ဆန်တင်သွင်းမှုအရှိန်မြှင့်တင်ရန် ဝယ်ယူရေးစည်းမျဉ်းများကို ဘင်္ဂလားဒေ့ရှ်အစိုးရ ဖြေလျှော့

          ဈေးကွက်အတွင်း ဈေးနှုန်းများအား ထိန်းသိမ်းနိုင်ရေးနှင့် နိုင်ငံတော်အရန်စားနပ်ရိက္ခာကို လျင်မြန်စွာ ဖြည့်တင်းနိုင်ရေး ကြိုးပမ်းအားထုတ်မှု၏ တစ်စိတ်တစ်ဒေသအဖြစ်  နိုင်ငံတကာ တင်ဒါများခေါ်ယူ၍ ပြည်ပမှ ဆန်တန်ချိန် ၃ သိန်း ဝယ်ယူတင်သွင်းခြင်းကို အရှိန်မြှင့်တင်နိုင်ရန် အတွက် အစိုးရဝယ်ယူရေးလုပ်ထုံးလုပ်နည်းများအား ဘင်္ဂလားဒေ့ရှ်အစိုးရက ပြင်ဆင်ဖြေလျှော့ခဲ့ ကြောင်း သိရှိရသည်။

          ဘင်္ဂလားဒေ့ရှ် အစိုးရအဖွဲ့၏ စီးပွားရေးရာကော်မတီနှင့် အစိုးရဝယ်ယူရေးကော်မတီတို့ သည် ဇန်နဝါရီ ၁၆ ရက်နေ့၌ အစည်းအဝေးများခေါ်ယူ ကျင်းပခဲ့ပြီး အစိုးရဝယ်ယူရေးနည်းဥပဒေ များ ၂၀၀၈ တွင် ပြဋ္ဌာန်းထားသည့် ကောက်ပဲသီးနှံများ ဝယ်ယူခြင်းကို ၁၅ ရက်အတွင်း ဆောင်ရွက် ရန် သတ်မှတ်ချက်အား ၄၂ ရက်သို့ ပြင်ဆင်ပြောင်းလဲရန် ဆုံးဖြတ်ခဲ့သည်။ ယခုကဲ့သို့ ပြင်ဆင်မှုက စားနပ်ရိက္ခာဝန်ကြီးဌာန၏ ဆန်တန်ချိန် ၃ သိန်း ဝယ်ယူမည့်အစီအစဉ်ကို အထောက်အကူပြုမည် ဖြစ်သည်။

          စားနပ်ရိက္ခာညွှန်ကြားမှုဦးစီးဌာနမှ အဆင်မြင့်အရာရှိတစ်ဦးက ဆန်ဝယ်ယူမှုကို ကာလတို အတွင်း လုပ်ကိုင်နေခဲ့ရသဖြင့် ယခုဖြေလျှော့မှုသည် လိုအပ်ချက်တစ်ခုအဖြစ်ရှိနေခဲ့ကြောင်း၊ ၎င်း တို့ ဦးစီးဌာနအနေဖြင့် ဆန်တန်ချိန် ၆ သိန်းကို နိုင်ငံတကာတင်ဒါခေါ်ယူ၍ ဝယ်ယူလိုကြောင်း၊ လက်ရှိကာလတွင် ဆန်တန်ချိန် ၃ သိန်းအတွက် တင်ဒါများဖိတ်ခေါ်ထားရှိပြီးဖြစ်ကြောင်း၊ ကျန်ရှိ သည့် တန်ချိန် ၃ သိန်းအတွက် ဝယ်ယူရေးလုပ်ထုံးလုပ်နည်းများ ပြင်ဆင်ပြီးချိန်တွင် ဆက်လက် တင်ဒါခေါ်ယူမည်ဖြစ်ကြောင်း ပြောဆိုခဲ့သည်။

