“ဘရာဇီးငှက်ပျောရိတ်သိမ်းမှုနှင့်စျေးနှုန်းစျေးကွက်အခြေအနေ”

    မန္တလေးတိုင်းဒေသကြီး၊ကျောက်ဆည်ခရိုင်တွင် ငှက်ပျောစိုက်ဧက(၃၁၁၃)ဧကစိုက်ပျိုးထား ရှိပြီး၂၀၂၅ခုနှစ်၊မတ်လဆန်းထိ (၃၀၀၅)ဧက ရိတ်သိမ်းပြီးဖြစ်ကြောင်း ခရိုင်ကြေးတိုင်နှင့်မြေစာရင်း ဦးစီးဌာန၏စာရင်းများအရသိရှိရပါသည်။ငှက်ပျောစိုက်ပျိုးရာတွင် တစ်ပင်နှစ်တစ်ပင်(၅-၆)ပေခွာ၍ စိုက်ပျိုးရကြောင်း၊(၁)ဧကလျှင် တစ်ပင်နှင့်တစ်ပင် ပေးကွာခြားမှုပေါ်မူတည်၍ အပင်(၁၇၀၀)ဝန်းကျင် ဝင်ဆံ့ကြောင်း၊မျိုးအနေဖြင့် ဘရာဇီးမျိုးများကိုသာ အများဆုံးစိုက်ပျိုးကြကြောင်း၊(၁)ဧက ကုန်ကျစရိတ် အနေဖြင့်ထွန်းယက်ခ၊မျိုး၊သွင်းအားစု၊ရေတင်ခ၊ လုပ်သားခအပါအဝင် စုစုပေါင်း(၂၅)သိန်းဝန်းကျင် ကုန်ကြကြောင်း၊ငှက်ပျောပျိုးပင်တစ်ပင်လျှင်(၂၀၀-၃၀၀)ကျပ်ဝယ်ယူရကြောင်း ၊ စိုက်ပျိုးပြီး(၉)လ အကြာတွင် ငှက်ပျောသီးများစတင်ရင့်မှည့်လာကာ ခုတ်ယူရောင်းချနိုင်ကြောင်း၊ရောင်းဝယ်မှုအနေ ဖြင့်ငှက်ပျောခိုင်ထွက်ပေါ်ပြီးချိန်တွင် ပွဲစားများမှ စိုက်ခင်းပြတ်ကြိုတင်ဝယ်ယူမှုရှိသလို ရင့်မှည့်ချိန် ရောက်မှတောင်သူများကိုယ်တိုင်ခုတ်ယူရောင်းချကြောင်းလည်းသိရှိရပါသည်။ ဘရာဇီး(ခ)တစ်သျှူး ငှက်ပျောတစ်ဖီးလျှင် လက်လီစျေးအနေဖြင့် (၃၀၀၀/-)ကျပ်ဝန်းကျင်ဖြင့်ရောင်းဝယ်လျှက်ရှိကြောင်း၊ လက်ကားစျေးအနေဖြင့် ငှက်ပျောတစ်ခိုင်လျှင် (၁၂၀၀၀-၁၅၀၀၀)ကျပ်ဖြင့် ရောင်းဝယ်လျှက်ရှိ ကြောင်း၊ဝယ်လိုအားရှိသော ဘရာဇီး(ခ)တစ်သျှူးငှက်ပျောမှာ ရင့်မှည့်လျှင်အခွံမှာ သံပုရာရောင်ရှိပြီး အနံ့မွှေးကာအသားပြည့်၍ အရသာမှာမွေး၍ချို့စိမ့်သောကြောင့် လူကြိုက်များကြောင်း၊စျေးကွက် အနေဖြင့် ရန်ကုန်၊မန္တလေး၊မူဆယ်မြို့များသို့ တင်ပို့ရောင်းချလျှက်ရှိကြောင်း၊ငှက်ပျောသီးသယ်ယူ ရာတွင်ထိခိုက်မှုမရှိစေရန် ဂျပ်ဖာများဖြင့် ထုတ်ပိုးတင်ပို့ရကြောင်း၊ငှက်ပျောသီးတစ်ဖီးလျှင် အလုံးရေ (၂၀-၂၅)လုံးကျော်အထိရှိသောကြောင့် ဂျပ်ဖာတစ်ဖာလျှင်(၂)ဖီးသာဝင်ဆံ့ကြောင်း၊(၁)ဧက အကျိုး အမြတ်အနေဖြင့် စျေးနှုန်းအပေါ်မူတည်၍ သိန်း(၇၀-၈၀)နီးပါး အကျိုးအမြတ်ရရှိသောကြောင့် စီးပွားရေးတွက်ခြေကိုက်သည့်အတွက် စိုက်ပျိုးသင့်ပါကြောင်းသိရှိရပါသည်။

DOCA(မန္တလေး)