သီရိလင်္ကာသမ္မတ Anura Kumara Dissanayaka သည် သီရိလင်္ကာနိုင်ငံတွင် Vingroup ၏ ဘက်ပေါင်းစုံရင်းနှီးမြှုပ်နှံမှု အထူးသဖြင့် အိမ်ရာမြေနှင့် ခရီးသွားကဏ္ဍတို့တွင် ရင်းနှီးမြှုပ်နှံမှုအလား အလာအပေါ် ချီးမွမ်းပြောကြားခဲ့ကြောင်း သိရပါသည်။ ဗီယက်နမ်နိုင်ငံသို့ နိုင်ငံတော်အဆင့်အလည် အပတ်ခရီးရောက်ရှိနေသည့် သမ္မတ Dissanayaka သည် ၎င်း၏ Vingroup ရုံးချုပ်သို့ မေလ ၄ ရက် နေ့က အလည်အပတ်ခရီးစဉ်အတွင်း group ၏ ကျွမ်းကျင်မှု၊ ကျော်ကြားမှုနှင့် အောင်မြင်မှုအပေါ် အလွန်အထင်ကြီးကြောင်း ဖော်ပြခဲ့ပြီး ဗီယက်နမ်၏စီးပွားရေးဖွံ့ဖြိုးတိုးတက်မှုတို့တွင် သိသာစွာ ပူးပေါင်းပါဝင်လျှက်ရှိကြောင်း မှတ်ချက်ပြုခဲ့ပါသည်။ သမ္မတသည် Vingroup ၏ လျှပ်စစ်မော်တော် ယာဉ်အမှတ်တံဆိပ်ဖြစ်သည့် VinFast ကိုဗဟိုပြု၍ ၎င်းတို့၏ အစိမ်းရောင်ရွေ့လျားမှုစနစ် တည်ထောင်မှုအပေါ် ချီးမွမ်းခဲ့ကြောင်း သိရပါသည်။ များစွာသောလျှပ်စစ်ကားမော်ဒယ်များ ထုတ်လုပ်ခြင်းနှင့်အတူ VinFast သည် သီရိလင်္ကာ၏အိမ်နီးခြင်းနိုင်ငံဖြစ်သော အိန္ဒိယအပါအဝင် ၎င်းတို့၏ နိုင်ငံတကာတည်ရှိမှုကို တိုးချဲ့လျှက်ရှိကြောင်း သိရပါသည်။ သမ္မတက သီရိလင်္ကာသည် လည်း VinFast မော်တော်ယာဉ်များအတွက် အာမခံချက်ရှိသော ဈေးကွက်ဖြစ်လာမည်ဟု ယုံကြည်ကြောင်း ပြောကြားခဲ့ပါသည်။ သမ္မတက သီရိလင်္ကာနိုင်ငံ၏ အကြီးဆုံးမြို့ဖြစ်သည့် ကိုလံဘိုမြို့တွင် ခရီးသွားကဏ္ဍ၊ ဘဏ္ဍာရေးနှင့် အိမ်ရာမြေအစရှိသည့် Vingroup က အားကောင်းသည့်ကဏ္ဍများအတွက် ရင်းနှီးမြှုပ်နှံမှုအခွင့်အလမ်းများကို အသားပေးပြောကြားခဲ့ကြောင်း သိရပါသည်။ သီရိလင်္ကာအစိုးရသည် လတ်တလောတွင် မြို့တော်ဖွံ့ဖြိုးတိုးတက်မှုမြှင့်တင်ရန်နှင့် ရင်းနှီးမြှုပ်နှံမှု ဆွဲဆောင်ရန်အတွက် အခွန် ကင်းလွတ်ခွင့်ပေးခြင်းတို့ဖြင့် ကမ်းလှမ်းလျှက်ရှိကြောင်း သိရပါသည်။ Vingroup ၏ ဒုတိယဥက္ကဌနှင့် စီအီးအိုဖြစ်သူ Nguyen Viet Quang က သီရိလင်္ကာသည် ကြီးမားသော ဖွံ့ဖြိုးတိုးတက်မှုအလားအလာရှိသည့် ကျွန်းနိုင်ငံဖြစ်ကြောင်းနှင့် Vingroup သည် လည်း လာမည့်အချိန်တွင် နိုင်ငံ၌ရင်းနှီးမြှုပ်နှံရန်အတွက် သင့်လျော်သောအခွင့်အလမ်းများကို ရှာဖွေ သွားမည်ဟု ပြောကြားခဲ့ပါသည်။
Reference; Vietnam Plus
DOCA(ရန်ကုန်)