စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကျွန်းလှမြို့နယ် တာဝန်ခံရုံးအနေဖြင့် စားသုံးသူကာကွယ်ပေးရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုး တိုးတက်ရေးလုပ်ငန်းများကိုပါ ဆောင်ရွက်လျက်ရှိရာ စစ်ကိုင်းတိုင်းဒေသကြီး၊ ကန့်ဘလူခရိုင်၊ ကျွန်းလှမြို့နယ်၊ ရှမ်းစုကျေးရွာတွင် တစ်ပိုင် တစ်နိုင်အနေဖြင့်လည်းကောင်း ၊ မိသားစုစားဝတ်နေရေး အပိုဝင်ငွေရရှိရန်အတွက်လည်းကောင်း ပန်းဂေါ်ဖီပင်ကို စိုက်ပျိုးကြပါသည်။
ပန်းဂေါ်ဖီပင်စိုက်ပျိုးသည့်မျိုးမှာ Excel 900 မျိုးဖြစ်ပြီး မျိုးစေ့ကိုအရင်ပျိုးထားပြီး ပျိုးပင်သက် (၁)လအကြားတွင် စတင်စိုက်ပျိုးရပါသည်။ ပန်းဂေါ်ဖီပင်ကို နိုဝင်ဘာလတွင် စိုက်ပျိုးပြီး (၁)ပင်နှင့် (၁)ပင်ခြား လက်မ(၂၀)ခြား၍ စိုက်ပျိူးထားကာ မေလမှာ စတင်ခူးဆွတ်ရောင်းချရမည်ဖြစ်ပါသည်။ ပန်းဂေါ်ဖီပင်ကို တစ်ကျင်းလျှင် (၁)ပင်ခန့် စိုက်ပျိုးပြီး အပင်ရေ (၄၀၀၀) စိုက်ဧကအနေဖြင့် ဧကဝက် ဖြစ်ပြီး ယခုလိုပူပြင်လာသည့် ရာသီဥတုအနေအထားအရ (၇)ရက်လျှင်(၁)ကြိမ် ရေသွင်းခြင်း သွင်းအားစုထည့်ခြင်းများ ဆောင်ရွက်ရပြီး မျိူးစေ့ဖိုးမှအစ စိုက်ပျိုးမြေပြုပြင်ခြင်း၊ သွင်းအားစုထည့်ခြင်း၊ ရေပေးသွင်းခြင်းနှင့် အလုပ်သမားငှားရမ်းခြင်း စုစုပေါင်းကုန်ကျစရိတ်အနေဖြင့် (၁၄)သိန်းခန့် ကုန်ကျကြောင်း အပင်အရေအတွက်(၄၀၀၀)ဖြစ်သည့်အတွက် အပွင့်(၄၀၀၀)ထွက်ရှိမည်ဖြစ်ပြီး (၁)ပွင့်လျှင် ပျမ်းမျှ(၁၀၀၀) ကျပ်နှုန်းဖြင့် ရောင်းချရလျှင် သိန်း(၄၀)ခန့်ရရှိမည်ဖြစ်၍ အကျိုးအမြတ်အနေဖြင့် ပန်းဂေါ်ဖီပင် ဧကဝက်စိုက်လျှင်သိန်း(၂၀)ကျော် အကျိုးအမြတ်ရရှိပြီး မိသားစုအတွက် စီးပွားဖြစ် မဟုတ်ပေမဲ့ စားဝတ်နေရေးအတွက် အထောက်အကူဖြစ်စေကြောင်း စိုက်ပျိုးသည့်တောင်သူ ဦးခိုင်ဇော်ထံမှသိရပါသည်။
၂၀၂၅ ခုနှစ်၊ ယခု မတ်လ ပထမအပတ် ကျွန်းလှမြို့တွင် ဖြစ်ပေါ်နေသော ပန်းဂေါ်ဖီပွင့် ဈေးနှုန်းအနေဖြင့် ပန်းဂေါ်ဖီ အပွင့်ကြီး တစ်ပွင့်လျှင်(၃၀၀၀)ကျပ်၊ ပန်းဂေါ်ဖီ အပွင့်လတ် တစ်ပွင့်လျှင် (၂၅၀၀)ကျပ်နှင့် ပန်းဂေါ်ဖီ အပွင့်သေး တစ်ပွင့်လျှင်(၂၀၀၀)ကျပ်ဈေးနှုန်းတို့ဖြင့် အရောင်းအဝယ် ဖြစ်လျက်ရှိသောကြောင့် ယခု ပန်းဂေါ်ဖီပွင့်ဈေးနှုန်းမျိုးဖြင့် ရောင်းချရလျှင် တွက်ခြေကိုက်ပြီး အကျိုးအမြတ်များသည့်အတွက် စိုက်ပျိုးသင့်ကြောင်း ပန်းဂေါ်ဖီပင်စိုက်ပျိုးသူမှ တိုက်တွန်းပြောကြား ချက်အရ သိရှိရပါသည်။
DOCA(စစ်ကိုင်း)