စားသုံးသူရေးရာဦးစီးဌာနအနေဖြင့် စားသုံးသူကာကွယ်ရေးဥပဒေပါ အကြောင်းအရာ များအား စီးပွားရေးလုပ်ငန်းရှင်များအပါအဝင် စားသုံးသူပြည်သူတစ်ရပ်လုံး သိရှိစေနိုင်ရေးအတွက် လစဉ် Talk Show ပြုလုပ်၍အသိပညာပေးလျက်ရှိရာ(၂၀.၈.၂၀၂၆)ရက်နေ့၊ နေ့လယ်(၁၅:၀၀)နာရီ အချိန်တွင် မြင်းခြံမြို့ ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနရုံး၊ လူထုအခြေပြုဗဟိုဌာန (Community Center) ခန်းမ၌ ဆောင်ရွက်ခဲ့ပါသည်။
အဆိုပါ Talk Show အစီအစဉ်တွင် ပြန်ကြားရေးနှင့်ပြည်သူ့ဆက်ဆံရေး ဦးစီးဌာနမှ ဒု-ခရိုင်ဦးစီးမှူး ဦးထိန်လင်း က Talk Show များဆောင်ရွက်ရခြင်း၏ ရည်ရွယ်ချက်များကို ရှေးဦးစွာရှင်းလင်း၍ မြင်းခြံခရိုင်ဦးစီးမှူးရုံးမှ ဦးစီးမှူး ဦးစိုးမိုးထွန်း က စားသုံးသူကာကွယ်ရေးဥပဒေပါ ကုန်အညွန်းအမှတ်အသားများနှင့်စပ်လျဉ်း၍ ‘‘ကုန်အညွှန်း အမှတ်အသားဖော်ပြခြင်းဆိုင်ရာ သိကောင်းစရာများ’’ ခေါင်းစဉ်ဖြင့် ဟောပြောဆွေးနွေးရာတွင် ကုန်စည်နှင့် ဝန်ဆောင်မှုများ ဝယ်ယူသုံးစွဲရာတွင် မိမိအတွက်လုံခြုံစိတ်ချရမှုရှိစေဖို့ ကုန်အညွှန်း အမှတ်သားများအား သေချာစွာဖတ်ရှုဖို့လိုအပ်သလို လူတိုင်းဖတ်ရှုနိုင်အောင်လည်း မြန်မာဘာသာ ဖြင့်ဖြစ်စေ၊ မြန်မာဘာသာနှင့်အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ မဖြစ်မနေထည့်သွင်းဖော်ပြပေးရန် ဥပဒေအရသတ်မှတ်ပြဌာန်းထားရှိမှုများ၊ ကုန်စည်အမျိုးအစား အလိုက်ထည့်သွင်းဖော်ပြရမည့်အချက်များ၊ ပြည့်စုံစွာဖော်ပြပါရှိသော ကုန်ပစ္စည်းများကိုသာ ဝယ်ယူ သုံးစွဲကြရန်နှင့်ရွေးချယ်မှုများ ပြုလုပ်တတ်စေရန်အချက်များ ကုန်စည်နှင့်ဝန်ဆောင်မှုများ ဝယ်ယူသုံးစွဲ ခြင်းကြောင့် နစ်နာဆုံးရှုံးမှုများ မဖြစ်ပေါ်ရေးအတွက် ကုန်အညွှန်းအမှတ်အသားများကို စိစစ်ကြည့်ရှု၍ ဝယ်ယူသုံးစွဲကြရန်နှင့် လုပ်ငန်းရှင်များမှလည်း မိမိတို့၏ ကုန်စည်နှင့်သက်ဆိုင်သည့် ကုန်အညွှန်း အမှတ်အသားများကို ဥပဒေပါပြဌာန်းချက်များနှင့်အညီ မှန်မှန်ကန်ကန်ထည့်သွင်း ဖော်ပြပေးရမည်ဖြစ်ကြောင်း စသည်ဖြင့် အသိပညာပေးဆွေးနွေးခဲ့ကြောင်း သိရသည်။
doca(မန္တလေး)