ထိုင်းနိုင်ငံ၏ ဖေဖော်ဝါရီလတင်ပို့မှု ခန့်မှန်းချက်များကို ကျော်ဖြတ်ပြီး ၁၄ ရာခိုင်နှုန်း မြင့်တက်

            ယခုနှစ်၏လက်ကျန်ကာလများတွင် အမေရိကန်ကုန်သွယ်ရေးမူဝါဒများအပေါ် မသေချာ မရေရာမှုများရှိနေသော်လည်း ထိုင်းနိုင်ငံ၏ တင်ပို့မှုသည် ဖေဖော်ဝါရီလတွင် ၈ လဆက် မြင့်တက်ခဲ့ပြီး ခန့်မှန်းမှုများကို ကျော်ဖြတ်နိုင်ခဲ့ကြောင်း စီးပွားကူးသန်းဝန်ကြီးက ပြောကြား ခဲ့ပါသည်။ ထိုင်းနိုင်ငံ၏ အဓိကမောင်းနှင်အားဖြစ်သည့်ပို့ကုန်သည် ဖေဖော်ဝါရီလတွင် ၁၄ ရာခိုင်နှုန်း မြင့်တက်ခဲ့ပြီး ယခင်ခန့်မှန်းထားသည့် ၉.၇ ရာခိုင်နှုန်းနှင့် ဇန်နဝါရီလက ၁၃.၆ ရာခိုင်နှုန်းထက် မြင့်တက်ခဲ့ကြောင်း သိရပါသည်။ ယခုနှစ်၏ ပထမ ၃ လပတ်ကာလတွင် တင်ပို့မှုမှာ ယခင်နှစ် တူညီသည့်ကာလထက် ၁၀ ရာခိုင်နှုန်းကြီးထွားနိုင်ကြောင်း သိရပါသည်။ စီးပွားကူးသန်းဝန်ကြီး Pichai Naripthaphan ကကုန်သွယ်မှုနှင့် ရင်းနှီးမြှုပ်နှံမှုများ အားကောင်းလျှက်ရှိပြီး လွတ်လပ် သောကုန်သွယ်ရေးညှိနှိုင်းဆွေးနွေးမှုများက တင်ပို့မှု အရှိန်မြှင့်တင်ရန် ကူညီပေးနိုင်မည်ဟု ပြောကြားခဲ့ပါသည်။ ၂၀၂၄ ခုနှစ်တွင် ထိုင်းနိုင်ငံ၏ တင်ပို့မှုသည် အမေရိကန်ဒေါ်လာ ၃၀၁ ဘီလီယံဖြင့် ၅.၄ ရာခိုင်နှုန်းမြင့်တက်ခဲ့ပြီး ဝန်ကြီးဌာန က ယခုနှစ်အတွက် ကြီးထွားနှုန်းကို ၂ ရာခိုင်နှုန်းမှ ၃ ရာခိုင်နှုန်းကြား ခန့်မှန်းထားကြောင်း သိရပါသည်။ ထိုင်းနိုင်ငံကုန်သွယ်ရေးမူဝါဒ နှင့် မဟာဗျူဟာရုံး၏ အကြီးအကဲ Poonpong Naiyanapakorn က တင်ပို့မှုသည် ၃ ရာခိုင်နှုန်း ကျော်နိုင်ချေရှိကြောင်း၊ လာမည့်ဒုတိယ ၃ လပတ်ကာလတွင် စိုက်ပျိုးမွေးမြူရေးထုတ်ကုန်များ သည် အပေါင်းလက္ခဏာဆောင်လာနိုင် ကြောင်းနှင့် ယခုနှစ်၏ပထမ ၂ လတွင် ထိုင်းတင်ပို့မှုသည် အမေရိကန်၏ ကုန်သွယ်ရေးမူဝါဒ၏ သက်ရောက်မှုကိုမခံစားခဲ့ရကြောင်း ပြောကြားခဲ့ပါသည်။ ဝန်ကြီးဌာနသည်လည်း ကမ္ဘာ့ ကုန်သွယ်မှုအခြေအနေများကို အနီးကပ်စောင့်ကြည့်လျှက်ရှိကြောင်း သိရပါသည်။ ထိုင်းနိုင်ငံ သည် လွန်ခဲ့သည့်နှစ်က ကုန်သွယ်ရေးပိုငွေ အမေရိကန်‌ ဒေါ်လာ ၃၅.