ရာသီဥတု ဆိုးရွားမှုကြောင့် ကြံအထွက်ကျဆင်းခဲ့ပြီး လက်ကျန်နည်းပါးလာသည့်အတွက် အိန္ဒိယနိုင်ငံ၏ ထိပ်တန်းကြံကြိတ်ဝါးထုတ်လုပ်သော ပြည်နယ်များရှိ သကြားစက်ရုံပေါင်း ၃ ဒါဇင် ကျော်သည် ပုံမှန်ထက် နှစ်လခန့်စောလျက် ယခင်ရက်သတ္တပတ်တွင် စက်ရုံလည်ပတ်မှုများကို ရပ်နားခဲ့ကြကြောင်း ကြံလုပ်ငန်းမှ အရာရှိတစ်ဦးက ရိုက်တာသတင်းဌာနသို့ ပြောကြားခဲ့သည်။
ယင်းကဲ့သို့ စက်ရုံလည်ပတ်မှုများကို စောစီးစွာ ရပ်နားရခြင်းကြောင့် အိန္ဒိယနိုင်ငံ၏ သကြားထုတ်လုပ်မှုမှာ ကနဦးခန့်မှန်းထားသည်ထက် လျော့နည်းလာမည်ဟု ယူဆရကြောင်း၊ သကြားထုတ်လုပ်မှုဆိုင်ရာ စိုးရိမ်ဖွယ်အခြေအနေများကြောင့် ပြည်တွင်းသကြားဈေးနှုန်းများ မြင့်တက်လာပြီး စက်ရုံများအနေဖြင့် ၎င်းတို့အပေါ် ကန့်သတ်ထားသော ပြည်ပပို့ကုန်ပမာဏ အတွက် ဈေးနှုန်းပိုမိုမြင့်မားစွာ တောင်းဆိုလာဖွယ်ရှိကြောင်း သိရှိရသည်။
ကမ္ဘာ့ဒုတိယအများဆုံးသကြားထုတ်လုပ်သည့် အိန္ဒိယနိုင်ငံမှ သကြားတင်ပို့မှု နှောင့်နှေး လာခြင်းသည် ကမ္ဘာလုံးဆိုင်ရာ သကြားဈေးနှုန်းများကို မြင့်တက်စေမည်ဖြစ်သည်။ ယခုနှစ်၌ သကြားစက်ရုံ ပိတ်သိမ်းမှုများ သိသိသာသာ များပြားလာခဲ့သည်။ အိန္ဒိယနိုင်ငံ အနောက်ပိုင်းရှိ မဟာရဋ္ဌပြည်နယ်၊ ၎င်းနှင့် ကပ်လျက်ရှိ ကာနာတကာပြည်နယ်နှင့် မြောက်ပိုင်းရှိ ဥတာပရာဒေ့ရှ် ပြည်နယ်တို့ရှိ သကြားစက်ရုံပေါင်း ၃၇ ရုံခန့်သည် စက်ရုံလည်ပတ်မှုကို ရပ်နားခဲ့ရသည်ဟု အမည်မဖော်လိုသည့် သကြားလုပ်ငန်းနယ်ပယ်မှ အကြီးတန်းအရာရှိတစ်ဦးက ပြောကြားခဲ့သည်။ ယခင်နှစ် အလားတူကာလ၌ သကြားစက်ရုံ ၁၁ ရုံသာ ပိတ်သိမ်းမှုရှိခဲ့သည်။
ယခင်နှစ်၌ မိုးခေါင်ခြောက်သွေ့မှုကြောင့် ကြံထွက်နှုန်း သိသိသာသာ ကျဆင်းခဲ့ပြီး ခရိုင် အတော်များများတွင် ကြံလက်ကျန် ပြတ်တောက်မှုဖြစ်ပေါ်လျက် စက်ရုံများကို စောစီးစွာ ပိတ် သိမ်းခဲ့ရသည်ဟု အိန္ဒိယအနောက်ပိုင်းဒေသ သကြားစက်ရုံ လုပ်ငန်းများအသင်းမှ ဥက္ကဋ္ဌ B.B. Thombare က ရိုက်တာ သတင်းဌာနသို့ ပြောဆိုခဲ့သည်။ မဟာရဋ္ဌပြည်နယ်ရှိ စက်ရုံများစွာသည် ကြံအလုံအလောက်ရရှိရန် ကြိုးပမ်းနေရပြီး ကြိတ်ခွဲနိုင်စွမ်း၏ ထက်ဝက်ခန့်ကိုသာ လည်ပတ်နေ ရသဖြင့် ယခုလကုန်၌ ကြံကြိတ်ဝါးမှုရာသီမှာ ပိတ်သိမ်းဖွယ်ရှိကြောင်း ၎င်းကပြောကြားခဲ့သည်။
