တောင်ငူခရိုင်၊အုတ်တွင်းမြို့နယ်တွင် ကြံစိုက်ဧက၁၃၉၀ရှိရာ ပြီးခဲ့သည့် ဖေဖော်ဝါရီလ ဒုတိယ ပတ်တွင် ကြံများအားလုံး ခုတ်သိမ်းပြီးစီးပြီး ဖြစ်သည်။ အုတ်တွင်းမြို့နယ် ဗောဓိကုန်းကျေးရွာရှိ သကြားစက်သည် ကြံစိုက်တောင်သူများ စိုက်ပျိုးရာသီတွင် စိုက်ပျိုးစရိတ်များ ချေးငွေများ ထုတ်ပေး သကဲ့သို့ ရရှိလာသော ကြံများကိုလည်း ဝယ်ယူပေးပါသည်။
ကြံစိုက်ပျိုးချိန်တွင် စိုက်ပျိုးစရိတ်အနေဖြင့် တစ်ဧကလျှင် ၄၀၀၀၀၀ ကျပ်နှင့် ဘောင်လုံးချိန်တွင် တစ်ဧကလျှင် ၁၀၀၀၀၀ ကျပ်ဖြင့် စုစုပေါင်း ၅၀၀၀၀၀ ကျပ်ကို အတိုးမဲ့ ထုတ်ချေးပေးခဲ့ပါသည်။ကြံများ စတင်ထွက်ရှိချိန် ဒီဇင်ဘာလက စက်ရုံစတင်လည်ပတ်ပြီး ကြံများကို စက်ရုံအရောက်ဈေး ၁၈၀၀၀၀ ကျပ်ဖြင့် ဝယ်ယူပေးသကဲ့သို့ စက်ရုံအရောက် လာရောက် ရောင်းချရန် အခက်အခဲရှိပါကလည်း စိုက်ကွင်းအရောက်သွားရောက်ပြီး တစ်တန်လျှင် ၁၅၀၀၀၀ ကျပ်ဖြင့် ဝယ်ယူပေးခဲ့ပါသည်။
ကြံတန်ချိန် ၇၀၀၀၀ ကြိတ်ခွဲရန် လျာထားခဲ့ရာ ယခုကြံရာသီပြီးချိန်တွင် ၇၉၃၂၀တန်ခန့် ထုတ်လုပ်နိုင်ခဲ့ပါသည်။ တင်လဲရည်အထွက်နှုန်းတန်မှာ ၄၉၁၀ဖြစ်ပြီး သကြားအထွက်တန်မှာ ၇၇၈၁ ဖြစ်ပါသည်။ ဗောဓိကုန်း သကြားစက်မှ ထွက်ရှိသော သကြားများကို နှစ်စဉ်တင်ဒါစနစ်ဖြင့် ရောင်းချ ကြောင်း တာဝန်ရှိသူ တစ်ဦးထံမှ သိရှိရပါသည်။
DOCA(ပဲခူး)