မန္တလေးတိုင်းဒေသကြီး၊ မြင်းခြံမြို့နယ်၊ လေးအိမ်တန်းကျေးရွာတွင် လယ်ယာစိုက်ပျိုးရေး လုပ်ငန်းကို လုပ်ကိုင်ကြပြီး သီးနှံမျိုးစုံ စိုက်ပျိုးလျက်ရှိရာ ဖူးစားပြောင်းသီးနှံများကိုလည်း စိုက်ဧက ၁၀ ဧကခန့် စိုက်ပျိုးထားရှိကြောင်း သိရသည်။
ဖူးစားပြောင်းသီးနှံကို အောက်တိုဘာလနှင့် နိုဝင်ဘာလတွင် စတင်စိုက်ပျိုး၍ စိုက်ပျိုး ပြီး ၃လခွဲအကြာ ဖေဖော်ဝါရီလတွင် စတင်ခူးဆွတ်ရကြောင်း၊ တစ်ဧကလျှင် ထိုင်ဝမ်ပြောင်းစီး မျိုးထုပ် ၃ ထုပ်ခန့် စိုက်ပျိုးလေ့ရှိကြောင်း၊ စိုက်ပျိုးစနစ်အနေဖြင့် ထွန်ကြောင်းဆွဲအစေ့ချ၍ အဝီစိတွင်းများမှရေကို အင်ဂျင်ဖြင့်မောင်းတင်၍ စိုက်ပျိုးကြပြီး တစ်ဧကကုန်ကျစရိတ်မှာ မျိုး၊ သွင်းအားစု၊ ရေသွင်းခ၊ မြေပြုပြင်ခနှင့် လုပ်သားခအပါအဝင် စက်သုံးဆီဈေးနှုန်းကြီးမြင့်မှု တို့ကြောင့် တစ်ဧကလျှင် စုစုပေါင်း ၂၀၀၀၀၀၀ ကျပ်ခန့်ကုန်ကျကြောင်း၊ ဖူးစားပြောင်းသီးနှံအထွက်နှုန်းအနေဖြင့် တစ်ဧက လျှင် ပြောင်းဖူးအရေအတွက် ၅၀၀၀/၆၀၀၀ ခန့် ထွက်ရှိပြီး မြေဆီလွှာအနေအထားနှင့် ပြောင်းဖူးပင် ရှင်သန် အောင်မြင်မှုအပေါ်မူတည်၍ အထွက်နှုန်းအနည်းငယ် ကွာခြားမှုရှိကြောင်း၊ လက်ရှိဈေးကွက်အတွင်း ရောင်းဝယ်လျက်ရှိသည့် ဈေးနှုန်းအနေဖြင့် ပြောင်းဖူးအရွယ်အစားအပေါ် မူတည်၍ ပြောင်းဖူးတစ်ဖူး လျှင် လက်ကားဈေး ငွေကျပ် ၅၀၀/၆၀၀ ဖြင့် ရောင်းချလျက်ရှိပြီး စိုက်ခင်းအထိလာရောက်ဝယ်ယူသည့် ပွဲစားများအနေဖြင့် တစ်ဧကစိုက်ခင်းတစ်ခင်းလျှင် ကျပ်သိန်း (၄၀)နှုန်းအထိ အခင်းပြတ်ဈေးပေး ဝယ်ယူလျက်ရှိသဖြင့် ဖူးစားပြောင်းတစ်ဧကလျှင် ငွေကျပ် (၂၀၀၀၀၀၀) ခန့်တောင်သူအကျိုးအမြတ် ရရှိခဲ့ကြောင်း၊ ဈေးကွက်အနေဖြင့် မန္တလေး၊ မိတ္ထီလာ မြို့များမှ အဝယ်တော်များက အခင်းပြတ်လာရောက်ဝယ်ယူခြင်းများရှိသကဲ့သို့ မြင်းခြံမြို့ရှိ စည်ပင် သာယာဈေးကြီး၊ အေးမြသီတာဈေးနှင့် စံပြဈေးများသို့ တင်ပို့ရောင်းချခြင်းများလည်း ရှိကြောင်း ဖူးစားပြောင်းစိုက်တောင်သူတစ်ဦးထံမှ သိရသည်။
DOCA(မန္တလေး)