မြေပဲပင်ပေါက်များသည် တစ်နှစ်မှတစ်ခါ စားရခြင်းဖြစ်ပြီး မိုးရွာမှသာ မြေပဲခင်းမှ မြေပဲစို့လေးများထွက်ပေါ်လာခြင်း ဖြစ်ပါတယ်။ မြေပဲပင်စို့များကို နှုတ်ယူရာတွင် တစ်ဧကလျှင် ပိဿာချိန် ၁၀ မှ ၁၅အထိ နှုတ်ယူရရှိကြပြီး မြေပဲနှုတ်ယူစဉ်အချိန်က မြေပဲလက်ကျန် ကျန်ရှိခဲ့မှု့ အနည်း အများပေါ်မူတည်ပြီး ရရှိခြင်းဖြစ်ပါသည်။ ရောင်းချသူများအနေဖြင့် မြေပဲကို မြေပဲပင်ပေါက်အဖြစ် စိုက်ပျိုးရန် အရင်းအနှီးများသောကြောင့် ပြုလုပ်ရောင်းချနိုင်ခြင်းမရှိသော်လည်း မြေပဲပင် နှုတ်ယူခဲ့စဉ်က ကျန်ခဲ့သည့် လက်ကျန်များကြောင့်သာ စားသုံးသူများသို့ ရောင်းချနိုင်ခြင်း ဖြစ်ပါသည်။ မြေပဲပင်ပေါက်ကို ထိပ်၊ အရွက်၊ အညွှန့်ကလေးများကိုဖဲ့ပြီး ကြော်၍သော် လည်းကောင်း၊ ပြုတ်ကြော်လုပ်၍လည်းကောင်း စားသုံးကြပါသည်။ ယခုရက်အတွင်း မိုးကောင်းလာသည်နှင့်အတူ မြေပဲနှုတ်သိမ်းရာတွင် ကျန်ရှိသည့် မြေပဲများမှ မြေပဲအစို့များထွက်လာကြောင်း သိရပါသည်။ ပြည်ဈေးကွက်တွင် မြေပဲပင်ပေါက် တစ်ပိဿာလျှင် ၄၀၀၀ကျပ်မှ ၄၂၀၀ကျပ်ထိရှိပြီး မြေပဲဆန် တစ်တင်းလျှင် ၆၀၀၀၀ကျပ်မှ ၆၅၀၀၀ကျပ် အထိရှိကြောင်း သိရှိရပါသည်။
DOCA(ပဲခူး)