ကမ္ဘောဒီးယားနိုင်ငံသည် ၂၀၂၅ ခုနှစ် ပထမလေးလအတွင်း ဆန်တန်ချိန် ၂၈၂၃၁၅ တန် တင်ပို့နိုင်ခဲ့ပြီး စုစုပေါင်းဝင်ငွေ အမေရိကန်ဒေါ်လာ ၂၀၉ သန်း ရရှိခဲ့သည်ဟု ကမ္ဘောဒီးယား ဆန်စပါးအသင်းချုပ် (CRF) က မေလ ၅ ရက်၊ တနင်္လာနေ့တွင် သတင်းထုတ်ပြန်ခဲ့ပါသည်။
အဆိုပါ သတင်းထုတ်ပြန်ချက်အရ ယခုနှစ် ဇန်နဝါရီလမှ ဧပြီလအတွင်း ဆန်တင်ပို့သည့် ကုမ္ပဏီ (၄၈) ခုမှ နိုင်ငံများနှင့်ဒေသပေါင်း ၅၉ ခုသို့ တင်ပို့နိုင်ခဲ့ကြောင်း၊ တရုတ်နိုင်ငံသည် ဆန် အဓိက တင်သွင်းသူအဖြစ် ဆက်လက်ရပ်တည်နေကြောင်း၊ ထိုသို့ ပြည်ပသို့ ဆန်တင်ပို့မှုတွင် ဆန်မွှေး ၇၇ ဒသမ ၉၄ ရာခိုင်နှုန်း၊ ဆန်ဖြူ ၁၇ ဒသမ ၁၅ ရာခိုင်နှုန်း၊ ပေါင်းဆန် ၂ ဒသမ ၄၇ ရာခိုင်နှုန်း၊ အော်ဂဲနစ်ဆန် ၁ ဒသမ ၉၅ ရာခိုင်နှုန်းနှင့် အခြားဆန်အမျိုးအစားများ ၀.၄၉ ရာခိုင်နှုန်း အသီးသီးပါဝင်ကြောင်း သိရပါသည်။
ကမ္ဘောဒီးယားသည် ဒေသတွင်းဘက်စုံစီးပွားရေး ပူးပေါင်းဆောင်ရွက်မှု သဘောတူညီချက် (RCEP) နှင့် ကမ္ဘောဒီးယား-တရုတ် လွတ်လပ်သော ကုန်သွယ်မှု သဘောတူညီချက် (CCFTA) တို့အရ ၎င်း၏ လယ်ယာထွက်ကုန်များကို တရုတ်နိုင်ငံနှင့် အခြား RCEP နိုင်ငံများသို့ အကောက်ခွန် သက်သာခွင့်ဖြင့် တင်ပို့နိုင်ရန် အခြေခံအုတ်မြစ်ချထားနိုင်ပြီး အထူးသဖြင့် ဆန်၊ အဝါရောင် ငှက်ပျောသီး၊ သရက်သီး၊ လုံငန်းသီး သို့မဟုတ် တရုတ်လိုင်ချီးသီး၊ ငရုတ်ကောင်းနှင့် သဘာဝရေထွက်ကုန်ပစ္စည်းအချို့ကို ဦးစားပေး အခွန်နှုန်းထားများဖြင့် တရုတ်နိုင်ငံသို့ တင်ပို့ခဲ့ကြောင်း စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန၏ ပြောရေးဆိုခွင့်ရှိသူ Penn Sovicheat က ပြောကြားခဲ့ပါသည်။
Source: Khmer Times, May 6, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)