မြန်မာနိုင်ငံသည် ဆန်နှင့်ကောက်ညှင်း အထွက်ကောင်းသောနိုင်ငံဖြစ်သည့်အလျောက် မြန်မာတို့သည် မုန့်ပဲအမျိုးမျိုး စီမံလုပ်ကိုင်ကြရာ၌ ဆန်နှင့်ကောက်ညှင်းကို မူလထား၍ အုန်းသီး၊ သကြား၊ ထန်းလျက်၊ နှမ်း၊ မြေပဲ စသော ပြည်တွင်းထွက် အသီးအပွင့်တို့ကို အသိုင်းအဝန်း ပြု၍ စားသောက်ကြ လေ့ရှိကြပါတယ်။ မြန်မာမုန့်များကို လုပ်ကိုင်ရာ၌ အရသာ ခြောက်ပါးအနက် အချိုနှင့်အဆိမ့်ကိုပို၍ အလေးထားသည်ကို များသောအားဖြင့် တွေ့ရသည်။ မြန်မာ့မုန့်ပဲသရေစာများအနက်မှ ဧရာဝတီတိုင်း အတွင်းမှ ထွက်ရှိသည့် သုံးထောင့်မုန့်များမှာလည်း လွန်စွာမှ နာမည်ကြီးလှပါတယ်။ သုံးထောင့်မုန့်ဆိုတာ အမှန်ကတော့ တြိဂံပုံစံဘဲ ဖြစ်ပြီး စမူစာမုန့်နှင့် အလားသဏ္ဍန်ပါတယ်။ သို့သော် မုန့်အလယ်တွင် ထည့် ထားသော မုန့်ဌာပနာမှာ မတူညီ ကြပါ။ သုံးထောင့်မုန့် အလယ်တွင် ထည့်ထားသော မုန့်ဌာပနာမှာ ကန်စွန်းဥယို၊ ပိန်းဥယို၊ ပဲယို၊ ဖရုံယို ၊ နှင့် အုန်းယို တို့အား ဌာပနာ အဖြစ် ထည့်သွင်း ကြလေ့ရှိပါတယ်။ သုံးထောင့်မုန့် အလယ်တွင် ထည့်ထားသော ယိုများမှာ ဧရာဝတီတိုင်းဒေသထွက် အသီးအနှံများအား ပြုလုပ်ထားသည့်အတွက် လတ်ဆက်၍ အရသာမှာ ထူးကဲနေခြင်း ဖြစ်ပါသည်။ ဧရာဝတီတိုင်း အတွင်း ရှိ နာမည်ကြီး လူကြိုက်များလှသည့် သုံးထောင့်မုန့် လုပ်ငန်းများမှာတော့ ဂွတ်ရှယ်၊ Top One ၊ မိုး ၊ သုခ ၊ ချိုချို နှင် ထူးရှယ် စသည့်အမှတ်တံဆိပ်များ သည် လူကြိုက်များလှပါသည်။ သုံးထောင့်မုန့်လုပ်ငန်းများ ဆောင်ရွက်ရန်အတွက် လုပ်ငန်းရှင်များအနေဖြင့် မတည် ရင်းနှီးငွေ (၁၅၀) သိန်းဖြင့် လုပ်ငန်းများအာ လုပ်ကိုင်နေကြပြီး တစ်နေ့လျှင် သုံးထောင့်မုန့်(၅) ခု ပါသည့် ဗူးအရေအတွက်(၃၅၀) ဗူးအား ထုတ်လုပ်လျက်ရှိပါကြောင်း နှင့် တစ်နှစ်လျှင် အမြတ်ငွေ သိန်း(၅၀) အမြတ်ရှိပါကြောင်း ရေးသားတင်ပြလိုက်ရပါသည်။
DOCA(ဧရာဝတီ)