          အစိုးရဝယ်ယူရေးကော်မတီသည် စားနပ်ရိက္ခာညွှန်ကြားမှုဦးစီးဌာန၏ ဘာစမာတီမဟုတ် သောဆန် တန်ချိန် ၅၀၀၀၀ အား နိုင်ငံတကာတင်ဒါခေါ်ယူ၍ တင်သွင်းမည့် အဆိုပြုချက်ကို လည်း အတည်ပြုခဲ့သည်။ ထိုကဲ့သို့ ဝယ်ယူမည့်ဆန်အတွက် ဈေးနှုန်းမှာ တစ်တန်လျှင် ၄၅၄.၁၄ ဒေါ်လာနှုန်းဖြစ်သည်။

          ထို့အပြင် သီးခြားအစည်းအဝေးတစ်ရပ်၌ အစိုးရချင်း သဘောတူညီမှု အစီအစဉ်အောက် တွင် ပါကစ္စတန်နိုင်ငံထံမှ ဆန်ဖြူတန်ချိန် ၅၀၀၀၀ ဝယ်ယူတင်သွင်းရန်ကိုလည်း ဘင်္ဂလားဒေ့ရှ် အစိုးရက ဆုံးဖြတ်ခဲ့သည်။ တရားဝင်စာရွက်စာတမ်းများအရ ၎င်းဆန်များကို တစ်တန်လျှင် ၄၉၉ ဒေါ်လာနှုန်းဖြင့် ဘင်္ဂလားဒေ့ရှ် စားနပ်ရိက္ခာညွှန်ကြားမှုဦးစီးဌာနက ပါကစ္စတန် ကုန်သွယ်ရေး ကော်ပိုရေးရှင်းထံမှ ဝယ်ယူမည်ဖြစ်ကြောင်း သိရှိရသည်။

          စားနပ်ရိက္ခာဝန်ကြီးဌာနသည် မြန်မာနိုင်ငံထံမှ ဆန်တန်ချိန် ၁ သိန်းကို ယခုလအတွင်း ဝယ်ယူတင်သွင်းရရှိရန် မျှော်မှန်းထားကြောင်း၊ ထို့အပြင် အိန္ဒိယနှင့် ဗီယက်နမ်တို့ထံမှ ဆန်တန် ချိန် ၁ သိန်းစီကိုလည်း ဝယ်ယူနိုင်ရေး ညှိနှိုင်းဆွေးနွေးလျက်ရှိကြောင်း အထက်ပါအရာရှိက ပြော ကြားခဲ့သည်။

          ယခုနှစ် ဇန်နဝါရီလ ၁၂ ရက်နေ့အထိ အစိုးရ၏ အရန်ရိက္ခာသိုလှောင်ထားရှိမှုမှာ ဆန် တန်ချိန် ၈.၂ သိန်းအပါအဝင် တန်ချိန်စုစုပေါင်း ၁၂.၂၅ သိန်းရှိကြောင်း၊ ယခင်နှစ်ကာလတူ၌ အရန် ရိက္ခာသိုလှောင်မှုမှာ တန်ချိန် ၁၆.၂၆ သိန်းရှိခဲ့ရာ တစ်နှစ်တာအတွင်း ၂၅ ရာခိုင်နှုန်းခန့် ကျဆင်းခဲ့ ခြင်းဖြစ်ကြောင်း၊ ဘင်္ဂလားဒေ့ရှ် ကုန်သွယ်ရေး ကော်ပိုရေးရှင်း၏ အချက်အလက်များအရ ဒါကာ မြို့တော်တွင် လက်လီဈေးကွက်၌ ဆန်ဈေးနှုန်းများသည် အရည်အသွေးပေါ်မူတည်၍ တစ်နှစ် တာအတွင်း ၉.၈ ရာခိုင်နှုန်းနှင့် ၁၅.၇ ရာခိုင်နှုန်းအကြား မြင့်တက်ခဲ့သည်ကို တွေ့ရှိရကြောင်းဖြင့် The Daily Star သတင်းဌာနက ဖော်ပြထားသည်။

 Source: The Daily Star, 16 Jan 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)