဦးစီးဌာန၊ မော်လမြိုင်ခရိုင်ရုံး၊ မော်လမြိုင်မြို့နယ်တာဝန်ခံ ဦးအောင်ကိုကို၊ ပြည်နယ်ဦးစီးမှူးရုံးမှ ဒုတိယ ဦးစီးမှူးဒေါ်ခင်ကြည်တို့မှ မော်လမြိုင်မြို့ ပြန်ကြားရေးနှင့်ပြည်သူ့ဆက်ဆံရေးဦးစီးဌာနရုံးတွင် စားသုံးသူကာကွယ်ရေးအသိပညာပေး (Talk Show) ကျင်းပပြုလုပ်ခဲ့ကြောင်း သိရပါသည်။
စားသုံးသူများအတွက် စားသုံးသူကိစ္စရပ်များအသိပညာပေးခြင်းကို ကျယ်ကျယ်ပြန့်ပြန့် သိရှိစေရန် ရည်ရွယ်၍ ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် စားသုံးသူရေးရာဦးစီးဌာနတို့ ပူးပေါင်းဆောင်ရွက်သည့် စားသုံးသူကာကွယ်ရေး အသိပညာပေးဆွေးနွေးပွဲဖြစ်ကြောင်း၊ အဆိုပါ Talk Showတွင် ဒုတိယဦးစီးမှူးဒေါ်ခင်ကြည်က ဆွေးနွေးခဲ့ရာ စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များ၊ ကုန်စည်နှင့်ဝန်ဆောင်မှုကို စားသုံးသူများရယူရာတွင် စားသုံးသူကာကွယ်ရေးဥပဒေ ၂၀၁၉ ပြဌာန်းချက်နှင့်အညီ စားသုံးသူတို့၏အခွင့်အရေးတို့ကို ရယူအသုံးပြုမည့်ကို လည်းကောင်း၊ ၂၀၂၂ခုနှစ်၊ မတ်လ၁၅ရက်နေ့၏ ကမ္ဘာ့စားသုံးသူအခွင့်အရေးများနေ့ ဆောင်ပုဒ် “ညီညွှတ်မျှတဒီဂျစ်တယ်ငွေကြေးကဏ္ဍ” သတ်မှတ်ထုတ်ပြန်ချက်နှင့်အညီ စားသုံးသူများအား မျှတမှုရှိသည့် ဒီဂျစ်တယ်ငွေကြေးဝန်ဆောင်မှုကို ရယူအသုံးပြုနိုင်စေရေးနှင့် စားသုံးသူများ၏ ပုဂ္ဂိုလ်ရေးဆိုင်ရာအချက်အလက်များလုံခြုံစေရန် (၁) စားသုံးသူများ၏ ဘဏ်အကောင့် အချက်အလက်များ၊ Debit/ Creditကတ်၊ ဘဏ်ကတ်နံပါတ်များနှင့် ဒီဂျစ်တယ် ငွေလွှဲဝန်ဆောင်မှု လုပ်ငန်းများ၏ ငွေလွှဲအချက်အလက်များဖြစ်သော လုပ်ငန်းစဉ်နံပါတ်၊ လျှို့ဝှက်နံပါတ်၊ OTP နှင့် PIN တို့ကို မည့်သူတစ်ဦးတစ်ယောက်ကိုမှ မျှဝေခြင်းမပြုရန်၊ (၂) စားသုံးသူရေးရာဦးစီးဌာနသို့ ငွေကြေးဝန်ဆောင်မှုနှင့် ပတ်သက်သည့်တိုင်ကြားမှုအများစုတွင် ငွေလွှဲသူမှ ငွေလက်ခံသူသို့ ငွေကြေးလွှဲပြောင်းပေးပြီးနောက် ငွေလက်ခံမည့်သူက ထုတ်ယူခြင်း မပြုမီ လိမ်လည်သူများက ထုတ်ယူခဲ့သည့်တိုင်ကြားမှု ဖြစ်စဉ်များရှိသည့်အတွက် စားသုံးသူများအနေဖြင့် ငွေလွှဲသည့်အခါ လျှို့ဝှက်နံပါတ်(၆)လုံးကို ခန့်မှန်းရလွယ်ကူသည့်နံပါတ်များ အသုံးမပြု စေရန်၊ (၃) ကိုယ်ရေးအချက်အလက်များ၊ ငွေလွှဲအချက်အလက်များ ဖြစ်သောလုပ်ငန်းစဉ်နံပါတ်၊ လျှို့ဝှက်နံပါတ်၊ OTP နှင့် PIN တို့ကို လိမ်လည်သူများက အသုံးချနိုင်သည့်အတွက် လူမှုကွန်ရက်များပေါ်တွင် အသိပေးတင်ပြခြင်းမပြုရန်၊ (၄) ဒီဂျစ်တယ်စနစ်ဖြင့် အသုံးပြုသော ဘဏ်လုပ်ငန်းနှင့် ငွေလွှဲဝန်ဆောင်မှုလုပ်ငန်းတို့၏ Call Center နှင့် အပြာရောင်အမှန်ခြစ် (Blue Mark) ရရှိထားသည့် Facebook Page တွင်သာ မိမိသိရှိလိုသည့်အကြောင်းအရာများကို ဆက်သွယ်မေးမြန်းရန်၊ (၅) ဘဏ်လုပ်ငန်း သို့မဟုတ် ငွေလွှဲဝန်ဆောင်မှုလုပ်ငန်းတို့၏ ဝန်ထမ်းအဖြစ်ဟန်ဆောင်၍ အခြားဖုန်းနံပါတ်များဖြင့်ခေါ်ဆိုလာပါက ကိုယ်ရေးအချက်အလက်များ ငွေလွှဲအချက်အလက်များတို့ကို သတိထားဆောင်ရွက်စေလိုကြောင်းစသည့်တို့ကို စားသုံးသူကာကွယ်ရေးအသိပညာပေး Talk Show တွင် ဆွေးနွေးခဲ့ကြောင်း သတင်းရရှိပါသည်။
DOCA(မွန်)