စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် စားသုံးသူကာကွယ်ရေးလုပ်ငန်းများ ထိရောက်စွာဆောင်ရွက်နိုင်ရေးအတွက် စားသုံးသူကာကွယ်ရေးဥပဒေပုဒ်မ ၁၃ပုဒ်မခွဲ(က)(၄)အရ စစ်ဆေးရေးအရာရှိများခန့်အပ်တာဝန်ပေးခဲ့ပြီး စစ်ဆေးရေးအရာရှိများအနေဖြင့် ဈေးကွက်စောင့်ကြည့်စစ်ဆေးခြင်းအပါအဝင် ထုတ်ကုန်များ လုံခြုံစိတ်ချရမှုရှိစေရေးနှင့် စားသုံးသူ ကာကွယ်ရေးလုပ်ငန်းများကို ဥပဒေ၊ နည်းဥပဒေများ၊ အမိန့်ညွှန်ကြားချက်များနှင့်အညီ နည်းစနစ်ကျနစွာဆောင်ရွက်နိုင်ရန်အတွက် စစ်ဆေးရေးမှူးများ လုပ်ငန်းကျွမ်းကျင်မှုဆိုင်ရာ အလုပ်ရုံဆွေးနွေပွဲကို ၂၀၂၂ခုနှစ်၊ မေလ ၂၃ ရက်နေ့မှ ၂၇ ရက်နေ့အထိ ရုံးအမှတ် ၅၂ စားသုံးသူရေးရာ ဦးစီးဌာန နေပြည်တော်တွင် ကျင်းပပြုလုပ်သွားမည်ဖြစ်ကြောင်း သိရှိရပါသည်။
စစ်ဆေးရေးမှူးများ လုပ်ငန်းကျွမ်းကျင်မှုဆိုင်ရာ အလုပ်ရုံဆွေးနွေးပွဲ(၁/၂၀၂၂)ကို ၂၀၂၂ခုနှစ်၊ ဖေဖော်ဝါရီလတွင် ကျင်းပပြုလုပ်ခဲ့ပြီး ယခု (၂/၂၀၂၂) အလုပ်ရုံဆွေးနွေးပွဲ ကျင်းပသွားမည် ဖြစ်ပါသည်။ အဆိုပါအလုပ်ရုံဆွေးနွေးပွဲကို (၅)ရက်ကြာကျင်းပပြုလုပ်သွားမည်ဖြစ်ပြီး ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ ပဲခူးတိုင်းဒေသကြီး၊ စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ တနင်္သာရီတိုင်းဒေသကြီး၊ ကယားပြည်နယ်၊ ကရင်ပြည်နယ်၊ မွန်ပြည်နယ်၊ ရခိုင်ပြည်နယ်နှင့် ရှမ်းပြည်နယ်တို့မှ စစ်ဆေးရေးအရာရှိ (၄၈)ဦး တက်ရောက်မည်ဖြစ်ကြောင်း သတင်းရရှိသည်။ ဆက်လက်၍ အလုပ်ရုံ ဆွေးနွေးပွဲ တက်ရောက်ရန် ကျန်ရှိသည့် စစ်ဆေးရေးအရာရှိများကိုလည်း ယခုကဲ့သို့ အသုတ်လိုက်ခွဲ၍ အလုပ်ရုံဆွေးနွေးပွဲ ကျင်းပသွားမည်ဖြစ်ကြောင်း သတင်းရရှိပါသည်။
DOCA(စစ်ကိုင်း)