ကလေးမြို့နယ်အတွင်းတွင် တောင်သူများ အပိုဝင်ငွေရရှိရန်အတွက် ဒေသတွင်းစားသုံးရန် ခရမ်းချဉ်သီးများကို လှိုင်သာယာရပ်ကွက်၊ မြို့သာရပ်ကွက်၊ ဖောင်ကူးနှင့် သာစည်ကျေးရွာ နယ်တစ်ဝိုက်တွင် စိုက်ပျိုးကြပါသည်။ ခရမ်းချဉ်သီးစတင်ပေါ်စတွင် မုံရွာ၊ မန္တလေးမြို့မှလာသည့် အသီးများကို ဝယ်ယူစားသုံးရပြီး ဒေသတွင်းထွက်ရှိပါက ဒေသထွက် ခရမ်းချဉ်သီးကို ဝယ်ယူစားသုံးကြပါသည်။ ဒေသတွင်းမှ ထွက်ရှိသော ခရမ်းချဉ်သီးများကို တမူးမြို့၊ ကလေးဝမြို့၊ အထက် ဟုမ္မလင်း၊ ဖောင်းပြင်၊ မော်လိုက်မြို့များသို့ သေတ္တာများဖြင့် တင်ပို့ရောင်းချလျှက် ရှိပါသည်။ စျေးနှုန်းအနေဖြင့် ( ၁ ) ပိဿာလျှင် လက္ကား ( ၈၀၀/- )၊ လက်လီ ( ၁၀၀၀/- မှ ၁၂၀၀/- ) ပေါက်စျေးနှုန်းဖြင့် ဈေးကွက်တွင်း ရောင်းဝယ်လျက် ရှိပါသည်။ မိုးတွင်ကာလတွင် ယခင်နှစ်များက မုံရွာမြို့မှဝယ်ယူပြီး ဒေသပေါက်စျေး ( ၁ ) ပိဿာလျှင် ( ၃၀၀၀/- မှ ၄၀၀၀/- ) ခန့် ပေးဝယ်ရပြီး ယခုအခါ ချင်းတောင်မှတင်ပို့လာသည့် ခရမ်းချဉ်သီးများ လုံလောက်စွာရရှိသဖြင့် ကလေးမြို့ အနေဖြင့် သင့်တင့်သော စျေးဖြင့်သာ ဝယ်ယူစားသုံးနေရပါသည်။ ချင်းတောင်ဒေသမှ ထွက်ရှိသော ခရမ်းချဉ်သီးများ စိုက်ပျိုးထွက်ရှိမှုအခြေအနေများကို ခရမ်းချဉ်သီး ရောင်းဝယ်သူများထံ မေးမြန်းရာ မုံရွာမြို့မှစိုက်ပျိုးသည့်မျိုးစေ့များကို ဝယ်ယူ၍စိုက်ပျိုးရန်အတွက် နည်းလမ်းကောင်းများအား ဖြန့်ဝေပေးသည့်အတွက် စိုက်ပျိုးရေးနည်း စနစ်ကောင်းမွန်လာပြီး အထွက်နှုန်းကောင်းလာခဲ့ခြင်း ဖြစ်ပါကြောင်း သတင်းရရှိပါသည်။
DOCA(စစ်ကိုင်း)