စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံးက သမဝါယမနှင့် စီမံခန့်ခွဲမှုပညာတက္ကသိုလ်(သန်လျင်)တွင် စားသုံးသူကာကွယ်ရေးဆိုင်ရာ အသိပညာပေးဟောပြောသည့်ပွဲအခမ်းအနားကို ဇန်နဝါရီလ ၁၇ ရက်နေ့တွင် သန်လျင်မြို့နယ် သမဝါယမနှင့် စီမံခန့်ခွဲမှုပညာတက္ကသိုလ်၏ ဘက်စုံသုံးခန်းမတွင် ကျင်းပပြုလုပ်ခဲ့ပါသည်။ အခမ်းအနားကို စားသုံးသူရေးရာဦးစီးဌာန ရန်ကုန်တိုင်းဒေသကြီး ဦးစီးမှူး ဦးကျော်ကျော်လွင်နှင့်တကွ အရာထမ်းအမှုထမ်းများ၊ ဆရာဆရာမများနှင့် ကျောင်းသား/ ကျောင်းသူများ စုစုပေါင်း ၅၂၀ ဦးတက်ရောက်ခဲ့ကြပါသည်။ အခမ်းအနားစတင်ချိန်တွင် တက္ကသိုလ်၏ ဒုတိယပါမောက္ခချုပ်(သင်ကြား) ဖြစ်သူ ဒေါ်မြင့်မြင့်စိန်က အဖွင့်စကားပြောကြားခဲ့ပါသည်။ ထို့နောက်စားသုံးသူရေးရာဦးစီးဌာန ရန်ကုန်တိုင်းဒေသကြီးဦးစီးမှူး ဦးကျော်ကျော်လွင်မှ စီးပွားရေးနှင့်ကူးသန်းရောင်းဝယ်ရေးဌာနမိတ်ဆက်၊ စားသုံးသူရေးရာဦးစီးဌာန၏ ဆောင်ရွက်ချက်များ၊ ကမ္ဘာ့စားသုံးသူအခွင့်အရေးများနေ့ဖြစ်ပေါ်လာပုံနှင့် စားသုံးသူအခွင့်အရေး ၈ ချက်နှင့် ပတ်သတ်၍ ရှင်းလင်းပြောကြားခဲ့ပါသည်။ ဆက်လက်၍ စားသုံးသူရေးရာဦးစီးဌာန ရန်ကုန်တိုင်းဒေသကြီးဦးစီးမှူးရုံးမှ လက်ထောက်ညွှန်ကြားရေးမှူး ဒေါ်ဝါဝါခိုင်က စားသုံးသူအကာအကွယ်ပေးရေးဥပဒေ၊ စားသုံးသူလိုက်နာရမည့်တာဝန်များနှင့် တောင်းဆိုနိုင်သည့်အခွင့်အရေးများ၊ စားသုံးသူတိုင်ကြားရေးနှင့် ဖြေရှင်းရေးကဏ္ဍ၊ တိုင်ကြားနိုင်သည့်နည်းလမ်းများနှင့် အွန်လိုင်းစနစ်ဖြင့် ရောင်းချခြင်း၊ ဝယ်ယူခြင်းဆိုင်ရာ သိရှိသင့်သည့် ဆောင်ရန်ရှောင်ရန်အချက်များအား ပြောကြားခဲပါသည်။ ထို့နောက် အခမ်းအနားတက်ရောက်လာကြသူများက သိလိုသည်များကိုမေးမြန်းခဲ့ကြပြီး အခမ်းအနားအောင်မြင်စွာပြီးမြောက်ခဲ့ကြောင်း သိရှိရပါသည်။
DOCA(ရန်ကုန်)