လက်ရှိကာလတွင် ပြည်တွင်းကားဈေးနှုန်းတွေဟာ ငွေကျပ် သိန်းဆယ်ဂဏန်းဝန်းကျင်အထိ မြင့်တက်လာပြီး မော်ဒယ်မြင့်ကားများထက် Use ကားများသာ ဈေးကွက်မှာ အရောင်းအဝယ်ဖြစ်နေတယ်လို့ မုံရွာကားဈေးကွက်အတွင်းမှ စုံစမ်းသိရှိရပါတယ်။
ယခုလို ပြည်တွင်းကားဈေးနှုန်းတွေ အမြင့်တန်းမှာ ရောက်ရှိနေတာဟာ ဒေါ်လာဈေးနှင့် စက်သုံးဆီ ဂယက်ကြောင့် ဖြစ်တယ်လို့လည်း ကားဝယ်ရောင်းလုပ်ကိုင်သူတွေက ပြောပါတယ်။
“ပြည်တွင်းကားဈေးက မူလပေါက်ဈေးထက် ဈေးတွေတက်နေတာပေါ့။ ကားအမျိုးအစားပေါ် မူတည်ပြီး ၁၅ သိန်းကျော်၊ ၃၀ သိန်းလောက်ထိ မြင့်တက်လာတယ်။ ဈေးကွက်အနေအထားကလဲ အေးတယ်။ အရင်ကဆို အခုလို ရာသီအချိန်မျိုးဆို ကားတွေရောင်းနေရပြီး ဒီနှစ်ကျ အတော်လေး ပါးတယ်။ ကြိုက်ရောင်း၊ ကြိုက်ဝယ်အနည်းငယ်လောက်ပဲရှိတယ်။ ဒီနှစ် တစ်နှစ်လုံးတော့ ဒီလိုပုံစံနဲ့ပဲ သွားနေအုံးမယ်ထင်ပါတယ်။ ဈေးကွက်က ထူးထူးခြားခြားကြီး ပြောင်းလဲသွားတာမျိုးတော့ မရှိနိုင်ဘူးထင်တယ်။ ဘာလို့လဲဆိုတော့ ကားမူဝါဒတွေက မပြောင်းလဲဘူး၊ အဲ့တော့ ကားဈေးကွက် ဒီအတိုင်းပဲ ဆက်ရှိနေမယ်။ ကြိုက်ဝယ်၊ ကြိုက်ရောင်း ဒီသဘောမျိုးလေးပဲပေါ့” လို့ မုံရွာမြို့ရှိ ကားဝယ်ရောင်းတစ်ဦးက ပြောပြခဲ့ပါတယ်။
ဒါ့အပြင် ယခုနှစ်အတွင်း ပြည်တွင်းကားဈေးနှုန်းတွေဟာ အမြင့်ပိုင်းသာရှိနေနိုင်မယ်လို့ ကားဝယ်ရောင်းလုပ်ကိုင်သူတွေက ခန့်မှန်းထားကြပါတယ်။
ယခင်က သိန်း ၁၅၀ လောက်ဖြင့် ဝယ်ယူလို့ရတဲ့ ဟွန်ဒါဖစ်ဟာ ယခုကာလမှာတော့ ကျပ်သိန်း ၂၀၀ ဝန်းကျင်အထိ ပေါက်ဈေးရှိနေတာ ဖြစ်ပါတယ်။
ထို့အပြင် မုံရွာမှာ မော်ဒယ်မြင့်ကားများထက် တပတ်နွမ်း ဂျပန်ကျ ယခင်တင်သွင်းပြီး (Use) ကားများသာ ကြိုက်ရောင်း၊ ကြိုက်ဝယ်စနစ်နဲ့ ပိုမိုအရောင်းအဝယ်ဖြစ်နေတယ်လို့ သိရပါတယ်။
DOCA(စစ်ကိုင်း)