အမေရိကန်နိုင်ငံနှင့် ကုန်သွယ်ရေးစစ်ပွဲ ဖြစ်ပေါ်နေချိန်တွင် စားနပ်ရိက္ခာဖူလုံမှုကို မြှင့်တင် နိုင်ရန်အတွက် ကမ္ဘာ့အကြီးဆုံး လယ်ယာထွက်ကုန် တင်သွင်းသူဖြစ်သော တရုတ်နိုင်ငံအနေဖြင့် ၎င်း၏ ၂၀၂၅ ခုနှစ်အတွက် နှစ်စဉ်ကောက်ပဲသီးနှံထုတ်လုပ်ရန် လျာထားချက်ကို ယခင်နှစ်ထက် ပိုမိုမြင့်မားစွာ တိုးမြှင့်သတ်မှတ်လိုက်ကြောင်း သိရှိရသည်။
တရုတ်အစိုးရ၏ နှစ်စဉ်လုပ်ငန်းဆောင်ရွက်မှု အစီရင်ခံစာတစ်စောင်ကို တွေ့မြင်ခဲ့ရသည့် Bloomberg News သတင်းဌာန၏ ဖော်ပြချက်ကို ကိုးကားလျက် တရုတ်နိုင်ငံသည် ၂၀၂၄ ခုနှစ်၌ ထုတ်လုပ်ရန် လျာထားခဲ့သည့် ကောက်ပဲသီးနှံ တန်ချိန် ၆၅၀ သန်းထက် များစွာပိုမိုလျက် ၂၀၂၅ ခုနှစ်တွင် တန်ချိန် သန်း ၇၀၀ အထိ လျာထားချက်တိုးမြှင့်ခဲ့သည်ဟု The Edge Malaysia သတင်း ဌာနက ဖော်ပြထားသည်။
အမျိုးသားပြည်သူ့ကွန်ဂရက်၏ နှစ်ပတ်လည်ညီလာခံ အစည်းအဝေးကို ခေါ်ယူကျင်းပခဲ့ ပြီးနောက် တရုတ်နိုင်ငံနှင့် ၎င်း၏ အဓိက လယ်ယာထွက်ကုန်ပေးသွင်းသူ အမေရိကန်နိုင်ငံတို့ အကြား ကုန်သွယ်ရေးတင်းမာမှုများ မြင့်တက်လာချိန် အဆိုပါလျာထားသတ်မှတ်ချက်ကို ထုတ် ဖော် ပြောဆိုခဲ့ခြင်းဖြစ်သည်။ အမေရိကန်သမ္မတ Donald Trump ၏ တရုတ်နိုင်ငံမှ သွင်းကုန် အပေါ် အကောက်ခွန်နှုန်းထားအသစ်များ တိုးမြင့်ချမှတ်မှုကို တုံ့ပြန်မှုအဖြစ် အမေရိကန်နိုင်ငံထံမှ တင်သွင်းသော ပဲပုပ်၊ ပြောင်းနှင့် ဂျုံတို့အပါအဝင် လယ်ယာထွက်ကုန်များအပေါ် အကောက်ခွန် စည်းကြပ်မှုနှုန်းထားကို ၁၀ ရာခိုင်နှုန်းမှ ၁၅ ရာခိုင်နှုန်းအတွင်း ထပ်မံတိုးမြှင့်မည်ဟု တရုတ်အစိုးရ က မတ်လ ၄ ရက်နေ့၌ ကြေညာချက်ထုတ်ပြန်ခဲ့သည်။ ထို့အပြင် အမေရိကန် ကုမ္ပဏီ ၃ ခုထံမှ ပဲပုပ်တင်သွင်းမှုနှင့် အမေရိကန်၏ သစ်တောထွက်ကုန်များ ဝင်ရောက်မှုတို့ကိုလည်း ဆိုင်းငံ့ထား ခဲ့သည်။
တရုတ်နိုင်ငံ၏ စားနပ်ရိက္ခာဖူလုံမှု သေချာခိုင်မာစေရေးအတွက် ပြည်တွင်းရှိ လုပ်ငန်းများ အားလုံးသည် ပခုံးထမ်းမျှဝေ ဆောင်ရွက်ရန် တာဝန်ရှိကြောင်း၊ နိုင်ငံ၏ စပါးကျီ မြဲမြံခိုင်မာရေး အတွက် အားထုတ်ကြိုးပမ်း ကြရမည်ဖြစ်ကြောင်းဖြင့် တရုတ်နိုင်ငံဝန်ကြီးချုပ် Li Qiang က အမျိုးသားပြည်သူ့ကွန်ဂရက် နှစ်ပတ်လည်ညီလာခံ ဖွင့်ပွဲအခမ်းအနားတွင် အမှာစကား ပြောကြား ခဲ့သည်။
