ကမ္ဘောဒီးယားနိုင်ငံ ကောက်ခွန်နှင့် ကုန်စည်စီးဆင်းမှုဦးစီးဌာန(GDCE) သည်သီဟိုဠ်စေ့ ပြုပြင်ခြင်း၊ တင်ပို့ခြင်းနှင့်တင်သွင်းခြင်းအတွက် အစိုးရအကောက်ခွန်မက်လုံးများဆိုင်ရာ အလုပ်ရုံဆွေးနွေးပွဲကို ၅-၃-၂၀၂၅ ရက်နေ့က ကျင်းပပြုလုပ်ခဲ့သည်။ ကမ္ဘောဒီးယားနိုင်ငံ၊ သီဟိုဠ်စေ့အသင်း (CAC) ဥက္ကဋ္ဌ၊ Uon Silot ၊ (CAC) ဒုတိယ ဥက္ကဋ္ဌ၊ Suy Kokthhean၊ သီဟိုဠ်စေ့စိုက်ပျိုးထုတ်လုပ်သူများနှင့် တင်ပို့ရောင်းချသူများ၊ ဒေသခံများ စုစုပေါင်း (၄၀) ဦးခန့် တက်ရောက်ခဲ့ကြသည်။ အလုပ်ရုံဆွေးနွေးပွဲသည် သီဟိုဠ်စေ့ကဏ္ဍအတွင်း ယှဉ်ပြိုင်နိုင်စွမ်းကို မြှင့်တင်ပေးနိုင်သည့် အကောက်ခွန်မက်လုံးများကို မြှင့်တင်ပေးရန်၊ ထိုကဏ္ဍအတွင်း ရင်ဆိုင် နေရသော အဓိကစိန်ခေါ်မှုများကိုဖော်ထုတ်ရန်နှင့် တိုးတက်မှုများကို ပံ့ပိုးကူညီရန်အတွက် ရည်ရွယ် ကြောင်း (GDCE) မှ ညွှန်ကြားရေးမှူး Bun Chiv ကပြောကြားခဲ့သည်။ Uon Silot က သီဟိုဠ်စေ့စိုက်ပျိုးခြင်း၊ ရိတ်သိမ်းခြင်း၊ ပြုပြင်ခြင်းနှင့် တင်ပို့ခြင်းတို့တွင် အခြောက်ခံခြင်းနှင့် သိုလှောင်ရုံမရှိခြင်း၊ ရင်းနှီးမြှုပ်နှံမှုအတွက် အရင်းအနှီးမလုံလောက်ခြင်းနှင့် ထုတ်လုပ်မှုတွင် စက်ကိရိယာမလုံလောက်ခြင်းစသည့် စိန်ခေါ်မှုများစွာကို ရင်ဆိုင်နေရကြောင်း ပြောကြားခဲ့ သည်။ (CAC) ၏ ဒုတိယ ဥက္ကဋ္ဌ၊ Suy Kokthhean က ဆွေးနွေးပွဲတွင် အဓိက ဆွေးနွေးခဲ့သည့် အကြောင်းအရာများတွင် အသင်းအဖွဲ့များထံမှ စုဆောင်းထားသော အချက်အလက်များနှင့် နိုင်ငံတစ်ဝှမ်းသီဟိုဠ်စေ့ကဏ္ဍတွင် ရင်ဆိုင်နေရသောစိန်ခေါ်မှုများ ပါဝင်ကြောင်းပြောကြားခဲ့ သည်။ ကမ္ဘောဒီးယားနိုင်ငံမှ အခြားနိုင်ငံများသို့ သီဟိုဠ်စေ့တင်ပို့မှုနှင့် ပတ်သက်သည့် စာရွက် စာတမ်းများကို ရိုးရှင်းလွယ်ကူစေရန် (CAC) မှ တောင်းဆို ထားကြောင်း Suy Kokthhean က ပြောကြားခဲ့သည်။
DOCA(ရန်ကုန်)