တောင်ငူမြို့တွင် ဆီလုပ်ငန်းရှင်များနှင့်တွေ့ဆုံဆွေးနွေး

           ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် မေလ ၁၉ ရက်နေ့ နံနက်ပိုင်းက ခရိုင်ဦးစီးမှူးရုံး အစည်းအဝေးခန်းမတွင် တောင်ငူမြို့ပေါ်ရှိ မြေပဲဆီ၊ ပဲစပ်ဆီထုတ်လုပ်သူများ၊ ဆီကုန်သည်များနှင့်တွေ့ဆုံ၍ စားသုံးသူကာကွယ်ရေးဆိုင်ရာ သိကောင်းစရာများနှင့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ညွှန်ကြားချက်အမှတ် ၁/၂၀၂၁ နှင့် ပြည်ပမှစားသုံးဆီများတင်သွင်းရာတွင် လိုက်နာဆောင်ရွက်ရမည့် ညွှန်ကြားချက်များနှင့်ပတ်သက်၍ ရှင်းလင်းဆွေးနွေးပါသည်။

            ခရိုင်ဦးစီးမှူးက စားသုံးသူကာကွယ်ရေးဆိုင်ရာ သိကောင်းစရာများကိုလည်းကောင်း၊ စားသုံးသူကာကွယ်ရေးဥပဒေပါ ကုန်အညွှန်းအမှတ်အသား ဖော်ပြခြင်းဆိုင်ရာများကိုလည်းကောင်း၊ မြန်မာနိုင်ငံ အစားအအသောက်နှင့်ဆေးဝါးအာဏာပိုင်အဖွဲမှ အမိန့်ကြော်ငြာစာအမှတ် ၅၂၄/၂၀၂၁ ဖြင့် အမှတ်တံဆိပ်ပါ ဘူးသွင်းသောက်ရေသန့်များနှင့် အမှတ်တံဆိပ်ပါ စားသုံးဆီများကို ထိန်းချုပ် အစားအသောက်အဖြစ်သတ်မှတ်ခြင်းများကိုလည်းကောင်း၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၏ ညွှန်ကြားချက်အမှတ် ၁/၂၀၂၁ အရ စားသုံးသူများ ထင်ယောင်ထင်မှား မဖြစ်စေရေး နှင့် အခြေခံလိုအပ်ချက်များပေါ်တွင် စိတ်ကျေနပ်မှုရှိစေရေးအတွက် သက်ဆိုင်ရာစီးပွားရေး လုပ်ငန်းရှင်များအနေဖြင့် ဈေးကွက်အတွင်း ဖြန့်ဖြူးရောင်းချသည့် ဟင်းသီးဟင်းရွက်ဆီများနှင့် စပ်လျဉ်း၍ ကုန်အညွှန်းအမှတ်အသားဖော်ပြရာတွင် လိုက်နာဆောင်ရွက်ရမည့် အချက်များကိုလည်းကောင်း၊ ပြည်ပမှတင်သွင်းလာသည့် စားအုန်းဆီများ သယ်ယူပို့ဆောင်ရာတွင် လိုက်နာဆောင်ရွက်ရမည့် ညွှန်ကြားချက်များကိုလည်းကောင်း အကျယ်တဝင့်ရှင်းလင်းပြောကြားပါသည်။

              ထို့နောက် တက်ရောက်လာကြသည့် ဆီကုန်သည်များ၊ ဆီလုပ်ငန်းရှင်များက သိရှိလိုသည်များကို မေးမြန်းရာ ခရိုင်ဦးစီးမှူးက ပြန်လည်ရှင်းလင်းဖြေကြားခဲ့ကြောင်းနှင့် တွေ့ဆုံပွဲသို့ ဆီကုန်သည်၊ ဆီလုပ်ငန်းရှင် ၁၆ ဦး တက်ရောက်ကြောင်း သိရပါသည်။

(DOCA)ပဲခူး