မန္တလေးတိုင်းဒေသကြီး၊ ညောင်ဦးခရိုင်၊ ကျောက်ပန်းတောင်းမြို့နယ်တွင် စားဖိုဆောင် သီးနှံဖြစ်သည့် ကြက်သွန်နီသီးနှံကို မိုးကြက်သွန်နီ၊ ဆောင်းကြက်သွန်နီဟူ၍ နှစ်ကြိမ်စိုက်ပျိုးကြရာ မိုးကြက်သွန်နီကို စက်တင်ဘာလတွင် စတင်စိုက်ပျိုးပြီး ဒီဇင်ဘာလတွင် ရိတ်သိမ်းလေ့ရှိကြောင်း၊ တစ်မြို့နယ်လုံးအနေဖြင့် မိုးကြက်သွန်နီကို (၁၅၄)ဧကစိုက်ပျိုးခဲ့ကြောင်း၊ စိုက်ဧကအားလုံးရိတ်သိမ်းပြီးဖြစ်ရာ တစ်ဧကလျှင်ပျမ်းမျှအထွက်နှုန်းအနေဖြင့်(၂၅၅၀)ပိဿာဖြင့် အထွက်စုစုပေါင်း (၃၉၂၇၀၀)ပိဿာထွက်ရှိခဲ့ပါကြောင်း သိရသည်။ ဆောင်းကြက်သွန်နီကို ဇန်နဝါရီလတွင် စတင် စိုက်ပျိုး၍ ဧပြီလတွင် ရိတ်သိမ်းလေ့ရှိပါသည်။ ဆောင်းကြက်သွန်နီကို စိုက်ပျိုးရန်(၇၁၀)ဧက စိုက်ပျိုးရန်လျာထားခဲ့သော်လည်း စိုက်ပျိုးမှုအနေဖြင့် (၆၈၁)ဧကသာစိုက်ပျိုးနိုင်ခဲ့ကြောင်း၊ စိုက်ဧကအားလုံးရိတ်သိမ်းပြီးဖြစ်ရာ တစ်ဧကလျှင် ပျမ်းမျှအထွက်နှုန်း(၂၇၅၀)ပိဿာဖြင့် အထွက်စုစုပေါင်း(၁၈၇၂၇၅၀)ပိဿာထွက်ရှိခဲ့သည်။ မြို့နယ်အတွင်း ဆောင်းကြက်သွန်နီကို အများဆုံးစိုက်ပျိုးမှုအနေဖြင့် ရေဆုံးကျေးရွာ၊ စိတ္တိန်ကျေးရွာ၊ မွေးကျစ်ကျေးရွာ၊ ကိုင်းကျေးရွာ၊ ကြက်မောက်တောင် ကျေးရွာ၊ လဲဂွကျေးရွာများမှ အဓိကစိုက်ပျိုးကြကြောင်း၊ အဆိုပါကျေးရွာများမှ မြို့ပေါ်ရှိပွဲရုံများသို့ လည်းကောင်း၊ မြို့မစည်ပင်သာယာဈေးတွင် ကျေးရွာမှကြက်သွန်စိုက်တောင်သူများမှ တိုက်ရိုက် ရောင်းချခြင်းဖြင့်လည်းကောင်း အရောင်းအဝယ်ပြုလုပ်ကြပြီး ကြက်သွန်နီ(ကြီး)တစ်ပိဿာလျှင် (၂၅၀၀)ကျပ်၊ လုံးလတ်တစ်ပိဿာလျှင်(၂၃၀၀)ကျပ်၊ လုံးသေးတစ်ပိဿာလျှင်(၂၀၀၀)ကျပ်တို့ဖြင့် လှိုင်လှိုင်အရောင်းအဝယ်ဖြစ်လျက်ရှိကြောင်း သိရသည်။
DOCA(မန္တလေး)