စားသုံးသူရေးရာဦးစီးဌာန၊ ပဲခူးတိုင်းဒေသကြီး ၊ သာယာဝတီခရိုင် ဇီးကုန်းမြို့နယ်တာဝန်ခံသည် (၁၃.၅.၂၀၂၂) ရက်နေ့တွင် စီးပွားရေး လုပ်ငန်းရှင် (၃) ဦးနှင့်တွေ့ဆုံ၍ စားအုန်းဆီ ဖြန့်ဖြူးနေမှု အခြေအနေ ၊ တစ်ပတ်အတွင်း စားအုန်းဆီဈေးနှုန်း၊ သတ်မှတ်ပေပါ အရောင်များဖြင့် ဖြန့်ဖြူးမှု ရှိ/မရှိ ၊ သက်ဆိုင်ရာ ကုမ္ပဏီ၏ Cap seal များဖြင့် ချိတ်ပိတ်၍ ကုန်အမှတ်တံဆိပ် (Logo) များ ကပ်နှိပ်ထားရှိမှု ရှိ/မရှိအား ကွင်းဆင်း စိစစ်ခဲ့ပါသည်။
ထိုသို့ ကွင်းဆင်းစိစစ်ရာတွင် စားသုံးဆီ လက်လီ/လက်ကား ဖြန့်ဖြူး ရောင်းချနေသော ဆိုင်ပိုင်ရှင်များနှင့် ကုန်မျိုးစုံ ရောင်းချနေသော ဆိုင်ပိုင်ရှင်များအား နောက်ပိုင်းတွင် စားသုံးဆီများကို တင်သွင်းသည့်အခါ ပေပါ အဝါ များဖြင့်သာ သယ်ယူရမည်ဖြစ်ကြောင်း၊ လုပ်ငန်းရှင်များမှ ယခင်ပေပါ အပြာရောင်ဆီ ထည့်သည့် ပေပါများအား သန့်စင်ဆေးကြော၍ အဝါရောင်ဆေးသုတ်ပြီး ရန်ကုန်ဆီကန်များမှ သယ်ယူနေရခြင်း ဖြစ်ကြောင်း၊ ယခုရက်များတွင် လိုသလောက်ဝယ်ယူ၍မရဘဲ ခွဲတမ်းသဘောဖြင့်သာ ဝယ်ယူရကြောင်း သိရှိရပါသည်။
ဇီးကုန်းမြို့နယ်၏ စားအုန်းဆီဖြန့်ဖြူးမှုသည် ဆီလုပ်ငန်းရှင်တစ်ဦးဖြစ်သော ဦးအောင်ငွေ (ဆီကုန်သည်ကြီးများအသင်း) မှတဆင့် လက်ကားပြန်ယူ၍ ဈေးအတွင်း ကုန်စုံဆိုင်အများစုမှ ပြန်လည် ဖြန့်ဖြူးရောင်းချနေကြောင်း၊ ၁၃.၅.၂၀၂၂ ရက်နေ့တွင် စားအုန်းဆီဈေးနှုန်းများမှာ (၆၈၀၀/-)ကျပ်၊ လက်ကားဈေးဖြစ်ပြီး လက်လီဈေးနှုန်းမှာ (၇၅၀၀/မှ ၈၀၀၀/) ကျပ်အထိ မြို့နယ်တွင်း ကျေးရွာများအထိ သယ်ယူမှု အနီးအဝေးအလိုက် ဈေးနှုန်းမြင့်တက်လျက်ရှိပြီး ယခုတစ်ပတ်အတွင်း ဈေးနှုန်းမှာ (၆၄၀၀-၆၆၀၀-၆၈၀၀/) ကျပ်အထိ ဈေးကွက်တွင် လက်ကားရောင်းချ ဖြန့်ဖြူးလျက်ရှိကြောင်း သိရှိရပါသည်။
DOCA(ပဲခူး)