ရန်ကုန်တိုင်းဒေသကြီး၊ သန်လျင်ခရိုင်၊ သုံးခွမြို့နယ်တွင် ယခုနှစ်ဆောင်းသီးနှံ မြေပဲများ (၁၁၀၃)ဧက စိုက်ပျိုးထွက်ရှိလျက်ရှိကြောင်း သိရသည်။ ယခုအခါ လက်ပံကျိုးကျေးရွာ၊ ကျူတောဝ၊ ဒေါင့်ကြီး၊ တံပိုးတန်း၊ ဖရုံကန်၊ ညောင်နီကျေးရွာစသည့် မြေပဲစိုက်ကျေးရွာများမှ ထွက်ရှိသော မြေပဲများအား တောင်သူများမှ လာရောက်ကြိတ်ခွဲလျက်ရှိကြောင်း သိရသည်။
သုံးခွမြို့နယ်တွင် ရာသီချိန် (မတ်လ၊ ဧပြီလ၊ မေလ)များတွင် တောင်သူများထံမှ မြေပဲကုန် ကြမ်းရရှိသဖြင့် ဆီစက်လုပ်ငန်းအချို့မှာ ကြိတ်ခွဲလည်ပတ်လျက်ရှိကြောင်း သိရသည်။ ဒေသတွင်းရှိ ဆီစက်လုပ်ငန်းများသည် တောင်သူများလာရောက် ကြိတ်ခွဲသည့် မြေပဲများအား နဝလီကြိတ်ခွဲပေးလျက်ရှိကြောင်း၊ သီးခြားကုန်ကြမ်းဝယ်ယူ၍ လည်ပတ်လုပ်ကိုင်ခြင်းမရှိကြောင်း၊ ရာသီချိန် (၃)လ သာ ကြိတ်ခွဲလည်ပတ်ကြကြောင်း၊ ကြိတ်ခွဲခအနေဖြင့် မြေပဲဆီ (၁၀)ပိဿာ(၁)ပုံးလျှင် (၁၈၀၀၀)ကျပ်ဖြစ်ကြောင်း၊ တောင်သူများမှလည်း မြေပဲဆီများအား မိသားစု စားသုံးရန်နှင့် ပိုလျှံပါက စက်ကြိတ်ခ ကာမိစေရန် ပြန်လည်ရောင်းချခဲ့ကြကြောင်း၊ ဆီကြိတ်ခွဲ ထွက်ရှိသည့် မြေပဲဖတ်များအား လာရောက်ကြိတ်ခွဲသူမှ ပြန်လည်ယူဆောင်၍ အဆင်သင့်သလို ပြန်လည်ရောင်းချကြကြောင်း သိရသည်။ ဆီစက်များမှာ လျှပ်စစ်မီးရရှိချိန် နည်းပါးသဖြင့် အင်ဂျင်စက်ဖြင့်သာ နံနက် (၀၇:၀၀)နာရီမှ ညနေ(၁၇:၀၀)နာရီအချိန်ထိ ကြိတ်ခွဲလည်ပတ်ရကြောင်း၊ မြေပဲကုန်ကြမ်းရရှိမှု အပေါ် မူတည်၍ ကြိတ်ခွဲလည်ပတ်လျက်ရှိကြောင်း သိရသည်။
DOCA(ရန်ကုန်)