တရုတ်နိုင်ငံ အနေဖြင့် ကောက်ပဲသီးနှံ စိုက်ဧက တည်ငြိမ်မှုရှိအောင် ထိန်းသိမ်းလျက် သီးနှံ များ၏ အရေအတွက်နှင့် အရည်အသွေးတို့ကို တိုးတက်ကောင်းမွန်အောင် အလေးပေးလုပ်ဆောင် မည်ဖြစ်ကြောင်း၊ မကြာသေးမီက ပဲပုပ်စိုက်ပျိုးမှု တိုးတက်ခဲ့ခြင်းအပေါ် အခြားဆီထွက်သီးနှံများ တိုးချဲ့စိုက်ပျိုးနိုင်ရေး လေ့လာဆောင်ရွက်သွားမည်ဖြစ်ကြောင်း၊ ထို့အပြင် ကောက်ပဲသီးနှံများ၊ ဝါဂွမ်း၊ သကြား၊ သားငါးနှင့် ဓာတ်မြေဩဇာများ သိုလှောင်နိုင်ရေးအတွက် ခေတ်မီသိုလှောင်ရုံများ တည်ဆောက်ခြင်းကိုလည်း တိုးမြှင့်လုပ်ကိုင်မည်ဖြစ်ကြောင်း ဝန်ကြီးချုပ် Li က ပြောဆိုခဲ့သည်။
အမေရိကန်နှင့် ကုန်သွယ်ရေးတင်းမာမှု မြင့်တက်လာမှုအရ တရုတ်နိုင်ငံသည် ပြည်ပမှ ဆီထွက်သီးနှံ တင်သွင်းနေရမှုအပေါ် အမှီပြုနေရခြင်းကို လျှော့ချရန်၊ အထူးသဖြင့် အမေရိကန်၏ ထုတ်ကုန်များတင်သွင်းမှုကို လျှော့ချနိုင်ရန်အတွက် ပြည်တွင်း ပဲပုပ်စိုက်ပျိုးထုတ်လုပ်မှုကို တွန်း အားပေး မြှင့်တင်လုပ်ဆောင်လျက်ရှိသည်။ ထို့အပြင် ပဲပုပ်ကြိတ်ဖတ်အား မွေးမြူရေးအစားအစာ အဖြစ် အသုံးပြုနေရမှုကို လျှော့ချဖြတ်တောက်ရန်အတွက် အခြားအစားထိုးနိုင်မည့် နည်းလမ်း များကိုလည်း ရှာဖွေလျက်ရှိသည်။
တရုတ်နိုင်ငံအနေဖြင့် ၂၀၂၄ ခုနှစ်အတွင်း ကောက်ပဲသီးနှံတန်ချိန်ပေါင်း ၇၀၆.၅ သန်းခန့် ကို ထုတ်လုပ်နိုင်ခဲ့ပြီး ယခင်နှစ်ကထက် ၁.၆ ရာခိုင်နှုန်း တိုးတက်ခဲ့ကြောင်း၊ ပြည်တွင်း၌ အထွက် ပိုလျှံမှုနှင့် ဝယ်လိုအား နည်းပါးနေမှုတို့အရ သီးနှံဈေးနှုန်းများသည် နှစ်ကာလကြာရှည်စွာ နိမ့်ကျ နေခဲ့ပြီး လယ်သမားများကို အကာကွယ်ပေးနိုင်ရေးအတွက် အစိုးရသည် ပြည်ပမှ တင်သွင်းမှုများ ကို ကန့်သတ်ဖွယ်ရှိကြောင်း The Edge Malaysia သတင်းဌာနက ဖော်ပြထားသည်။
Source: The Edge Malaysia, 05 Mar 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)