များစွာသောကဏ္ဍများတွင် ထိုင်းနိုင်ငံ၌ ရင်းနှီးမြှုပ်နှံရန် ရုရှားရင်းနှီးမြှုပ်နှံသူများ ဆန္ဒရှိနေ

          ရုရှားကုမ္ပဏီများသည် ထိုင်းနိုင်ငံတွင် ရင်းနှီးမြှုပ်နှံမှုများ ပိုမိုပြုလုပ်ရန်စီစဉ်နေပြီး ပူးပေါင်းဆောင်ရွက်မှုများပြုလုပ်ရန် ထိုင်းစီးပွားရေးမိတ်ဖက်များ ရှာဖွေမည်ဖြစ်ကြောင်း ရုရှား-ထိုင်းစီးပွားရေးကောင်စီက ပြောကြားခဲ့ပါသည်။ ရုရှားထံမှရင်းနှီးမြှုပ်နှံသူများသည် ရုပ်ရှင်ရိုက်ကူးရေးနှင့် ထုတ်လုပ်ရေး၊ ထောက်ပံ့ပို့ဆောင်ရေး၊ အစားအစာနှင့် အဖျော် ယမကာ၊ ရေနံဓာတုပစ္စည်းများ၊ စွမ်းအင်နှင့် ဓာတ်မြေဩဇာတို့တွင် စိတ်ဝင်စားကြောင်း ကောင်စီ၏ဥက္ကဌဖြစ်သူ Ivan Demchenko က ပြောကြားခဲ့ပါသည်။ ရုရှားရင်းနှီးမြှုပ်နှံသူ များသည် အစိုးရ၏ရင်းနှီးမြှုပ်နှံမှုမက်လုံးအစီအစဉ်အပေါ် ထိုင်းနိုင်ငံရင်းနှီးမြှုပ်နှံမှုဘုတ်အဖွဲ့ နှင့် ပြောဆိုဆွေးနွေးလျှက်ရှိကြောင်း သိရပါသည်။ Mr Demchenko ကထိုင်းနိုင်ငံသည် အာရှတွင်အဓိကရင်းနှီးမြှုပ်နှံမှုဦးတည်ရာနေရာဖြစ်ကြောင်းနှင့် ပြည်ပရင်းနှီးမြှုပ်နှံသူများ သည် ပူးပေါင်းစီးပွားရေးလုပ်ဆောင်ရန်အတွက် ပြည်တွင်းစီးပွားရေးမိတ်ဖက်များရှာဖွေရန် အလိုရှိကြောင်း ပြောကြားခဲ့ပါသည်။ ထို့ပြင် Mr Demchenko သည် ဖေဖော်ဝါရီလ ၁၂ ရက်နေ့မှ ၁၅ ရက်နေ့ထိ ဘန်ကောက်မြို့တွင် ထိုင်းစက်မှုလုပ်ငန်းများအသင်းက ကျင်းပ သည့် FTI Expo တွင်လည်း ထိုင်းစက်မှုလုပ်ငန်းကဏ္ဍနည်းပညာအဆင့်မြှင့်တင်မှု၊ စီးပွားရေး ချိတ်ဆက်မှုနှင့် သဘာဝပတ်ဝန်းကျင်နှင့်သင့်လျှော်သော ကုန်ထုတ်လုပ်မှုဖိုရမ်များနှင့် ပတ်သတ်၍  အသားပေးပြောကြားခဲ့ကြောင်း သိရပါသည်။ ရုပ်ရှင်ရိုက်ကူးရေးနှင့် ထုတ်လုပ် ခြင်းသည်လည်း ရုရှားလုပ်ငန်းရှင်များက စိတ်ဝင်စားသောကဏ္ဍဖြစ်ကြောင်း သိရပါသည်။ လက်ရှိအချိန်တွင် ရုရှားကုမ္ပဏီ ၁၀၀ ခန့်သည် ကျောက်မြတ်ရတနာ၊ ပရိဘောဂ၊ ဟိုတယ်များနှင့် စား‌သောက်ဆိုင်များပါဝင်သည့် များစွာသောလုပ်ငန်းများတွင် ထိုင်းနိုင်ငံ၌ ရင်းနှီးမြှုပ်နှံလျှက်ရှိကြောင်း သိရပါသည်။ ထို့ပြင် ထိုင်းနိုင်ငံသည် ရုရှားလူမျိုးများအကြား လူသိများကျော်ကြားပြီး နှစ်စဉ် ၁ သန်းကျော်လည်ပတ်လျှက်ရှိကြောင်း သိရပါသည်။ ရက် ၆၀ ဗီဇာကင်းလွတ်ခွင့်ကြောင့် ၂၀၂၅ ခုနှစ်တွင် ရုရှားလူမျိုး ၂.၂ သန်းခန့် လာရောက် လည်ပတ်နိုင်ကြောင်း သိရပါသည်။ ၂၀၂၃ ခုနှစ်တွင် နှစ်နိုင်ငံအပြန်အလှန်ကုန်သွယ်မှုမှာ အမေရိကန်ဒေါ်လာ ၁.၅ ဘီလီယံရှိကြောင်း ရုရှားသံရုံးအချက်အလက်များအရ သိရပါသည်။ ထိုင်းနိုင်ငံက ရုရှားသို့အဓိကပို့ကုန်များတွင် စက်ပစ္စည်းနှင့်အစိတ်အပိုင်းများ၊ မော်တော်ယာဉ် များ၊ ဓာတုပစ္စည်းများ၊ ရာဘာ၊ အစားအစာများ၊ အဝတ်အထည်နှင့် ဖိနပ်များ ပါဝင်ကြောင်း သိရပါသည်။ ထိုင်းနိုင်ငံက ရုရှားထံမှ ပြန်လည်တင်သွင်းသည်များမှာ စတီးလ်ထုတ်ကုန်များ၊ ဓာတုပစ္စည်းများ၊ ရာဘာ၊ တွင်းထွက်ပစ္စည်းများ၊ ‌ရေနံနှင့် ရေနံထွက်ပစ္စည်းများ၊ ကျောက်မြတ်ရတနာများနှင့် ပုလဲများ ပါဝင်ကြောင်း သိရပါသည်။

DOCA(ရန်ကုန်)