အိန္ဒိယသကြားနှင့် ဇီဝစွမ်းအင်ထုတ်လုပ်သူများအသင်း၏ ယခင်လခန့်မှန်းချက်၌ ယခုနှစ် စက်တင်ဘာလတွင် ကုန်ဆုံးမည့် ၂၀၂၄-၂၅ စျေးကွက်ရာသီအတွင်း အိန္ဒိယနိုင်ငံ၏ သကြား ထုတ်လုပ်မှုမှာ ယခင်နှစ်နှင့်နှိုင်းယှဉ်ပါက ၁၄.၇% လျော့နည်းလျက် တန်ချိန် ၂၇.၂၇ သန်းသို့ ကျ ဆင်းနိုင်ကြောင်း ဖော်ပြထားသည်။ သို့သော်လည်း ကြံစက်များ လုပ်ငန်းပိတ်သိမ်းနေရသည့် အခြေအနေအရ သကြားထုတ်လုပ်မှုမှာ ထိုထက်ပင် ပိုမိုလျော့နည်းနိုင်မည်ဟု ကမ္ဘာ့တစ်ဝန်းသို့ ကုန်သွယ်ရောင်းဝယ်နေသည့် ကုန်သည်များက ခန့်မှန်းလျက်ရှိကြသည်။
မွန်ဘိုင်းမြို့အခြေစိုက် ကုန်သည်တစ်ဦးက အိန္ဒိယ၏ သကြားထုတ်လုပ်မှုမှာ တန်ချိန် ၂၆ သန်းခန့်သို့ ကျဆင်းသွားနိုင်သည်ဟု ခန့်မှန်းထားကြောင်း ပြောကြားခဲ့သည်။ စက်ရုံများ စောစီးစွာ ပိတ်သိမ်းခြင်းနှင့်အတူ သကြားတန်ချိန် ၁ သန်းသာ တင်ပို့ရန် ခွင့်ပြုခြင်းတို့က ပြည်တွင်း၌ သကြားဈေးနှုန်းများကို တစ်လအတွင်း ၁၀% မြင့်တက်လာခဲ့စေခဲ့သည်။
ပြည်တွင်းဈေးနှုန်းများ မြင့်တက်လာခြင်းသည် စက်ရုံများ၏ ဘဏ္ဍာရေးအခြေအနေကို ကောင်းမွန်စေမည်ဖြစ်ကြောင်း၊ သကြားတင်ပို့ရာတွင် တစ်တန်လျှင် ရူပီး ၄၅၀၀၀ သို့မဟုတ် ယင်းထက်ပိုမိုရရှိရန် ကုန်သည်လုပ်ငန်းရှင်များက မျှော်လင့်ထားကြကြောင်း၊ စက်ရုံများအနေဖြင့် ချက်ချင်း စာချုပ်များချုပ်ဆိုရန် မလိုလားဘဲ ဈေးနှုန်းများ ထပ်မံမြင့်တက်လာမည်ကို မျှော်လင့်နေ သောကြောင့် တင်ပို့မှုများ နှေးကွေးနေရကြောင်းဖြင့် နိုင်ငံတကာနှင့် ကုန်သွယ်လုပ်ကိုင်နေသည့် နယူးဒေလီမြို့ အခြေစိုက် ကုန်သည်တစ်ဦးကလည်း ပြောကြားခဲ့သည်။
Source: Business Standard, 10 February, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)