မတ်လနောက်ဆုံးပတ်အတွင်းမန္တလေးပဲမျိုးစုံစျေးကွက်သို့ မန္တလေးတိုင်းဒေသကြီး၊ စစ်ကိုင်း တိုင်းဒေသကြီး၊မကွေးတိုင်းဒေသကြီးနှင့် ရှမ်းပြည်နယ်တို့မှ ထွက်သည့်ပဲစင်းငုံသီးနှံများ ဝင်ရောက် လျက်ရှိကြောင်း သိရပါတယ်။ပဲစင်းငုံမှာ ပြည်တွင်းစားသုံးမှုနည်းပြီး ပြည်ပသို့တင်ပို့ ရောင်းချသည့် ပဲတစ်မျိုးဖြစ်ပါတယ်။ မန္တလေးတိုင်းဒေသကြီးတွင် ပဲမျိုးစုံစိုက်ပျိုးမှုများပြားပြီး၊၃၁.၁.၂၀၂၅ ရက်နေ့ အထိ ၂၀၂၄-၂၀၂၅ ခုနှစ် ပဲစင်းငုံသီးနှံ စိုက်ပျိုးမှု(၃၈၀၀၇၇)ဧက၊ ရိတ်သိမ်း(၃၁၁၀၀၇)ဧက၊ အထွက် နှုန်း (၉.၃၃)တင်း နှင့်အထွက် (၂၉၀၁၃၃၃)တင်းဖြစ်ကြောင်း သိရပါတယ်။ ပဲစင်းငုံကို ပြည်တွင်း၌ အသားများနှင့်တွဲ၍ ပဲဟင်း၊ ပဲနှပ်၊ ပဲကြော်၊ ပဲပြုတ်၊ ပဲသီးစိမ်းပြုတ်၊ ပဲကြာဇံ၊ ပဲစင်းငုံနှင့် ပြုလုပ် သည့်မုန့်များအဖြစ် စားသုံးကြပြီး၊ပဲစင်းငုံအား ကိုယ်အရောင်ကျစေရန်စားသုံးကြကြောင်း သိရပါ တယ်။ ပဲစင်းငုံအခွံအမှော်များကို တိရိစ္ဆာန်အစာအဖြစ်အသုံးပြုခြင်း၊ပဲစင်းငုံအရိုးများကို ခြံစည်းရိုး သဖွယ်ကာရံခြင်း နှင့်တံမျက်စည်းအဖြစ်အသုံးပြုကြကြောင်း သိရပါတယ်။ မန္တလေးပွဲစား၊ကုန်သည်၊ စက်ပိုင်များမဟာကထိန်တော်အသင်းတွင် ၂၀၂၅ ခုနှစ်မတ်လနောက်ဆုံးပတ်အတွင်း ဖြစ်ပေါ် လျက်ရှိသော ပေါက်စျေးမှာ ၃တင်းဝင်တစ်အိတ်လျှင်ပဲစင်းငုံ(နီ) ၂၇၈၀၀၀ ကျပ်၊ ပဲစင်းငုံ(ဖြူ) ၂၇၅၀၀၀ ကျပ်၊တစ်ပိဿာပေါက်စျေးမှာ ပဲစင်းငုံ(နီ) ၄၆၃၃ ကျပ်၊ ပဲစင်းငုံ(ဖြူ) ၄၅၈၃ ကျပ် တို့ဖြစ် ကြောင်း သိရပါတယ်။ ယခင်နှစ်ကာလတူပေါက်စျေးမှာ ၃တင်းဝင်တစ်အိတ်လျှင် ပဲစင်းငုံ(နီ) ၃၄၈၀၀၀ ကျပ်၊ပဲစင်းငုံ(ဖြူ) ၃၁၅၀၀၀ကျပ်၊တစ်ပိဿာစျေးမှာ ပဲစင်းငုံ(နီ)၅၈၀၀ ကျပ်နှင့်ပဲစင်းငုံ (ဖြူ) ၅၂၅၀ ကျပ်စျေးဖြစ်ပေါ်ခဲ့ပြီး၊ ယခင်နှစ်စျေးနှင့်ယခုနှစ်နှိုင်းယှဉ်ပါက ပဲစင်းငုံသီးနှံပေါက်စျေးမှာ လျော့နည်းသွားကြောင်း တွေ့ရှိရပါတယ်။ ပဲစင်းငုံဝင်ရောက်မှုပမာဏပေါ်မူတည်၍ ရက်အလိုက် ပေါက်စျေးအနည်းငယ်ပြောင်းလဲမှုရှိကြောင်း သိရပါတယ်။
DOCA(မန္တလေး)