စစ်ကိုင်းတိုင်းဒေသကြီး၊စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ခရိုင်ဦးစီးမှူး၊ မုံရွာမြို့နယ်တာဝန်ခံနှင့် ချောင်းဦးမြို့နယ်တာဝန်ခံတို့သည် ဇွန်လ ၉ ရက်နေ့ နေ့လည် ၁၃ နာရီအချိန်တွင် မုံရွာမြို့၊ ကွေ့ကြီးရပ်ကွက်ရှိ “နယူးစတား” ပေါင်မုန့်လုပ်ငန်းရှင်နှင့်တွေ့ဆုံ၍ စားသုံးသူကာကွယ်ရေးဥပဒေ (၂၀၁၉)၊ အခန်း(၁၈)အရ ကုန်အညွှန်းအမှတ်အသားဆိုင်ရာ ပြဋ္ဌာန်းချက်များ နှင့်ပတ်သက်၍ စီးပွားရေးလုပ်ငန်းရှင်များ သိရှိလိုက်နာ ဆောင်ရွက်နိုင်စေရန်အတွက် အသိပညာပေးဆွေးနွေး ခဲ့ပါသည်။
ထိုသို့တွေ့ဆုံဆွေးနွေးရာတွင် မုံရွာခရိုင်ဦးစီးမှူးက စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏ တာဝန်များ၊ ကုန်အညွှန်းအမှတ်အသားဖော်ပြခြင်း၊ ပြစ်မှုပြစ်ဒဏ်များ၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် ပတ်သက်၍ ပုဒ်မ ၄၁။ (ခ) နှင့်(ဆ) တို့တွင်ဖော်ပြထားသည့် ကုန်စည်၏ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာရေးဆိုင်ရာ ဘေးထွက်ဆိုးကျိုး သို့မဟုတ် ဓာတ်မတည့်ကြောင်းဖော်ပြချက်နှင့် ကြိုတင်သတိပေးချက်တို့ကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ရေးသားဖော်ပြရမည်ဖြစ်ကြောင်း အသိပညာပေးဆွေးနွေးခဲ့ပါသည်။
“နယူးစတား” ပေါင်မုန့်လုပ်ငန်းကို ၂၀၂၀ ခုနှစ်ကစတင်လုပ်ကိုင်ခဲ့ကြောင်း၊ ကုန်ကြမ်းများကို မြို့တွင်းမှဝယ်ယူကြောင်း၊ ဂျုံ (၂၅) ကီလိုဂရမ် တစ်အိတ်လျှင် (၄၀၀၀၀ မှ ၅၀၀၀၀)ထိ၊ စားအုန်းဆီ တစ်ပိဿာမှ (၈၂၅၀) ကျပ်၊ ကြက်ဥ တစ်ပိဿာ (၄၀၀၀ မှ ၅၀၀၀)ထိနှင့် သကြား(၅၀) ကီလိုဂရမ် တစ်အိတ်လျှင် (၆၅၅၀၀)ကျပ်များရှိကြောင်း၊ တစ်နေ့တွင် ဂျုံ (၂၅) ကီလိုဂရမ် နှစ်အိတ် နှင့် သကြား (၅၀) ကီလိုဂရမ် တစ်အိတ်ပြုလုပ်လျှင် ကုန်ချောမုန့်ထုပ် အထုပ် (၅၀၀၀ မှ ၆၀၀၀)ထိ ထုတ်လုပ်နိုင်ပြီး တစ်ထုပ်လျှင် လက္ကားဈေး (၈၅) ကျပ် ရှိကြောင်း ၊ မုန့်များကို မုံရွာမြို့နယ် အတွင်းနှင့် ဘုတလင်မြို့နယ်၊ ဟုမ္မလင်းမြို့နယ်၊ မော်လိုက်မြို့နယ်၊ တမူးမြို့နယ်များသို့ ဖြန့်ဖြူးရောင်းချကြောင်း သိရှိရပါသည်။
DOCA(စစ်ကိုင်း)