ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ဓနုဖြူမြို့နယ်တာဝန်ခံ ဦးဝင်းမင်းစိုးနှင့် ဝန်ထမ်းများသည် မိတ်ဖက်အဖွဲ့အစည်းများနှင့် ပူးပေါင်း၍ (၁၅.၆.၂၀၂၂)နေ့တွင် ဓနုဖြူမြို့နယ် ရေတွင်းကုန်းကျေးရွာ အုပ်ချုပ်ရေးမှူးရုံး၌ ကုန်မျိုးစုံဆိုင်ရောင်းချသူ လုပ်ငန်းရှင်(၁၀)ဦးအား စားသုံးသူကာကွယ်ရေး အသိပညာပေးဟောပြောမှု ပြုလုပ်ခဲ့ကြပါသည်။
စားသုံးသူကာကွယ်ရေး အသိပညာပေးဟောပြောပွဲတွင် ရေတွင်းကုန်းကျေးရွာအုပ်ချုပ်ရေးမှူးမှ အဖွင့်အမှာစကားပြောကြားရာ၌ စားသုံးသူကာကွယ်ရေးဥပဒေအကြောင်း ဟောပြောပေးမည့် မြို့နယ်တာဝန်ခံ ဦးဝင်းမင်းစိုးအား ပဏာမ ကျေးဇူးတင်စကားပြောကြားပြီး ၊ စားသုံးသူကာကွယ်ရေးလုပ်ငန်းသည် စားသုံးသူ၊ လုပ်ငန်းရှင်၊ သိုလှောင်ရောင်းချသူ အားလုံးနှင့်သက်ဆိုင်ကြောင်း ဗဟုသုတရရှိရုံသာမက လေးစားလိုက်နာသင့်သည့် အကြောင်းအရာများဖြစ်ကြောင်း ထည့်သွင်းပြောကြားခဲ့ပါသည်။
စားသုံးသူရေးရာဦးစီးဌာန ဓနုဖြူမြို့နယ်တာဝန်ခံ ဦးဝင်းမင်းစိုးက စားသုံးသူကာကွယ်ရေးဥပဒေပါရည်ရွယ်ချက်၊ ကော်မရှင်ဖွဲ့စည်းခြင်း ကော်မရှင်လုပ်ပိုင်ခွင့်နှင့် လုပ်ငန်း တာဝန်များ စီးပွားရေးလုပ်ငန်းရှင်၏ တာဝန်များ၊ ကုန်အညွှန်းအမှတ်အသားဖော်ပြခြင်း၊ စီမံခန့်ခွဲရေးနည်းလမ်းအရ အရေးယူခြင်း၊ စသည့်အခန်းများပါ ဥပဒေအကြောင်းများကို အကျယ်တဝင့် ဟောပြောဆွေးနွေးပြီး တက်ရောက်လာသူ လုပ်ငန်းရှင်များမှ သိရှိလိုသည်များကို ပြန်လည်ဖြေကြားခဲ့ကြောင်း သတင်းရရှိပါသည်။
DOCA(ဧရာဝတီ)