တောင်ငူမြို့ ညောင်ပင်ဈေးရှိ ဟင်းသီးဟင်းရွက်ဆိုင်များ၌ ပေါ်သော ရာသီစာ ဒန့်သလွန် သီးများ ပေါ်နေပြီဖြစ်ပါသည်။ ဒန့်သလွန်ပင်ကို အိမ်ခြံဝိုင်းများအတွင်း၌ စိုက်ပျိုးကြပါသည်။ ဒန့်သလွန် ပင်မှာ မြေကြီးပျော့သောနေရာတွင်စိုက်ပျိုးပါက မိုးများသောကာလတွင် အမြစ်မှ လဲသွား တတ်ပါသည်။ ထို့ကြောင့် ကုန်းမာသောနေရာများတွင် အများအားဖြင့် ဒန့်သလွန်ပင်အား စိုက်ပျိုး ကြပါသည်။
ဒန့်သလွန်ပင်မှာ အသီးမှစ၍ အရွက်၊ အစေ့၊ အခေါက်အထိ အသုံးဝင်သောအပင်တစ်မျိုး ဖြစ်ပါသည်။ ဒန့်သလွန်ရွက်ကို ဟင်းချိုချက်၍ စားကြသလို ဒန့်သလိုအစေ့မှာ ဗမာဆေးဖော်စပ်ရာတွင် အသုံးပြုနိုင်ပါသည်။ ထို့ပြင် သွေးတိုးရောဂါရှိသူများ ရုတ်တရက် သွေးတက်ပြီး မူးမော်လာ လျှင် ဒန့်သလွန်အခေါက်ကို သေးသေးခုတ်၍ ရှူပေးပါက ရောဂါသက်သာစေနိုင်ပါသည်။ ထို့ကြောင့် ဒန့်သလွန်ပင်မှာ အသီးအရွက်မှစ၍ တပင်လုံးအသုံးဝင်သော အပင်တစ်မျိုးဖြစ်၍ အိမ်ခြံ ကျယ်သော မိသားစုများအနေဖြင့် မိမိတို့ခြံဝင်းထဲ၌ ဒန့်သလွန်ပင်အား စိုက်ပျိုးခြင်းဖြင့် အပိုဝင်ငွေ ရကြပါသည်။
တောင်ငူမြို့ ညောင်ပင်ဈေးတွင် ပေါ်ဦးပေါ်ဖျား ဒန့်သလွန်သီးများ စတင်ရောင်းချနေပြီ ဖြစ်ပါ သည်။ ဒန့်သလွန်သီးအား ငါးရံ့ဖြင့်တွဲဖက်၍ ချက်စားပါက ခံတွင်းမြိန်စေသောဟင်းတစ်ခွက် ဖြစ်ပါ သည်။ ဒန့်သလွန်သီးဈေးနှုန်းအနေဖြင့် အတောင့် (၁၀) တောင့်ပါ (၁)စည်းလျှင် ယခင်ပတ်က (၂၀၀၀) ကျပ်ခန့်ရှိရာမှ ယခုမတ်လ တတိယပတ်တွင် (၁၅၀၀) ကျပ်ခန့်ဈေးနှုန်းကျဆင်းသွားကြောင်း ညောင်ပင်ဈေးရှိ ဟင်းသီးဟင်းရွက်ရောင်းချသူတစ်ဦးထံမှ လေ့လာသိရှိခဲ့ပါသည်။
DOCA(ပဲခူး)