ဂျပန်နိုင်ငံ၏နာမည်ကျော်ကားကုမ္မဏီကြီးများဖြစ်သည့် Honda နှင့် Nissan တို့ပူးပေါင်းပြီး ကမ္ဘာ့တတိယအကြီးမားဆုံးမော်တော်ယာဉ်လုပ်ငန်းစုထူထောင်မည်ဟု ဒီဇင်ဘာလ ၂၃ ရက်နေ့က သတင်းစာရှင်းလင်းပွဲပြုလုပ်ကာကြေညာခဲ့ကြောင်းသိရပါသည်။ ဆွေးနွေးမှုများကို ၂၀၂၅ ခုနှစ် ဇွန်လတွင် အပြီးသတ်ကာ ၂၀၂၆ ခုနှစ် သြဂုတ်လတွင် လုပ်ငန်းစုထူထောင်ရန် ရည်ရွယ် ထားကြောင်းသိရပါသည်။ ကုမ္မဏီနှစ်ခုပေါင်းအမေရိကန်ဒေါ်လာ ၁၉၁ ဘီလီယံတန်ဖိုးရောင်းချကာ အမြတ်ငွေအမေရိကန်ဒေါ်လာ ၁၉ ဘီလီယံရရှိရန်မျှော်မှန်းထားကြောင်း ထုတ်ပြန်ချက်တွင် ပြောကြားထားသည်ဟုသိရပါသည်။ ထိုသို့ပူးတွဲလုပ်ငန်းစုထူထောင်ပြီးပါက မော်တော်ယာဉ် ရောင်းချရမှုတွင် Toyota နှင့် Volkswagen တို့နောက် ကမ္ဘာ့တတိယအကြီးဆုံးလုပ်ငန်းစု ဖြစ်လာမည်ဟုသိရပါသည်။ လတ်တလောတတိယအကြီးမားဆုံး မော်တော်ယာဉ်လုပ်ငန်းစုမှာ တောင်ကိုရီးယားနိုင်ငံ၏ Hyundai နှင့် Kia တို့ဖြစ်ကြောင်းသိရပါသည်။ Toyota ၏နောက် ဂျပန်၏ဒုတိယအကြီးမားဆုံးကားကုမ္မဏီဖြစ်သည့် Honda သည် ဈေးကွက်တန်ဖိုး အမေရိကန် ဒေါ်လာ ၄၄ ဘီလီယံခန့်ရှိပြီး တတိယအကြီးမားဆုံးဖြစ်သည့် Nissan မှာ ဈေးကွက်တန်ဖိုး အမေရိကန်ဒေါ်လာ ၁၀ ဘီလီယံခန့်ရှိကြောင်းသိရပါသည်။ ထိုပူးပေါင်းဆောင်ရွက်မှုတွင် Nissan ၏မိတ်ဖက်ကုမ္ပဏီဖြစ်သည့် Mitsubishi ကားကုမ္မဏီလည်းပါဝင်မည်ဟုသိရပါသည်။ ထို့ကြောင့် Honda၊ Nissanနှင့် Mitsubishi ကုမ္မဏီသုံးခုပေါင်းကားအစီးရေ ၈ သန်းကျော်ရှိလာမည်ဟု သိရပါသည်။ ဆွေးနွေးမှုများသည် BYD ပါဝင်သော တရုတ်ကားကုမ္မဏီများထံမှ ခက်ခဲသောဈေးကွက်ယှဉ်ပြိုင်မှုများနှင့် ကြုံတွေ့ပြီးနောက် စတင်ခဲ့ခြင်းဖြစ်ကြောင်းသိရပါသည်။ နှစ်ဖက် ကုမ္မဏီများမှ ဘုတ်အဖွဲ့ဝင်များ၏အစည်းအဝေးများအပြီး သဘောတူညီမှုရရှိခဲ့ခြင်းဖြစ်ပြီး လုပ်ငန်းစုတည်ထောင်ပြီးပါက ဘုတ်အဖွဲ့ဝင်အများစုကို Honda ကခန့်အပ်မည်ဟုသိရှိရပါသည်။
REUTERS
DOCA(ရန်ကုန်)