“ ကော့မှူးမြို့နယ်၌ ပြင်းထန်ဝမ်းပျက်ဝမ်းလျောရောဂါ ကြိုတင်ကာကွယ်ရေး အသိပညာပေးဟောပြောခြင်းနှင့် ကွင်းဆင်းစစ်ဆေးခြင်း ”

             ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်၌ မိခင်နှင့်ကလေးစောင့်ရှောက်ရေးအသင်းနှင့် ကျန်းမာရေးဦးစီးဌာနတို့ပူးပေါင်း၍ ဝမ်းပျက်ဝမ်းလျောမရှိစေရန် ကာကွယ်ရေး အသိပညာပေးဟောပြောပွဲကို ဇန်နဝါရီလ (၃)ရက်နေ့၊ နေ့လယ်(၁၁:၃၀)နာရီအချိန်တွင် ကော့မှူးမြို့နယ် အထွေထွေအုပ်ချုပ်ရေးဦးစီးဌာန အစည်းဝေးအခန်းမ၌ ကျင်းပခဲ့ကြောင်း သိရသည်။

              အဆိုပါအသိပညာပေးဟောပြောပွဲတွင် တွံတေးခရိုင် မိခင်နှင့်ကလေးစောင့်ရှောက်ရေး အသင်းဥက္ကဌ ဒေါ်ဇာဇာယမင်းဦးက အဖွင့်အမှာစကားပြောကြားပြီး မြို့နယ်ကျန်းမားရေးဦးစီးဌာနမှကျန်းမာရေးမှူး ဒေါ်သင်းသင်းအေးက ပြင်းထန်ဝမ်းပျက်ဝမ်းလျော ရောဂါလက္ခဏာများဖြစ်သည့် အရည်ဝမ်းသွားခြင်း၊ အော့အန်ခြင်း၊ ခန္ဓကိုယ်အတွင်းရေနှင့် ဓာတ်ဆားများလျင်မြန်စွာဆုံးရှုံး၍ အင်အားကုန်ခမ်းခြင်း၊ ကြွက်တက်ခြင်း၊ သတိလစ်ခြင်းနှင့် ပြင်းထန် ဝမ်းပျက်ဝမ်းလျောရောဂါ ကူးစက်နိုင်သည့်နည်းလမ်းများ၊ ပြင်းထန်ဝမ်းပျက်ဝမ်းလျော ရောဂါမဖြစ်ပွားစေရန် ကြိုတင်ကာကွယ်ရမည့်နည်းလမ်းများ၊ လိုက်နာရှောင်ကြဉ်ရမည့်အချက်များကို အကျယ်တဝင့်ရှင်းလင်း ပြောကြားခဲ့ကြောင်း သိရသည်။

            ထိုနောက်တွံတေးခရိုင် မိခင်နှင့်စောင့်ရှောက်ရေးအသင်းဥက္ကဌ ဒေါ်ဇာဇာယမင်းဦး၊ မြို့နယ် မိခင်နှင့်ကလေးစောင့်ရှောက်ရေးအသင်းဥက္ကဌ ဒေါ်မျိုးမျိုးထိုက်နှင့်အဖွဲ့ဝင်များ၊ မြို့နယ်ပြည်သူ့ကျန်းမာရေးဦးစီးဌာနမှ ကျန်းမာရေးမှူးဒေါ်သင်းသင်းအေးနှင့် ဆရာ/ ဆရာမများ၊ မြို့နယ်စည်ပင်သာယာရေးအဖွဲ့မှ မြို့မဈေးတာဝန်ခံဦးအေးသွင်နှင့် စားသုံးသူရေးရာဦးစီးဌာနမှ မြို့နယ်တာဝန်ခံတို့သည် စားသောက်ဆိုင်များ သန့်ရှင်းသပ်ရပ်စွာရောင်းချနေမှုရှိ/ မရှိ ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ရန်ကုန်)