ဗီယက်နမ်နိုင်ငံ၏ Lam Dong ပြည်နယ်သည် ယခုနှစ်၏အစမှစ၍ ဖေဖော်ဝါရီလ ၇ ရက်နေ့အထိ ၎င်းတို့၏ အဓိက စိုက်ပျိုးမွေးမြူရေး ထုတ်ကုန်များတင်ပို့မှုမှတစ်ဆင့် ဝင်ငွေ အမေရိကန်ဒေါ်လာ ၃၉.၇၃ သန်း ရရှိခဲ့ကြောင်း ပြည်နယ်၏ စက်မှုနှင့် ကုန်သွယ်ရေးဦးစီးဌာန၏ အဆိုအရ သိရပါသည်။ ထိုကာလအတွင်း ကော်ဖီတင်ပို့မှုသည် ထိပ်ဆုံးမှဦးဆောင်ခဲ့ပြီး ကော်ဖီတန်ချိန် ၅၃၀၀ တင်ပို့ခဲ့ရာမှ ဝင်ငွေ အမေရိကန် ဒေါ်လာ ၂၃.၉ သန်း ရရှိခဲ့ကြောင်း သိရပါသည်။ ၎င်းတို့၏နောက်တွင် သစ်သီးနှင့် ဟင်းသီးဟင်းရွက်တန်ချိန် ၂၁၈၇ တန်တင်ပို့ရာမှ ဝင်ငွေအမေရိကန်ဒေါ်လာ ၆.၃၉ သန်း၊ ပန်းတင်ပို့ရာမှ ဝင်ငွေ အမေရိကန်ဒေါ်လာ ၅.၅၆ သန်း၊ ပိုးထည်အကြမ်းတင်ပို့ရာမှ ဝင်ငွေ အမေရိကန်ဒေါ်လာ ၂.၈၈ သန်းနှင့် လက်ဖက်တင်ပို့ရာမှ ဝင်ငွေ အမေရိကန်ဒေါ်လာ ၀.၉၉ သန်း ရရှိခဲ့ကြောင်း သိရပါသည်။ ပြည်နယ်သည် နိုင်ငံများနှင့် ဒေသပေါင်း ၅၆ ခုသို့ ကုန်ပစ္စည်းများ တင်ပို့ခဲ့ကြောင်း သိရပါသည်။ ၎င်းတို့၏ အဓိကတင်ပို့သည့် ဈေးကွက်များမှာ ဂျပန်၊ တောင်ကိုရီးယား၊ ထိုင်း၊ တရုတ်၊ စင်ကာပူတို့ပါဝင်သည့် အာရှနှင့် ဥရောပနိုင်ငံအချို့ ဖြစ်ကြောင်း သိရပါသည်။၂၀၂၄ ခုနှစ်တွင် ပြည်နယ်၏တင်ပို့မှုမှာ အမေရိကန် ဒေါ်လာ ၉၈၅.၇ သန်းတန်ဖိုးရှိပြီး ၂၀၂၃ ခုနှစ်ကထက် ၆.၁၁ ရာခိုင်နှုန်းမြင့်တက်ခဲ့ကြောင်း သိရ ပါသည်။ ထိုတန်ဖိုးပမာဏထဲတွင် အလူမီနီယမ်နှင့် အလူမီနီယမ်ဟိုက်ဒရောက်ဆိုဒ် တင်ပို့မှုမှာ ထိပ်ဆုံးတွင် ဦးဆောင်ခဲ့ပြီး တန်ချိန် ၇၀၃၀၀၀ ပတ်လည်တင်ပို့ရာမှ ဝင်ငွေ အမေရိကန်ဒေါ်လာ ၂၈၈.၃ သန်း ရရှိခဲ့ကြောင်း သိရပါသည်။ အစိမ်းရောင်ကော်ဖီစေ့မှာ ဒုတိယတန်ဖိုးအမြင့်ဆုံး တင်ပို့သည့်အမျိုးအစားဖြစ်ပြီး စုစုပေါင်းတန်ချိန် ၆၇၅၁၀ တန် တင်ပို့ရာမှ ဝင်ငွေ အမေရိကန် ဒေါ်လာ ၂၂၆.၁၆ သန်း ရရှိခဲ့ကြောင်း သိရပါသည်။ ၎င်းတို့၏နောက်တွင် အထည်အလိပ်များ၊ ဟင်းသီးဟင်းရွက်များနှင့် သစ်သီးများ ရပ်တည်ခဲ့ကြောင်း သိရပါသည်။
DOCA(ရန်ကုန်)