မန္တလေးတိုင်းဒေသကြီး၊ ကျောက်ဆည်ခရိုင်သည် စပါးကိုအဓိကထား စိုက်ပျိုးကြသော်လည်း ကျေးလက်နေတောင်သူများသည် နှစ်ရှည်သီးနှံဖြစ်သော သရက်သီးနှံကို ယာမြေနှင့်ဥယျာဉ်ခြံမြေများတွင် အများအပြား စိုက်ပျိုးလျက်ရှိပါသည်။သရက်စိုက်တောင်သူများသည် သရက်စိုက်ပျိုးရာတွင် ဒေသနှင့်ကိုက်ညီပြီး အရည်အသွေးကောင်းမွန်သော မျိုးများကိုသာ ရွေးချယ်စိုက်ပျိုးလျှက်ရှိပြီး ထင်ရှားသောသရက်မျိုးများမှ ာစိန်တလုံး၊ရွှေဟင်္သာ၊ပတ္တမြားငမောက်နှင့်ရင်ကွဲမျိုးများ ဖြစ်ပါသည်။တောင်သူအများစုသည် စိန်တလုံးသရက်ကိုသာ အဓိကထားပြီး ကျယ်ကျယ်ပြန့်ပြန့် အများဆုံး စိုက်ပျိုးလာကြကြောင်း၊စိုက်ပျိုးရာတွင် ယခင်က ပင်ခြား၊ တန်းခြားစနစ်ဖြင့် (၃၀×၃၀)ပေခြားစိုက်ပြီး ယခုခေတ်သစ် စိုက်ပျိုးနည်းဖြင့်(၅၀×၅၀)ပေခြား အများဆုံးစိုက်ပျိုးကြကြောင်း၊သရက်စိုက်ပျိုးရာတွင်သက်တမ်း(၁-၂)နှစ်သားရှိသောအစေ့ပျိုးပင်နှင့် ကိုင်ကူးထားသော ပျိုးပင်များကိုသာ အများ ဆုံးစိုက်ပျိုးကြပြီး စျေးနှုန်းအနေဖြင့် အစေ့ပျိုးပင်(၁-၂)နှစ်သား ပျိုးပင်တစ်ပင်လျှင်(၁၅၀၀-၂၀၀၀) ကျပ်စျေးနှုန်း နှင့် ကိုင်းကူးပျိုးပင် တစ်ပင်လျှင်(၂၀၀၀-၃၀၀၀)ကျပ် စျေးနှုန်းဖြင့်ဝယ်ယူရကြောင်း ၊ ၄င်းမျိုးများစိုက်ပျိုးခြင်းဖြင့် အသေအပျောက် နည်းပါးပြီး စရိတ်စခကုန်ကျမှုသက်သာသောကြောင့် သရက်စိုက်တောင်သူများအများအပြား စိုက်ပျိုးလာကြကြောင်း သိရှိရပါသည်။အထွက်နှုန်းအနေဖြင့် စိုက်ပျိုးပြီးအပင်သက်တမ်းပေါ် မူတည်၍ အပင်သက်တမ်း(၅-၁၀)နှစ်သားတစ်ပင်လျှင် သရက်သီး အရေအတွက်(၁၀၀-၅၀၀)လုံးခန့် ၊ အပင်သက်တမ်း(၁၀-၂၀)နှစ်သား တစ်ပင်လျှင်သရက်သီး အရေအတွက်(၅၀၀-၁၅၀၀)လုံးခန့်ထွက်ရှိကြောင်း ၊ တစ်ဧကကုန်ကျစရိတ်အနေဖြင့် သရက်သီး ရာသီအချိန် (၁)နှစ်လုံးတွင် ဆေးဖြန်းခြင်း၊ မြေသြဇာကျွေးခြင်းနှင့် အိတ်စွပ်ခ စုစုပေါင်း(၃၀၀၀၀၀) ကျပ်ဝန်းကျင်ခန့်ကုန်ကျကြောင်း ၊ သရက်သီးကိုအိတ်စွပ်ခြင်းဖြင့်အရောင်အသွေးကောင်းမွန်ခြင်း၊ ရာသီဥတုဒဏ်ခံနိုင်ခြင်းနှင့် စျေးကွက်ကောင်းများရရှိကြောင်း၊ စိန်တလုံးသရက်စျေးကွက်အနေဖြင့် ယခင်ကအထွက်နှုန်းကောင်းသော်လည်း စျေးနှုန်းရရှိမှုနည်းပါးပြီး ယခုနှစ်တွင်အထွက်နှုန်းနည်းသော်လည်း စျေးကောင်းရရှိသောကြောင့် ပြည်ပစျေးကွက်အနေဖြင့် တရုတ်နိုင်ငံသို့တင်ပို့ရာတွင် ယွမ်ငွေစျေးနှုန်းမြင့်တက်နေသောကြောင့် တရုတ်စျေးကွက်တွင် စိန်တလုံးသရက် (16 kg)တစ်ခြင်း လျှင်ယွမ်(၁၃၀-၁၄၀)ဝန်းကျင် ခန့်ရရှိကြောင်း၊ တရုတ်ငွေ တစ်ယွမ်ကို မြန်မာငွေ(၃၀၀)ကျပ် စျေးရှိပြီး (16kg)တစ်ခြင်းလျှင်မြန်မာငွေ(၃၉၀၀၀-၄၂၀၀၀)ကျပ်ခန့်ပေါက်စျေးရှိပြီး တောင်သူများ စျေးကောင်းရရှိလာခြင်းဖြစ်သည်။ ပြည်တွင်းစျေးကွက်တွင်လည်း စိန်တလုံးသရက်သီး တစ်လုံး လျှင်(၃၀၀-၅၀၀) ကျပ်စျေးအထိ ရောင်းချရပြီး အိတ်စွပ်သီးတစ်လုံးလျှင်(၆၀၀-၇၀၀)ကျပ်စျေးနှုန်း ရရှိကြောင်း သရက်စိုက်တောင်သူတစ်ဦး၏ ပြောပြချက်အရ သိရှိရပါသည်။
DOCA(မန္တလေး)