၄ ဘီလီယံ ပြခဲ့သည့် အမေရိကန်ထံမှ ပိုမိုတင်သွင်းရန်ကြိုးပမ်းနေကြောင်း သိရပါသည်။ ထိုင်းစီးပွားကူးသန်း ဝန်ကြီးဌာန၏ အမြဲတန်းအတွင်းဝန် Vuttikrai Leewiraphan ကထိုင်းနိုင်ငံသည် ပုဂ္ဂလိက ကဏ္ဍနှင့်ဆွေးနွေးလျှက်ရှိပြီး အမေရိကန်တာဝန်ရှိသူများနှင့် ကုန်သွယ်ရေး ပြောဆို ဆွေးနွေး ရန်အလိုရှိကြောင်းနှင့် ထုတ်ကုန်သို့မဟုတ် များစွာသောအကြောင်းအရာများ အပေါ်ဆွေးနွေးရန် အဆင်သင့်ဖြစ်နေကြောင်း ပြောကြားခဲ့ပါသည်။ ဝန်ကြီး Mr Pichai ၏ ကုန်သွယ်ရေး ပိုငွေပြနေ သော်လည်း ထိုင်းနိုင်ငံသည် အမေရိကန်၏ အကောက်ခွန်တိုးမြှင့်မှုများနှင့် မရင်ဆိုင်ရဟု မျှော်လင့်ကြောင်း ယခင်ကပြောကြားခဲ့မှုသည် ဆွေးနွေးရမည့်အကြောင်း အရာတစ်ခုဖြစ်လာ နိုင်ကြောင်း သိရပါသည်။ ဖေဖော်ဝါရီလတွင် ထိုင်းနိုင်ငံ၏အကြီးမားဆုံး ဈေးကွက်ဖြစ်သည့် အမေရိကန်သို့တင်ပို့မှုသည် ၁၈.၃ ရာခိုင်နှုန်းမြင့်တက်ခဲ့ပြီး တရုတ်သို့ တင်ပို့ မှုမှာ ၂၂.၄ ရာခိုင်နှုန်း မြင့်တက်ခဲ့ကြောင်း သိရပါသည်။ ဖေဖော်ဝါရီလတွင် ထိုင်းနိုင်ငံ၏ ဆန်တင်ပို့မှုမှာ ယခင်နှစ် ဖေဖော်ဝါရီလထက် ၃၃.၁ ရာခိုင်နှုန်းကျဆင်းခဲ့ကြောင်းသိရပါသည်။ အိန္ဒိယပြီးနောက် ကမ္ဘာ့ဒုတိယအကြီးမားဆုံးဆန်တင်ပို့သည့် ထိုင်းနိုင်ငံသည် ယခင်နှစ်က ဆန် တန်ချိန် ၉.၉၅ သန်းတင်ပို့ခဲ့သော်လည်း ယခုနှစ်တွင် အိန္ဒိယကဆန်တင်ပို့မှုပြန်လည်စတင်သော ကြောင့် ၇.၅ သန်းတင်ပို့ရန် ခန့်မှန်းရကြောင်း စီးပွားကူးသန်းဝန်ကြီးဌာန၏ အဆိုအရ သိရပါသည်။ ဖေဖော်ဝါရီလတွင် ထိုင်းနိုင်ငံတင်သွင်းမှုမှာ ၄ ရာခိုင်နှုန်းမြင့်တက်ခဲ့ပြီး ခန့်မှန်းထား သည့် ၄.၈ ရာခိုင်နှုန်းထက် နည်းပါးခဲ့ကာ ကုန်သွယ်ရေးပိုငွေ အမေရိကန်ဒေါ်လာ ၂ ဘီလီယံရရှိ ခဲ့ပြီး ခန့်မှန်းထားသည့် ပိုငွေ ၀.၇ ဘီလီယံထက် များပြားခဲ့ကြောင်း သိရှိရပါသည်။

Bangkok Post

DOCA(ရန်ကုန်)