မကွေးတိုင်းဒေသကြီး၊ ပခုက္ကူခရိုင်၊ ရေစကြိုမြို့နယ်သည် ချင်းတွင်းမြစ်နှင့်ဧရာဝတီမြစ်တို့ ဆုံရာ မြို့နယ်တစ်ခုဖြစ်ပါသည်။ ရေစကြိုမြို့နယ်အတွင်း မြေခဲတောင်၊ ကိုင်းမကျီး၊ ပခန်းကြီး၊ မြေဖြူ၊ ဂွေးချို၊ စည်သာ၊ ဆင်ချောင်းကျေးရွာများမှာ ၂၀၂၄ခုနှစ်၊ ဇူလိုင်၊ ဩဂုတ်လများတွင် စိုက်ပျိုးခဲ့သည့်ဝါသီးနှံများ လှိုင်လှိုင်ထွက်ပေါ်သည့်အတွက် ဝါစိုက်တောင်သူသာမက ကျေးရွာနေ ပြည်သူများပါ ဝါစွတ်(ဝါကောက်) ရ၍ အလုပ်အကိုင်အခွင့်အလမ်းများ ရရှိနေကြောင်း ပခန်းကြီးကျေးရွာနေ ဝါစိုက်တောင်သူတစ်ဦးထံမှ သိရသည်။
ဝါသီးနှံများကို နှမ်း၊ မြေပဲ၊ ပဲတီစိမ်းသီးနှံခင်းများတွင် ကြားညှပ်နှင့် သီးသန့်စိုက်ပျိုးကြပြီး မျိုးများအနေဖြင့် ဒေသမျိုး၊ ငွေချည်-၉၊ ရွှေတောင်-၁၀၊ ချည်မျှင်ရှည်ဝါများကို စတင်စိုက်ပျိုး ကြကြောင်း၊ ၎င်းအနေဖြင့် ယခုနှစ်တွင် ဝါ(၇)ဧက စိုက်ပျိုးထားရှိကြောင်း၊ (၁)ဧကလျှင် မျိုးစေ့(၇) ပိဿာခန့် ကုန်ကျပြီး ထွန်ယက်ခ၊ မျိုး၊ စိုက် စရိတ်၊ သွင်းအားစု၊ ခူးဆွတ်ရိတ်သိမ်းခြင်းအပါအဝင် စုစုပေါင်း ကုန်ကျစရိတ်မှာ ကျပ်(၆)သိန်းခန့် ကုန်ကျကြောင်း၊ အထွက်နှုန်းအနေဖြင့် (၁)ဧကလျှင် ပိဿာချိန်(၂၅၀ မှ၃၅၀)ပိဿာခန့်ထွက်ရှိကြောင်း၊ ၂၀၂၅ခုနှစ်၊ ဇန်နဝါရီလ(စတုတ္ထပတ်)တွင် ဝါ(၁)ပိဿာလျှင် ကျပ်(၃၅၀၀ မှ ၄၀၀၀)ခန့် ပေါက်ဈေး ရှိကြောင်း အကျိုးအမြတ်အနေဖြင့် (၁)ဧကလျှင် ကျပ်(၅)သိန်း ခန့်ရရှိကြောင်း သိရသည်။
ယခုအချိန်တွင် ဝါသီးနှံများ လှိုင်လှိုင်ခူးစွတ်နေရကြောင်း၊ တစ်ရာသီလျှင် (၃)ကြိမ်ခန့် ဝါခူး စွတ်ကောက်ရကြောင်း၊ ဈေးကွက်အနေဖြင့် ပွဲစားများမှကျေးရွာထိ လာရောက်ဝယ်ယူကြကြောင်း၊ ထိုမှတစ်ဆင့် ပခုက္ကူမြို့နှင့် မန္တလေးမြို့များသို့ တင်ပို့ကြောင်း တောင်သူတစ်ဦးထံမှ သိရှိရပါသည်။
DOCA(မကွေး)