မအူပင်မြို့သည် ကျေးရွာအုပ်စု (၇၆)အုပ်စု ရှိပြီး ယခုအခါတွင် ကျေးရွာအုပ်စု ၃ပုံ ၂ပုံတွင် နွေစပါးနှင့် ရေကျနောက်စိုက် စပါးများစိုက်ပျိုးလျက်ရှိကြောင်း မအူပင်မြို့နယ် လယ်ယာမြေစီမံခန့်ခွဲရေးဦးစီးဌာန၏ စာရင်းများအရ သိရှိရသည်။
မအူပင်မြို့နယ်၏ နွေစပါး လျာထားဧက (၈၃၉၄၈)ဧကစိုက်ပျိုးလျှက်ရှိကြောင်း ၊ ယခုတပေါင်းလတွင် နွေစပါးနှင့် ရေကျနောက်စိုက်စပါးများဖြစ်သော စဖိုးသာ၊ ကရင်မစပါး၊ ဆင်းသုခစပါးနှင့် ရက်(၉၀)စပါးများသည် ရိတ်သိမ်းပြီး ပွဲစားများနှင့် မအူပင်မြို့ပေါ်ရှိ ဆန်စက်များသို့ စပါးအခြောက် စက်အရောက်ဈေး တင်း(၁၀၀)လျှင် ၁၆၅၀၀၀၀/-ကျပ်ဖြင့် အရောင်းအဝယ်ဖြစ်လျှက်ရှိကြောင်း၊ GW-11 စပါးသာလျှင် (၁၅၅၀၀၀၀)ကျပ်ဖြင့် အရောင်းအဝယ်တွင်ကျယ်နေကြောင်း မအူပင်မြို့ ရေလဲလမ်းဘေးရှိ ဆန်စက်များဖြစ်သော ပြည့်ဖြိုးကြွယ်၊ စိုးမိုးအောင်၊ ထွန်းလင်းကျော်၊ စိုးမိသားစု၊ ကျော်ပဒေသာ ဆန်စက်များမှ စက်တာဝန်ခ့နှင့် စက်ပိုင်ရှင်များပြောပြချက်အရသိရသည်။
စပါးဈေးထိုသို့ အကျဘက်သို့ ရောက်ရှိရခြင်းမှာ ရန်ကုန် ဘုရင့်နောင် ပွဲရုံမှ ဝယ်လိုအားကျဆင်းပြီး ဒေသတွင်းဈေးကွက်မှာ အေးနေသောကြောင့်လည်းကောင်း၊ ၂၀၂၄-၂၀၂၅ခုနှစ်ထွက်မိုးစပါးများ မိုးများခြင်းကြောင့် အထွက်နောက်ကျခြင်း စပါးရေထိ၍ မိုးစပါးအထွက်နည်းခြင်း၊ နွေစပါးရိတ်သိမ်းချိန် အထွက်နှုန်းကောင်းသော်လည်း ဖြုတ်ပိုး ကျဆင်းခြင်းများ ရှိသဖြင့် ယနေ့ စပါးဈေး အကျဘက်သို့ ရောက်ရှိနေကြောင်း စပါးစိုက်တောင်သူ ဦးထွန်ဝေထံမှ သိရှိရပါသည်။
DOCA (ဧရာဝတီ)