ထိုင်းနိုင်ငံမော်တော်ယာဉ်အဖွဲ့အစည်း (TAI) က ပြည်တွင်းကားအစိတ်အပိုင်း ထုတ်လုပ်သူများအား မော်တော်ယာဉ်လုပ်ငန်းနှေးကွေးနေမှုကြောင့် အလုပ်အကိုင် အခွင့်အလမ်းသစ်များ ရှာဖွေရန်နှင့် ရထားလမ်းအခြေခံအဆောက်အအုံဖွံ့ဖြိုးတိုးတက်ရေး အတွက် အစိတ်အပိုင်းများ ထုတ်လုပ်ရန် တိုက်တွန်းခဲ့ကြောင်း သိရပါသည်။ ထိုအကြောင်းကို ထိုင်းနိုင်ငံတွင် ရထားလမ်းနှင့် အခြေခံအဆောက်အအုံစီမံကိန်းများတွင် ပူးပေါင်းဆောင်ရွက်ရန် TAI နှင့် Rail Technology Research and Development Agency တို့ကြား နားလည်မှုသဝဏ်လွှာ လက်မှတ်ရေးထိုးပြီး နောက် ပြောကြားခဲ့ခြင်းဖြစ်ကြောင်း သိရပါသည်။ ထိုသဘောတူညီချက်သည် ရထားလမ်းစနစ် များတိုးတက်စေရေးကူညီရန်၊ ကားအစိတ်အပိုင်း ထုတ်လုပ်သူများ နည်းပညာသစ်များရရှိရန်နှင့် ၎င်းတို့၏ကျွမ်းကျင်မှုများအား ရထားလမ်း ဆောက်လုပ်ရန်အတွက် ပစ္စည်းများထုတ်လုပ်ရာတွင် အသုံးချရန် ရည်ရွယ်ကြောင်း သိရ ပါသည်။ အာဏာပိုင်များသည်လည်း ထိုစီးပွားရေးအသစ်သို့ ဝင်ရောက်လိုသည့် ကားအစိတ်အပိုင်းထုတ်လုပ်သူများကို ပံ့ပိုးပေးသွားမည်ဟုသိရပါသည်။ ထိုင်းနိုင်ငံသည် သန့်စင်သော စွမ်းအင်သို့အသွင်ကူးပြောင်းနေသောကြောင့် မော်တော်ကား လုပ်ငန်းသည် ရေနံအပေါ်မီခိုမှုနည်းပါးသည့်နည်းပညာသို့ ကူးပြောင်းမှု၏ရိုက်ခတ်မှုကို ခံစားရ လျှက်ရှိကြောင်း သိရပါသည်။ TAI ၏ ဥက္ကဌ Kriengsak Wongpromrat က ထိုပူးပေါင်း ဆောင်ရွက်မှုသည် ကားအစိတ်အပိုင်းထုတ်လုပ်သူများအား ရထားလမ်းဖွံ့ဖြိုးတိုးတက်ရေးတွင် ပါဝင်ရန်အတွက် ၎င်းတို့၏ထုတ်လုပ်မှုကိုချိန်ညှိရန် လမ်းကြောင်းဖန်တီးပေးနိုင်မည်ဟု မျှော်လင့်ကြောင်း ပြောကြားခဲ့ပါသည်။ Rail Technology Research and Development Agency ၏ ဥက္ကဌ Julathep Kajornchaiyakul က ထိုပူးပေါင်းဆောင်ရွက်မှုသည် ရထားလမ်းစနစ် စီမံကိန်း သို့ အကျိုးအမြတ်များသယ်ဆောင်လာနိုင်မည်ဖြစ်ကြောင်းနှင့် ထိုင်းနိုင်ငံသည် နှစ်လမ်းသွား ရထားလမ်းများနှင့် အမြန်ရထားစနစ်စီမံကိန်းများ တည်ထောင်လျှက်ရှိကြောင်း ပြောကြားခဲ့ ပါသည်။ ထိုင်းအစိုးရသည် ဘတ် ၂၈၀ ဘီလီယံကျော် ဘက်ဂျက်ရရှိထားသည့် အရှည် ၁၄၈၈ ကီလိုမီတာရှိသော နှစ်လမ်းသွားရထားလမ်း တည်ဆောက်မှု ဒုတိယအဆင့်ကို ဧပြီလတွင် စတင် ရန်စီစဉ်ထားကြောင်း သိရပါသည်။ ကားအစိတ်အပိုင်းထုတ်လုပ်သူများသည် လျှပ်စစ်ဖြင့်ရွေ့လျားမှုနည်းပညာကိုချိန်ညှိရန် လိုအပ် သောနည်းပညာပိုင်းဆိုင်ရာစိန်ခေါ်မှုနှင့် ရင်ဆိုင်ရရုံ သာမက ပြည်တွင်းကားရောင်းချမှု နှေးကွေးခြင်း၏ သက်ရောက်မှုနှင့်ပါ ရင်ဆိုင်နေရကြောင်း သိရပါသည်။ ကားထုတ်လုပ်သူများ သည်လည်း လွန်ခဲ့သည့်နှစ်တွင် ကားရောင်းချရမှု သိသာစွာ ကျဆင်းခဲ့ပြီးနောက် ထုတ်လုပ်မှုကို လျှော့ချရန်လိုအပ်ကြောင်း သိရှိရပါသည်။
Bangkok Post
DOCA(ရန်ကုန်)