မလေးရှားနိုင်ငံ၌ စားအုန်းဆီ ထုတ်လုပ်မှု တသမတ်တည်းရှိနေစေရေးနှင့် ထုတ်လုပ်မှု ကဏ္ဍအပေါ် ဆိုးရွားစွာထိခိုက်မှုမဖြစ်စေရေးတို့အတွက် ဝန်ကြီးဌာနအနေဖြင့် ဆီအုန်းစိုက်ခင်း များတွင် လုပ်သားအင်အားလုံလောက်မှုရှိစေရန် အလေးထားဆောင်ရွက်လျက်ရှိသည်ဟု စိုက်ခင်း နှင့် ကုန်စည်များရေးရာ ဝန်ကြီး Mr. Johari Ghani က ဖေဖော်ဝါရီလ ၄ ရက်နေ့တွင် ပြောကြားခဲ့ ကြောင်း The Free Malaysia Today သတင်းဌာနက ဖော်ပြထားသည်။
ဆီအုန်းသီးများ ရင့်မှည့်ချိန်တွင် လုပ်သားရှားပါးမှုကြောင့် ရိတ်သိမ်းနိုင်ခြင်း မရှိပါက ထုတ် လုပ်မှုကို ထိခိုက်နိုင်ကြောင်း၊ ထို့အပြင် အစိုးရသည် လုပ်ကွက်ငယ် တောင်သူလယ်သမားများ အတွက် ဆီအုန်းအထွက်ပမာဏ တိုးတက်စေမည့် ကောင်းမွန်သော စိုက်ပျိုးရေးသုံးပစ္စည်းများ အား စနစ်တကျအသုံးပြုခြင်းနှင့် ကောင်းမွန်သော စိုက်ပျိုးရေးအလေ့အကျင့်ကောင်းများ (GAP) အား လိုက်နာကျင့်သုံးဆောင်ရွက်ခြင်းတို့ကို သေချာခိုင်မာအောင် အလေးထားဆောင်ရွက်လိမ့် မည်ဖြစ်ကြောင်း၊ သို့မှသာ ထုတ်လုပ်မှု ကုန်ကျစရိတ်ကိုလျှော့ချပြီး ကမ္ဘာ့ဈေးကွက်ဝယ်လိုအားကို မြှင့်တင်ပေးနိုင်မည်ဖြစ်ကြောင်း ဝန်ကြီး Johari က မလေးရှား လွှတ်တော်အစည်းအဝေး၏ အမေးအဖြေကဏ္ဍတွင် ပြောကြားခဲ့သည်။
စားအုန်းဆီ ဈေးနှုန်းကျဆင်းမှုကို ကိုင်တွယ်ဖြေရှင်းရန်နှင့် စပ်လျဉ်း၍ GPS-Selangau ပါတီမှ လွှတ်တော်အမတ် Mr. Edwin Banta ၏ မေးခွန်းကို ဖြေကြားရာ၌ ကုန်စည်စျေးနှုန်းများ သည် ရောင်းလိုအားနှင့် ဝယ်လိုအားပေါ်တွင် မူတည်သောကြောင့် မည်သည့်အဖွဲ့အစည်းကမျှ သတ်မှတ်၍မရနိုင်ကြောင်း၊ သီးနှံများ၏တန်ဖိုး မြင့်မားစွာရရှိနိုင်အတွက် ကုန်ကျစရိတ်များ လျှော့ ချပြီး ထုတ်လုပ်မှုမြှင့်တင်ခြင်းသည် အရေးကြီးသည့် အချက်တစ်ခုဖြစ်ကြောင်း ဝန်ကြီး Johari က ပြောကြားခဲ့သည်။
အလားတူ ပြည်ပလုပ်သားများအပေါ် မှီခိုအားထားရမှု လျှော့ချနိုင်စေရန် စက်မှုလယ်ယာ နှင့် အလိုအလျောက်စနစ်သုံး စက်ယန္တရားများ အသုံးချရေး PN-Tangga Batu ပါတီမှ လွှတ်တော် အမတ် Mr. Bakri Jamaluddin ၏ မေးမြန်းချက်အပေါ် ဒေသခံမလေးရှားလုပ်သား အနေဖြင့် စိုက်ခင်းကဏ္ဍတွင်လုပ်ကိုင်ရန် စိတ်အားထက်သန်မှု မရှိသဖြင့် စက်မှုလယ်ယာစနစ်ကို ဖြေရှင်း ချက် အနေဖြင့် မိတ်ဆက်ဆောင်ရွက်လျက်ရှိကြောင်း၊ နည်းပညာအသုံးပြုဆောင်ရွက်စေခြင်းဖြင့် အလုပ်ကြမ်းသမားများအပေါ် မှီခိုနေရမှုအား တဖြည်းဖြည်းလျော့ကျလာစေမည်ဖြစ်သော်လည်း လုံလောက်သော ဖြေရှင်းမှုနည်းလမ်း မဟုတ်သေးကြောင်း၊ စိုက်ခင်းကဏ္ဍတွင် ဆန်းသစ်တီထွင်မှု များစွာကို မိတ်ဆက်ပေးခဲ့သော်လည်း အချို့အကြီးစား စီးပွားဖြစ်လုပ်ငန်းများတွင် အကောင် အထည်ဖော်ရန်အတွက် လက်တွေ့မကျသေးကြောင်းဖြင့် ဝန်ကြီး Johari က ရှင်းလင်း ပြောကြား ခဲ့သည်။
စဉ်ဆက်မပြတ် ထုတ်လုပ်မှုအားကောင်းစေရန်အတွက် ဆီအုန်းပင်များ ပြန်လည်စိုက်ပျိုး ရေးကဏ္ဍ၏ အရေးပါမှုကိုလည်း ဝန်ကြီးက အလေးပေးပြောကြားခဲ့သည်။ စားအုန်းဆီ အထွက် ပမာဏ တိုးတက်လိုပါက ဆီအုန်းပင်ပြန်လည်စိုက်ပျိုးမှု အနည်းဆုံး ၄% ရှိရမည်ဖြစ်သော်လည်း လတ်တလောအချိန်တွင် ၂% မှ ၃% ခန့်သာရှိသည့်အတွက် ဆီအုန်းပင်အများစုသည် အပင်အို များဖြစ်နေပြီကို ပြသနေပါကြောင်း မလေးရှားနိုင်ငံ စိုက်ခင်းနှင့်ကုန်စည်များရေးရာ ဝန်ကြီး Mr. Johari Ghani ၏ ပြောကြားချက်များကို တင်ပြလိုက်ရပါသည်။
Source: The Free Malaysia Today, 4th Feb 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)