ကမ္ဘောဒီးယားနိုင်ငံ၏ စိုက်ပျိုးရေးကဏ္ဍကို လေ့လာရန် တရုတ်ရင်းနှီးမြှုပ်နှံသူများအား တိုက်တွန်း

          ဝန်ကြီးချုပ် Hun Manet ဦးဆောင်၍ ကမ္ဘောဒီးယားနိုင်ငံ၊ ဖွံ့ဖြိုးတိုးတက်ရေးကောင်စီ (CDC) သည်  စိုက်ပျိုးရေးကဏ္ဍအတွင်း ထုတ်လုပ်မှုကွင်းဆက်များ ထူထောင်ရာတွင် အခွင့်အလမ်းများရှာဖွေကြရန် တရုတ်ရင်းနှီးမြှုပ်နှံသူများကို ၁၇-၂-၂၀၂၅ ရက်နေ့က တိုက်တွန်းခဲ့သည်။ အဆိုပါတိုက်တွန်းချက်ကို (CDC) ၏ ကမ္ဘောဒီးယား ရင်းနှီးမြှုပ်နှံရေး ဘုတ်အဖွဲ့ အတွင်းရေးမှူးချုပ် Chea Vuthy မှ တရုတ်နိုင်ငံ၊ Zhejiang ပြည်နယ်၊ Ningbo မြို့မှ တရုတ်ကုမ္ပဏီ ၁၈ ခုမှ ကိုယ်စားလှယ်များနှင့် Ningbo ဘဏ်မှ အထွေထွေ မန်နေဂျာ Lu Zhiqiong တို့နှင့်တွေ့ဆုံစဉ် တင်ပြခဲ့သည်။ (CDC) ၏ထုတ်ပြန်ချက်အရ တရုတ်ကုမ္ပဏီများ တွင် ရာဘာလုပ်ငန်း၊ ဆေးဘက်ဆိုင်ရာပစ္စည်းများထုတ်လုပ်ခြင်း၊ အိမ်သုံးပစ္စည်းများ၊ အဝတ် အထည်၊ ဘဏ်လုပ်ငန်းနှင့်အခြားကဏ္ဍအသီးသီးတွင် အကျိုးစီးပွားများရရှိနိုင်သည့် စီးပွားရေး လုပ်ငန်းများပါဝင်သည်။ တွေ့ဆုံစဉ် ကမ္ဘောဒီးယားနိုင်ငံ သို့လေ့လာရေးခရီးနှင့် ရင်းနှီးမြှုပ်နှံ သူများအတွက် တန်ဖိုးရှိသော အချိန်များကို ကုန်ဆုံးစေခဲ့သော ကိုယ်စားလှယ်အဖွဲ့အား Chea Vuthy မှကျေးဇူးတင်စကားပြောကြားခဲ့သည်။ စက်မှုလုပ်ငန်း၊ ကုန်ထုတ်လုပ်ငန်း၊ အထူး စီးပွားရေးဇုန်များ ထူထောင်ရေး၊ စိုက်ပျိုးရေးနှင့်လယ်ယာလုပ်ငန်းစသည့် ကဏ္ဍများတွင် အလားအလာကောင်းများကို အလေးပေးပြောကြားခဲ့သည်။  ကမ္ဘောဒီးယား ရင်းနှီးမြှုပ်နှံမှု ဘုတ်အဖွဲ့ (CIB) ၏ ထုတ်ပြန်ချက်များအရ ကမ္ဘောဒီးယားနိုင်ငံအတွင်း ရင်းနှီးမြှုပ်နှံမှုများသည် ၂၀၂၅ ခုနှစ်၊ ဇန်နဝါရီလတွင် ကန်ဒေါ်လာ ၇၄၈ သန်းရှိခဲ့ပြီး တရုတ်နိုင်ငံ၏ အရင်းအနှီးသည် ၅၄၈.၆၅ သန်း သို့မဟုတ် စုစုပေါင်းရင်းနှီးမြှုပ်နှံမှု၏ ၇၃.၃၅ ရာခိုင်နှုန်း ရှိခဲ့သည်။

DOCA(ရန်ကုန်)